ޔަހޫދީންގެ ޖާސޫސީ އިދާރާ ކަމަށްވާ މޮސާދަށް ޖާސޫސްކޮށްދިން ކަމުގެ ތުޙުމަތުގައި ހައްޔަރުކުރި ހަތަރު މީހުންނަށް އީރާނުގައި މަރުގެ އަދަބު ދީފިއެވެ.
އީރާނުގެ އަދުލުއިންސާފާ ބެހޭ ވުޒާރާއިން ބުނެފައިވަނީ ޖާސޫސްކުރުމުގެ ނުރައްކާތެރި ޢަމަލުތަކެއް އެ ހަތަރު މީހުން ހިންގާފައިވާ ކަމަށެވެ. އަދި އެ މީހުން ޖާސޫސްކޮށްފައިވަނީ މޮސާދުގެ އިރުޝާދުގެ ދަށުން ކަމަށާއި އެ މީހުންނަށް މަރުގެ އަދަބު ދީފައިވަނީ ޤާނޫނީ އިމުގެ ތެރެއިން ފުރިހަމަ ކުރަން ޖެހޭ ކަންކަން ފުރިހަމަ ކުރުމަށްފަހު ކަމަށް ވެސް އެ ވުޒާރާއިން ބުނެފައިވެއެވެ.
މޮސާދުގެ ޖާސޫސުންތަކެއް އީރާނުން ޤަތުލުކޮށްފައި ވަނީ ފަލަސްޠީނުގައި ޔަހޫދީން ހިންގަމުންދާ ލާއިންސާނީ ޢުދުވާނާ ދެކޮޅަށް އީރާނާ ގުޅުން އޮންނަ ލުބުނާނުގެ ޙިޒްބުﷲ ޖަމާޢަތާއި ޔަމަނުގެ ޙޫޘީ ޖަމާޢަތުން ތެދުވެފައިވާ ދަނޑިވަޅެއްގައެވެ. އެ ދެ ޖަމާޢަތުން ދަނީ އީރާނުގެ މަދަދާއެކު ފަލަސްޠީނުގެ ދިފާޢުގައި ޔަހޫދީންނާ ދެކޮޅަށް ޙަމަލާދެމުންނެވެ.
މޮސާދުގެ ޖާސޫސުން ދޭތެރެދޭތެރެއިން އީރާނުން ހައްޔަރުކުރެއެވެ. އީރާނުގެ އިތުރުން ޔަހޫދީންނާ ވާދަވެރި ޤައުމުތައް ކަމަށްވާ މިޞްރާއި ސޫރިޔާއާއި ލުބުނާން ފަދަ ޤައުމުތަކުން ވެސް ވަނީ އެކި ފަހަރު މަތިން މޮސާދުގެ ޖާސޫސުން ހައްޔަރުކޮށްފައެވެ.
1949 ވަނަ އަހަރު އުފެއްދި މޮސާދަކީ ދުނިޔޭގެ އެންމެ ކުރިއަރާފައިވާ ޖާސޫސީ އިދާރާއެވެ.