އިނގިރޭސި ޕްރިމިއާ ލީގުގައި ރޭ ވެސްޓް ހޭމް ޔުނައިޓެޑް އަތުން ބަލިވެ، ތާވަލުގެ އެއްވަނައަށް އަލުން އަރަން ލިބުނު ފުރުސަތު އާސެނަލުން ނަގާލައިފިއެވެ.
އާސެނަލުގެ ދަނޑުގައި ކުޅުނު މެޗުން ވެސްޓް ހޭމް މޮޅުވީ 2-0 ގެ ނަތީޖާއަކުންނެވެ.
މި މެޗުގެ ފުރަތަަމަ ހާފުގައި އާސެނަލުން ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، މެޗުގެ ވަރަށް ކުރީކޮޅު ވެސްޓް ހޭމުން ވަނީ ލީޑު ނަގާފައެވެ. ޖެރަޑް ބޮވެން ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ޗެކް ރިޕަބްލިކުގެ މިޑްފީލްޑަރު ތޯމަސް ސޫޗެކެވެ.
މި މެޗުގައ ވެސްޓް ހޭމުން ލީޑު ފުޅާކޮށްފައިވަނީ ދެވަނަ ހާފު ފަށައިގެން 10 ވަނަ މިނެޓުގައެވެ. ހިލޭ ޖެހުމެއްގައި ޖޭމްސް ވޯޑް ޕްރައުސް ނަގައިދިން ހުރަހަކުން މި ލަނޑު ކާމިޔާބުކޮށްދިނީ ގްރީސްގެ ޑިފެންޑަރު ކޮންސްޓަންޓިނޯސް މަވްރޮޕަނޯސްއެވެ. މީގެ އިތުރުން މެޗުގެ އިތުރު ވަގުތުގެ ތެރޭގައި ވެސްޓް ހޭމަށް ޕެނަލްޓީއެއް ލިބުނު ނަމަވެސް، ބަދަލަކަށް ކުޅެން އެރި އަލްޖީރިއާގެ މިޑްފީލްޑަރު ބޭންރަހްމާ ފޮނުވާލި ޕެނަލްޓީ، އާސެނަލުގެ ގޯލްކީޕަރު ޑޭވިޑް ރާޔާ ވަނީ ދިފާއުކޮށްފައެވެ.
މި ނަތީޖާއާއެކު ތާވަލުގެ ދެވަނައިގައި އާސެނަލް އޮތީ ކުޅުނު 19 މެޗުން ލިބުނު 40 ޕޮއިންޓާއެކުއެވެ. ތާވަލުގެ އެއްވަނައިގައި އޮތީ 19 މެޗުން 42 ޕޮއިންޓް ހޯދާފައިވާ ލިވަޕޫލެވެ. އަދި ރޭގެ މެޗުން މޮޅުވި ވެސްޓް ހޭމް އޮތީ ތާވަލުގެ ހަވަނައިގައި 19 މެޗުން ލިބުނު 33 ޕޮއިންޓާއެކުއެވެ.