ޔަހޫދީ ފައުޖުން އަސްކަރީ ޓޭންކުފަހަރާ އެކު ޣައްޒާގެ މެދުތެރޭގައިވާ ރަށްތަކަށް އަރައި، އެ ރަށްތަކަށް ވެރިވެގަންނަން ކުރަމުންދާ މަސައްކަތްތައް ވަރުގަދަ ކުރަމުން އެބަދެއެވެ. ޣައްޒާގެ މެދުތެރޭގައިވާ ސަރަޙައްދުތަކަށް ޔަހޫދީންގެ އަސްކަރީ ޓޭންކުފަހަރުން ދެމުންދާ ރަޙުމު ކުޑަ ޙަމަލަތައް ފަހަކަށް އައިސް ވަނީ އިތުރު ކޮށްފައެވެ. މި ކަމާ ގުޅިގެން އެ ސަރަޙައްދުގައި ދިރިއުޅޭ އެތަކެއް ސަތޭކަ ހާސް ބަޔަކު ދަނީ، ޣައްޒާގެ ހުޅަނގާއި ދެކުނުގައިވާ ސަރަޙައްދުތަކަށް ދަތުރު ކުރަމުންނެވެ.
އަލް-ބުރަޔިޖުގައި ދިރިއުޅޭ ރައްޔިތުން ބުނީ ޔަހޫދީ ފައުޖުގެ އަސްކަރީ ޓޭންކުތައް އެ ރަށް ވަށައިލާފައިވާ ކަމުގައެވެ. އަދި، މެދުކެނޑުމެއް ނެތި އެ ރަށަށް ޙަމަލަ ދެމުންދާ ކަމުގައެވެ. ދެކުނުގައި އޮންނަ ޚާން ޔޫނިސްގައި ހުންނަ ހޮސްޕިޓަލްތަކަށް ވެސް ޔަހޫދީ ސިފައިން ދަނީ ޙަމަލަތައް އަމާޒު ކުރަމުންނެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ފާއިތުވި 24 ގަޑިއިރުގެ ތެރޭގައި އިތުރު 210 މީހުން ޝަހީދު ކޮށްލާފައިވާ ކަމުގައެވެ. މިއާއެކު، އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 21,320 އަށް އުފުލިފައެވެ. ސުންނާފަތި ކޮށްލާފައިވާ ޢިމާރާތްތަކުގައި ޝަހީދު ކޮށްލާފައިވާ އިތުރު ބަޔެއްގެ ހަށިތައް ތާށިވެފައިވާ ކަމުގައި ބެލެވެއެވެ.
ޣައްޒާގެ މެދުތެރޭގައި އޮންނަ އަލް-ނުޞައިރާތާއި ބުރަޔިޖުގެ އިތުރުން މަޣާޒީގެ ގިނަ ޢަދަދެއްގެ ރައްޔިތުން ދަތުރު ކޮށްފައި ވަނީ މެޑިޓެރޭނިޔަން ކަނޑުގެ އައްސޭރިފަށުގައި އޮންނަ ދީރް އަލް-ބަލަޙަށެވެ. އޭގެ ތެރެއިން ގިނަ މީހުން ދިރިއުޅެމުން ދަނީ މަގުތަކާއި ހުސް ބިންތަކުގައި ޓެންޓު ޖަހައިގެންނެވެ.
"150,000 އަށްވުރެ ގިނަ މީހުން - ކުޑަކުދިންނާއި، އަންހެނުންނާއި، ބަލިމީހުންނާއި އުމުރުން ދުވަސްވީ މީހުން - ދާނެ ތަނެއް މިހާރު ނެތް. އެ މީހުން ވަނީ މަގުމަތިވެފައި،" ފަލަސްޠީނުގެ ރެފިއުޖީންނާ ބެހޭ އދގެ އިދާރާއިން ބުންޏެވެ.
ޔަހޫދީ ފައުޖުން ޚާން ޔޫނިސަށް އެންމެ ފަހުން ދީފައިވާ ޙަމަލަތައް އަމާޒު ކޮށްފައި ވަނީ ހަސްފަތާލްތައް ހުންނަ ސަރަޙައްދުތަކަށެވެ. އެ ގޮތުން އަލް-އަޙްލީ ހަސްފަތާލަށް ޔަހޫދީ ފައުޖުގެ އަސްކަރީ މަތިންދާބޯޓުތަކުން ރަޙުމު ކުޑަ ޙަމަލަތަކެއް އަމާޒު ކޮށްފައިވެއެވެ. ރެޑް ކްރެސެންޓުން ބުނީ މި ޙަމަލަތަކުގައި 10 މީހުން ޝަހީދު ކޮށްލާފައިވާ ކަމުގައެވެ. އަދި، އިތުރު 12 މީހުން ޒަޚަމު ކޮށްލާފައިވާ ކަމުގައެވެ.