ރަތް ކަނޑުގައި ދަތުރުކުރާ ވިޔަފާރި އުޅަނދުފަހަރުގެ ސަލާމަތާއި ރައްކާތެރިކަން ކަށަވަރު ކުރުމުގެ ނަމުގައި އެމެރިކާއިން ފަށަން އިޢުލާނު ކޮށްފައިވާ އަސްކަރީ ޙަރަކާތަށް އެކަށީގެންވާ ތަރުޙީބު ލިބިފައިވާ ނުވާ ކަން ހާމަވެއްޖެއެވެ. ރަތް ކަނޑަށް ގިނަ ޤައުމުތަކެއްގެ އަސްކަރީ މަނަވަރުތައް ހިމެނޭ ގުޅިފައިވާ ލަޝްކަރެއް ފޮނުވަން އެމެރިކާގެ ރައީސް ޖޯ ބައިޑަން ނިންމަވައި، އެ ކަން އިޢުލާނު ކުރައްވާފައި ވަނީ ޔަމަނުގައި ޙަރަކާތްތެރިވާ ހޫޘީ ޖަމާޢަތުން އެ ސަރަޙައްދުގައި ދަތުރުކުރާ އާގުބޯޓުތަކަށް ދެމުންދާ ޙަމަލަތައް ހުއްޓުވުމުގެ ނަމުގައެވެ.
ހޫޘީންގެ ޙަމަލަތައް އަމާޒު ކުރަމުން ދަނީ ޔަހޫދީންގެ މުދާ އުފުލާ އުޅަނދުފަހަރާއި، ޔަހޫދީންނާ ގުޅުން އޮތް އާގުބޯޓުތަކަށް ކަމުގައި އެ ޖަމާޢަތުން ބުނެއެވެ. ހޫޘީންގެ ޙަމަލަތައް ފަށާފައި ވަނީ، ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓައިލުމަށް ބާރު އެޅުމުގެ ގޮތުންނެވެ.
ހޫޘީންގެ ޙަމަލަތަކަށް ހުއްޓުމެއް ގެނައުމަށް ގުޅިފައިވާ މަނަވަރުގެ ލަޝްކަރެއް ރަތް ކަނޑަށް ފޮނުވާނެ ކަން ބައިޑަން އިޢުލާނު ކުރެއްވި ފަހުން ހަފުތާއެއްހާ ދުވަސް ފާއިތުވެފައިވާއިރު، މި ކަމަށް ތަރުޙީބެއް ލިބިފައެއް ނެތެވެ. މި ލަޝްކަރުގައި ހިމެނޭ ކަމަށް އެމެރިކާއިން އިޢުލާނު ކޮށްފައިވާ ޤައުމުތަކުގެ ލިސްޓުގައި ހިމެނޭ ދެ ޤައުމަކުން ވަނީ ފާޅުގައި އެ ކަމާ ދެކޮޅު ހަދާފައެވެ. އެއީ، ސްޕެއިންނާއި އިޓަލީވިލާތެވެ. އެ ދެ ޤައުމުން ވަނީ ބަޔާން ނެރެ ލަޝްކަރުގައި ބައިވެރިނުވާނެ ކަން ހާމަކޮށްފައެވެ.
އެމެރިކާގެ ލިސްޓުގައި 20 ޤައުމެއް ހިމެނޭ ކަން ފާހަގަ ކޮށްލަން ޖެހެއެވެ. ނަމަވެސް، އޮޕަރޭޝަން ޕްރޮސްޕެރިޓީ ގާޑިޔަންގެ ނަމުގައި އެމެރިކާއިން ފަށަން އުޅޭ ކެމްޕޭނުގައި ބައިވެރިވާނެ ކަމަށް އެމެރިކާއިން ބުނެފައިވާ ޤައުމުތަކުގެ ލިސްޓުގައި ހިމެނޭ ޤައުމުތަކުގެ ތެރެއިން ދެބައި ކުޅަ އެއްބައި ވެސް އެ ކަމަށް އެއްބަސްވެފައެއް ނުވެއެވެ.
އެމެރިކާގެ ދިފާޢީ އިދާރާ ޕެންޓެގަނުން ބުނީ، ލިސްޓުގައި ހިމެނޭ ހުރިހާ ޤައުމަކުން މަނަވަރުތައް ފޮނުވަން ހަމަޖެހިފައި ނުވާ ކަމުގައެވެ. އަދި، ބައެއް ޤައުމުތަކުން އެމެރިކާގެ އަސްކަރީ ޙަރަކާތުގައި ބައިވެރިވުމަށް ސިފައިން ފޮނުވާނެ ކަމުގައި ވެސް ޕެންޓެގަނުން ބުނެއެވެ.
ހޫޘީންގެ ޙަމަލަތައް ގުޅިފައި ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާނާއެވެ. އެހެންކަމުން، އެމެރިކާގެ އަސްކަރީ ޙަރަކާތުގައި ބައިވެރިވާ ޤައުމުތަކުން ދެކޮޅު ހަދަމުން މި ދަނީ، ޣައްޒާގެ ޢުދުވާނާ އެ ޤައުމުތަކުން ދެކޮޅުވުމުން ކަމަށް ބެލެވެއެވެ. ޔަހޫދީންގެ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު 21,000 އަށް އަރާފައިވާއިރު، ފާޅުގައި ޔަހޫދީންނަށް ހިތްވަރާއި އެއްބާރުލުން ދެމުންދާ ހަމައެކަނި ޤައުމަކީ މިހާރު އެމެރިކާ ކަން ފާހަގަ ކޮށްލަން ޖެހެއެވެ. ޔަހޫދީންގެ ޢުދުވާނާ ދެކޮޅު ކަން މުޅި ބައިނަލްއަޤުވާމީ މުޖުތަމަޢުން ދަނީ ހާމަ ކުރަމުންނެވެ.
ބައިނަލްއަޤުވާމީ މަސްރަޙު ދިރާސާ ކުރާ މީހެއް ކަމުގައިވާ ސްޕެއިންގެ ކޮމްޕްލޫތެންސެ ޔުނިވަރިސިޓީ އޮފް މަދްރިދްގެ ޕްރޮފެސަރ ދަވީދް ހަރްނާންދޭޒް ވިދާޅުވީ، ވިލާތުގެ ޤައުމުތަކުގެ ސަރުކާރުތަކުން އެމެރިކާގެ ލަޝްކަރުގައި ބައިވެރިވެއްޖެ ނަމަ، ކުރިއަށް އޮތް އިންތިޚާބުތަކުގައި އެ ޤައުމުގެ ވެރިންނަށް އެ ކަަމާ މެދު ޖަވާބުދާރީ ވާން ޖެހޭނެ ކަމުގައެވެ. އަދި، އެ މީހުންނަށް ގިނަ ޢަދަދެއްގެ ވޯޓުތަކެއް ގެއްލިދާނެ ކަމުގެ ބިރު އޮތް ކަމުގައެވެ.
ނަމަވެސް، އެމެރިކާއާ ގުޅިގެން އިނގިރޭސިވިލާތާއި ފަރަންސޭސިވިލާތުގެ އަސްކަރީ މަނަވަރުތަކުން މިހާރު ވެސް ދަނީ ރަތް ކަނޑުގެ ސަރަޙައްދުގައި ފޯރިމަރަމުންނެވެ. އެ ސަރަޙައްދުން ދަތުރުކުރާ އާގުބޯޓުފަހަރަށް އަމާޒުކޮށް ހޫޘީން ދީފައިވާ ބައެއް ޙަމަލަތައް ދިފާޢުކޮށްފައިވާނެ ކަމުގައި އެ ޤައުމުތަކުން ބުނެއެވެ. އާގުބޯޓުފަހަރުގެ އިތުރުން ޔަހޫދީންގެ ރަށްތަކަށް އަމާޒުކޮށް ވެސް ހޫޘީން ދަނީ ޑްރޯނާއި މިސައިލް ފަދަ ހަތިޔާރު ބޭނުން ކޮށްގެން ޙަމަލަ ދެމުންނެވެ.