ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އަންނަ އަހަރަށް 25 މިލިޔަން ރުފިޔާގެ ބަޖެޓެއް ކަނޑައަޅައި، ފާސްކޮށްފިއެވެ.
ވީއޭއެމުގެ އަހަރީ ބަޖެޓް ފާސްކޮށްފައިވަނީ މިދިޔަ ބުރާސްފަތި ދުވަހު ބޭއްވި އެ އެސޯސިއޭޝަނުގެ އަހަރީ އާންމު ޖަލްސާގައެވެ. ހެންވޭރު ބޯޅަގޭގައި ބޭއްވި މި ޖަލްސާގައި ވީއޭއެމުގެ ހިންގާ ކޮމިޓީގެ ހަ މެންބަރުންނާއި، ވޯޓުލެވޭ ފުރިހަމަ މެންބަރު 10 ކުލަބުގެ މަންދޫބުން ވަނީ ބައިވެރިވެފައެވެ. އަދި މި ޖަލްސާ ކުރިއަށް ގެންގޮސްފައިވަނީ މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި ސްޕޯޓްސް ކޮމިޝަން އަދި ސެންޓްރަލް އޭޝިއަން ޒޯނަލް ވޮލީބޯލް އެސޯސިއޭޝަން (ކާވާ) ގެ ފަރާތުން އޮބްޒާވަރުން ބައިވެރިކޮށްގެންނެވެ.
މި ބައްދަލުވުމުގައި ވަނީ އަންނަ އަހަރަށް ވީއޭއެމަށް 25 މިލިޔަން ރުފިޔާގެ ބަޖެޓެއް ފާސްކޮށްފައެވެ. މިއީ ވޮލީގެ ތާރީޚުގައި މިހާތަނަށް ފާސްކުރި އެންމެ ބޮޑު ބަޖެޓެވެ. އަދި މި ޖަލްސާގައި ވަނީ ވޮލީގެ ބައިނަލްއަގުވާމީ އަންހެން ދެ މުބާރާތް އަންނަ އަހަރު ރާއްޖޭގައި ބޭއްވުމަށްވެސް ފާސްކޮށްފައެވެ.
މީގެ އިތުރުން 2015 ވަނަ އަހަރު އެކުލަވާލި ވީއޭއެމުގެ އަސާސީ ގަވާއިދު އިސްލާހުކޮށް ފާސްކުރިއިރު, ދެން އެންމެ އަވަހަށް އޮންނަ އަހަރީ އާންމު ޖަލްސާގައި ހުސްވެފައި ހުރި މަގާމުތަކަށް ބޭފުޅުން އިންތިޚާބުކުރަންވެސް ވަނީ ފާސްކޮށްފައެވެ. އެގޮތުން އަންނަ އަހަރުގެ އަހަރީ އާންމު ޖަލްސާ މާޗު މަހުގެ 31 ވަނަ ދުވަހުގެ ކުރިން ބޭއްވުމަށްވެސް ވަނީ ނިންމާފައެވެ.
ބުރާސްފަތި ދުވަހު ވީއޭއެމުން އަހަރީ އާންމު ޖަލްސާ ބޭއްވިއިރު، މީގެ ކުރިން މިދިޔަ ނޮވެމްބަރު މަހުގެ ތިންވަނަ ދުވަހުވެސް ވީއޭއެމުގެ އަހަރީ އާންމު ޖަލްސާއެއް ވަނީ ބާއްވާފައެވެ. އެ ޖަލްސާގައި އެ އެސޯސިއޭޝަނުގެ އަސާސީ ގަވާއިދަށް ބަދަލުގެނެސް، 10 ދުވަހުގެ ތެރޭގައި ވީއޭއެމުގެ އައު އިންތިޚާބެއް ބާއްވަންވެސް ފާސްކުރިއެވެ. އެކަމަކު އެ މުއްދަތުގައި އިންތިޚާބު ބޭއްވިފައި ނުވާއިރު، އެ ޖަލްސާ ބަލައިނުގަންނަން ކޮމިޝަނަރ އޮފް ސްޕޯޓްސްއިން މީގެ ކުރިން ވަނީ ނިންމާފައެވެ.
ކުރީގެ އެކްޓިން ކޮމިޝަނާ އޮފް ސްޕޯޓްސް އައިޝަތު ސަމާހު ސޮއިކުރައްވާ ވީއޭއެމަށް އެ ފަހަރު ފޮނުވާފައިވާ ސިޓީގައި ވަނީ އެ ޖަލްސާ ބަލައިނުގަންނަން ނިންމި މައިގަނޑު ފަސް ކަމެއް ހާމަކޮށްދެއްވާފައެވެ. އޭގެ ތެރޭގައި ހިމެނެނީ ވީއޭއެމުގެ މެންބަރުން ކަނޑައެޅުމުގައި ދުނިޔޭގެ ވޮލީބޯޅަ ޖަމުއިއްޔާއިން އަމަލުކޮށްފައިވާ ގޮތާއި، ވީއޭއެމުން އަހަރީ އާންމު ޖަލްސާގައި އަމަލުކޮށްފައިވާ ގޮތުގެ އިތުރުން، ހިންގާ ކޮމިޓީގެ ދައުރާއި، އަހަރީ އާންމު ޖަލްސާ ބޭއްވުމުގެ އިތުރުން ފާސްކުރަން ހުށަހެޅި ހިންގާ ގަވާއިދުގައި ކުޅިވަރު ޖަމުއިއްޔާތައް ރަޖިސްޓްރީކޮށް ހިންގުމާ ބެހޭ ގަވާއިދާއި، އެސޯސިއޭޝަނުގެ ހިންގާ ގަވާއިދާ ޚިލާފު ކަންތައްތަކެވެ.
އެއާއެކު ވީއޭއެމުން އަހަރީ އާންމު ޖަލްސާއެއް އަލުން ބޭއްވިިއިރު، އެ އެސޯސިއޭޝަނުން މިދިޔަ އަހަރުތަކުގައި ގަވާއިދާ އެއްގޮތަށް އަހަރީ އާންމު ޖަލްސާ ބާއްވާފައެއް ނުވެއެވެ. އެއާއެކު ލިޔެކިޔުން ހަމަނުވެގެން އުވާލާން އިއުލާންކުރި ޖަމުއިއްޔާތަކުގެ ތެރޭގައިވެސް ވީއޭއެމް ހިމެނުނެވެ. ވީއޭއެމުގެ ރައީސް މުޙައްމަދު ރަނޭޝްގެ ދައުރު ހަމަވާނީ 2025 ވަނަ އަހަރުގެ މާޗު މަހުގެ 21 ވަނަ ދުވަހަށެވެ.