ރަތް ކަނޑުގައި ދަތުރުކުރަމުންދިޔަ ޔަހޫދީންގެ މުދާ އުފުލާ އާގުބޯޓަކަށް ޙަމަލާދީ ޔަހޫދީ ރަށްތަކަށް ޑްރޯން ޙަމަލާއެއް ފޮނުވައިފައިވާ ކަމަށް ޔަމަނުގައި ޙަރަކާތްތެރިވާ ހޫޘީ ޖަމާޢަތުން ބުނެފިއެވެ. އެ ޙަމަލާ ދީފައި ވަނީ ޔަހޫދީ ފައުޖުތަކާއި ފަލަސްޠީނުގެ ޣައްޒާގެ ވެރިކަން ކުރާ ޙަމާސް ޖަމާޢަތާ ދެމެދު ހިނގަމުންދާ ހަނގުރާމައިގައި ފަލަސްޠީނަށް ތާއީދު ކުރުމުގެ ގޮތުންނެވެ.
ޙޫޘީން ނެރުނު ބަޔާނެއްގައި ބުނެފައި ވަނީ އެމްއެސްސީ ޔުނައިޓެޑްގެ ނަމަކަށް ކިޔާ ޔަހޫދީންގެ އާގު ބޯޓަކަށް ޙަމަލާދީ، ޔަހޫދީ ދަޢުލަތުގެ ދެކުނުގެ ރަށްތަކަށް އަމާޒުކޮށް ޑްރޯން ޙަމަލާތަކެއް ދީފައިވާނެ ކަމަށެވެ. ޔަހޫދީ ދަޢުލަތުގެ ދެކުނަށް ދިން ޑްރޯން ޙަމަލާއާ ގުޅިގެން އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް އިން ބުނެފައި ވަނީ ޔަމަނުގެ ހުޅަނގު އައްސޭރީގައި އޮންނަ ހުދައިދާ ބަނދަރު ކައިރިން ގޮވުންތަކެއްގެ އަޑު އިވިފައިވާ ކަމަށެވެ. މިޞްރުގެ ސައިނާގެ އައްސޭރިފަށުން ވެސް ގޮވުންތަކުގެ އަޑު އިވިފައިވާ ކަމަށް މިޞްރުގެ މީޑީއާތަކުން ވަނީ ބުނެފައެވެ.
މިޞްރުގެ ޖާސޫސީ އިދާރާއާ ގުޅުން އޮންނަ އަލް ޤާހީރާ ޓީވީން ބުނެފައި ވަނީ އެ ގޮވުންތައް ގޮވައިފައި ވަނީ މިޞްރުގެ ދަހަބުން ގާތްގަނޑަކަށް ދެ ކިލޯމީޓަރު ދުރުން ކަމަށެވެ. ދަހަބު އޮންނަނީ ޔަހޫދީ ދަޢުލަތުގެ ދެކުނުން ގާތްގަނޑަކަށް 125 ކިލޯމީޓަރު ދުރުގައެވެ. ޙޫޘީންގެ އެ ޙަމަލާގައި އެއްވެސް މީހަކަށް ގެއްލުންވީ ކަމަކަށް ރިޕޯޓުކޮށްފައެއްނުވެއެވެ.
އެމެރިކާގެ އަސްކަރީ މަރުކަޒު ޕެންޓަގަން އިން ބުނާ ގޮތުގައި ޙޫޘީން ވަނީ 35 އަށްވުރެ ގިނަ ޤައުމުގެ 10 އާގުބޯޓަށް އަމާޒުކޮށް 100 އަށްވުރެ ގިނަ ޑްރޯން އަދި މިސައިލް ޙަމަލާ ދީފައެވެ. ރަތް ކަނޑުން ޔަހޫދީންގެ ރަށްތަކަށް ދަތުރުކުރާ ކޮންމެ ބޯޓަކަށްވެސް ޙަމަލާދޭނެ ކަމަށް ޙޫޘީން ވަނީ ބުނެފައެވެ.