ސޫރިޔާގެ ވެރި ރަށް ދިމިޝްޤުގެ ރަށް ބޭރަށް ޔަހޫދީ އަސްކަރިއްޔާއިން ދިން ވައިގެ ޙަމަލާއެއްގައި އީރާނުގެ އިންޤިލާބީ ލަޝްކަރުގެ އިސް މުޝީރެއް ކަމަށްވާ ސައްޔިދު ރަވީ މޫސަވީ ޝަހީދުކޮށްލައިފިއެވެ.
މޫސަވީއަކީ އީރާނާއި ސޫރިޔާގެ އަސްކަރީ އިއްތިޙާދު ގުޅުވައިދިނުމުގެ މަސައްކަތް ކުރައްވަމުން އައި ބޭފުޅެކެވެ. މޫސަވީއަކީ އިންޤިލާބީ ލަޝްކަރުގެ އެންމެ ދުވަސްވީ އެއް މުޝީރު ވެސްމެއެވެ.
މޫސާވީއަކީ އެމެރިކާއިން 2020 ވަނަ އަހަރު ޢިރާގުގެ ވެރިރަށް ބަޣްދާދަށް ދިން ޑްރޯން ޙަމަލާއެއްގައި ޝަހީދުކޮށްލި އީރާންގެ އިންޤިލާބީ ލަޝްކަރުގެ ޖެނެރަލް ޤަސަމް ސުލައިމާނީއާ ވަރަށް ގާތް ގުޅުމެއް ބޭއްވެވި ބޭފުޅެކެވެ. އެމެރިކާގެ ޙަމަލާއެއްގައި ސުލައިމާނީ ޝަހީދުވުމާ ހަމައަށް އޭނާ ހުންނެވީ އިންޤިލާބީ ލަޝްކަރުގެ ޤުދުސް ފޯސްގެ ކޮމާންޑަރެއްގެ ގޮތުގައެވެ. ސުލައިމާނީވެފައި ވަނީ އީރާންގައި ވަރަށް ނުފޫޒު ގަދަ ބޭފުޅަކަށެވެ.
ސޫރިޔާ ހަނގުރާމައިގައި އެ ޤައުމުގެ ސަރުކާރަށް ތާއީދު ކުރުމަށް ޢިރާޤާއި އަފްޣާނިސްތާނާއި ޕާކިސްތާނުން އެތައް ހާސް ހަނގުރާމަވެރިންނެއް ތަމްރީނުކޮށް ހަނގުރާމައިގައި އެހީތެރިވުމަށް މުޝީރުންގެ ގޮތުގައި އެތައް ސަތޭކަ ބަޔަކު އީރާނުން ވަނީ ސޫރިޔާއަށް ފޮނުވައިފައެވެ. ލުބުނާނުގެ ހިޒްބުاللهގެ ހަނގުރާމަވެރިން ވެސް ވަނީ ސޫރިޔާގައި ތިބި އީރާނުގެ އަސްކަރީ ކޮމާންޑަރުންނާ ވަރަށް ގާތުން މަސައްކަތްކޮށްފައެވެ.
ޔަހޫދީ އަސްކަރިއްޔާއިން ސޫރިޔާއަށް ޙަމަލާދީ އީރާނުގެ އިންޤިލާބީ ލަޝްކަރުގެ އިސް މުޝީރެއް ޝަހީދުކޮށްލީ ޣައްޒާގައި ވެރިކަންކުރާ ހަމާސް ޖަމާޢަތާއި ޔަމަނުގެ ޙޫޘީ ޖަމާޢަތުން ޔަހޫދީންނާ ދެކޮޅަށް ދެމުންދާ ޙަމަލާތަކުގެ ފަހަތުގައި އޮތީ އީރާނު ކަމަށް ޔަހޫދީންނާއި ހުޅަނގުން ތުޙުމަތުކުރަމުންދާ ދަނޑިވަޅެއްގައެވެ.