ޣައްޒާގެ ވެރިކަން ދޫކޮށްލަން ޙަމާސް ޖަމާޢަތާއި އިސްލާމިކް ޖިހާދުން ދެކޮޅު ހަދައިފިއެވެ. ޣައްޒާގެ ވެރިކަން ދޫކޮށްލަން ޙަމާސް ޖަމާޢަތަށް ހުށަހަޅާފައި ވަނީ، ޔަހޫދީން ހިންގަމުންދާ ލާއިންސާނީ ޢުދުވާން ހުއްޓައިލުމާ ގުޅޭ ގޮތުން މިޞްރުގައި ކުރަމުންދާ މަޝްވަރާތަކުގެ ތެރެއިންނެވެ. ޙަމާސް ޖަމާޢަތުން ޣައްޒާގެ ވެރިކަން ދޫކޮށްލުމަކީ މިޞްރުން ހުށަހަޅާފައިވާ ޞުލްޙައިގެ އެއްބަސްވުމުގައިވާ އެއް ޝަރުޠެވެ.
މިޞްރުގެ ހުށަހެޅުން އެކުލަވައިލާފައި ވަނީ ޤަޠަރުގެ ބައިވެރިވުމާ އެކުގައެވެ. ނަމަވެސް، ޙަމާސް ޖަމާޢަތުން ރަހީނު ކޮށްފައިވާ ޔަހޫދީން މިނިވަން ކުރުމުގެ އިތުރުން އެއްވެސް ކަމެއް ކުރަން އެ ޖަމާޢަތުން އެއްބަހެއް ނޫނެވެ. މިޞްރުގެ ހުށަހެޅުމުގައި އޮތީ، ޙަމާސް ޖަމާޢަތުން ޣައްޒާގެ ވެރިކަން ދޫކޮށްލައި އަސީރުން މިނިވަން ކުރުމުން، ޔަހޫދީންގެ ޢުދުވާން ހުއްޓައިލުމަށެވެ. އަދި، ޣައްޒާގައި އައު ސަރުކާރެއް އެކުލަވައިލުމަށެވެ.
ޙަމާސާއި އިސްލާމިކް ޖިހާދުގެ ބެލުމުގެ ދަށުގައި އަދިވެސް 100 އެއްހާ އަސީރުން ތިބިއިރު، މިޞްރުން ބުނީ އެ ޤައުމުގެ ހުށަހެޅުމަށް އެއްބަސްވެއްޖެ ނަމަ، ޣައްޒާގައި އަލުން އިންތިޚާބެއް ބޭއްވުމަށާއި، ޙަމާސްގެ މެންބަރުންގެ މައްޗަށް ދަޢުވާ ނުއުފުލާނެ ކަމުގެ ޔަގީން ކަން އަރުވާ ކަމުގައެވެ. ނަމަވެސް، މިއީ ޙަމާސުން ބޭނުންވާ ގޮތެއް ނޫނެވެ. ޣައްޒާގެ އައު ސަރުކާރު އެކުލަވައިލެވޭނީ ހުޅަނގު އައްސޭރީގައި ވެރިކަން ކުރާ ޕަލަސްޓީނިޔަން އޮތޯރިޓީއާއި ޙަމާސާ ދެމެދު ކުރާ މަޝްވަރާތަކެއްގެ މަތިންނެވެ.
"ޙަމާސުން މަސައްކަތް ކުރަމުން މި ދަނީ ޔަހޫދީންގެ ނުބައި ރޭވުންތެރި ކަމާއި ވަކިތަކުން ޣައްޒާގެ މުސްލިމުން ސަލާމަތް ކުރަން. ޔަހޫދީންގެ ލާއިންސާނީ ޢުދުވާނާއި ޤަތުލުޢާންމު ހުއްޓުވަން. އަދި، ޣައްޒާގައި ހާލުގައި ޖެހިފައިވާ މީހުންނަށް އިންސާނީ އެހީގެ ސާމާނު ފޯރުކޮށްދިނުން އަވަސް ކުރުވަން. އެ ކަން މިޞްރުގެ އޮފިޝަލުންނަށް ހުށަހަޅާފައި ވާނެ. އަސީރުން މިނިވަން ކުރުމާ ގުޅޭ ގޮތުން ވާހަކަ ދެއްކޭނީ ޢުދުވާން ހުއްޓައިލާ އެހީ ވައްދަން ފެށުމަށް ފަހު،" އެ ޖަމާޢަތުގެ އިސް އޮފިޝަލަކު ވިދާޅުވިއެވެ.
އިސްލާމިކް ޖިހާދުން ބުނީ، ޔަހޫދީ އަސީރުން މިނިވަން ކުރެވޭނީ ޔަހޫދީ ފައުޖުން ހައްޔަރުކޮށް ޖަލަށްލާފައިވާ ފަލަސްޠީނުގެ ހުރިހާ ރައްޔިތުން މިނިވަން ކުރަން އެއްބަސްވުމުން ކަމުގައެވެ. އޮކްޓޫބަރު 7 ވަނަ ދުވަހު ޔަހޫދީންގެ ޢުދުވާން ފެށުމުގެ ކުރިން ޔަހޫދީންގެ ޖަލުތަކުގައި ތިބި ފަލަސްޠީން ރައްޔިތުންގެ ޢަދަދު 5,250 އަށް އަރައެވެ. ނަމަވެސް، މިހާރު އެ ޢަދަދު 10,000 އަށްވުރެ އިތުރުވާނެ ކަމުގައި ޕަލަސްޓީނިޔަން ޕްރިޒަނަރސް އެސޯސިއޭޝަނުން ބުނެއެވެ.
މިޞްރުގެ ހުށަހެޅުން ޙަމާސާއި އިސްލާމިކް ޖިހާދުގެ އިތުރުން ޔަހޫދީންނާއި އެމެރިކާއާއި ވިލާތުގެ އިއްތިހާދަށް ވެސް ވަނީ ހިއްސާ ކޮށްފައެވެ. ޔަހޫދީންގެ ހަނގުރާމައިގެ ކެބިނެޓުން މިހާރު ދަނީ މިޞްރުގެ ހުށަހެޅުން ދިރާސާ ކުރަމުންނެވެ. މި ހުށަހެޅުމުގެ ފުރަތަމަ މަރުޙަލާގައި އޮތީ ޙަމާސްގެ އަތްދަށުގައިވާ އަަސީރުންގެ ތެރޭގައި ހިމެނޭ ޢާންމު ރައްޔިތުން މިނިވަން ކުރުމެވެ. އެ ކަން ކުރުމަށް ދީފައިވާ 7 ދުވަހާއި 10 ދުވަހުގެ މުއްދަތުގެ ތެރޭގައި ޔަހޫދީންގެ ޢުދުވާންތައް މެދުކަނޑައިލާނެއެވެ. އަދި، ޙަމާސުން މިނިވަން ކުރާ ކޮންމެ އަސީރެއްގެ ބަދަލުގައި ވަކި ޢަދަދަކަށް ފަލަސްޠީން ރައްޔިތުން ވެސް އިސްރާއީލުން ދޫކޮށްލާނެއެވެ.
ހުށަހެޅުމުގެ ދެވަނަ މަރުޙަލާގެ ދަށުން އަސީރުންގެ ތެރޭގައި ހިމެނޭ ޔަހޫދީ ފައުޖުގެ އަންހެން ސިފައިން ޙަމާސުން މިނިވަން ކުރާނެއެވެ. އޭގެ ބަދަލުގައި ޔަހޫދީންގެ ޖަލުތަކުން ފަލަސްޠީނުގެ ރައްޔިތުން ދޫކޮށްލާނެއެވެ. ހުށަހެޅުމުގެ ފަހު މަރުޙަލާގެ ދަށުން، ޔަހޫދީންގެ ޢުދުވާން ދާއިމަށް ހުއްޓައިލުމާ ގުޅޭ ގޮތުން ދެ ފަރާތުގެ ދެމެދުގައި މަޝްވަރާތައް ވިލަރެސް ކުރެވޭނެއެވެ. މަސް ދުވަހަށް ރާވާފައިވާ މި މަރުޙަލާގައި ވެސް އިސްރާއީލުގެ ޖަލުތަކުގައި ހައްޔަރު ކޮށްފައިވާ ފަލަސްޠީނުގެ ގިނަ ޢަދަދެއްގެ ރައްޔިތުން މިނިވަން ކުރަން ޖެހޭނެ ކަމުގައި މިޞްރުން ބުނެއެވެ.