ރާއްޖޭގެ ބިލިއާޑުގެ ތާރީޚުގައި ވޭތުވެދިޔަ 16 އަހަރުގެ ތެރެއިން މި އަހަރަކީ އެންމެ ކާމިޔާބު އަހަރު ކަމަށް މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) ގެ ރައީސް އަޙްމަދު ނާސިފް ވިދާޅުވެއްޖެއެވެ.
ޕީއެސްއެމުން ގެނެސްދިން "ސާބަސް" ޕްރޮގްރާމުގައި ވާހަކަފުޅު ދައްކަވަމުން ނާސިފް ވަނީ މި އަހަރު އެސޯސިއޭޝަނުން ރާއްޖޭގައި ބިލިއާޑް ފުޅާކުރުމަށް ކުރި މަސައްކަތްތަކާއި ހާސިލުކުރެވުނު ކަންކަން ހިއްސާކޮށްފައެވެ.
މި އަހަރު ރާއްޖޭގައި ވަނީ ބިލިއާޑުގެ ގިނަ މުބާރާތްތަކެއް ބާއްވާފައެވެ. އެގޮތުން ވޯލްޑް ޕޫލް ބިލިއާޑް އެސޯސިއޭޝަން (ޑަބްލިޔުޕީއޭ) އާއި އޭޝިއަން ކޮންފެޑެރޭޝަން އޮފް ބިލިއާޑް ސްޕޯޓްސް (އޭސީބީއެސް) ގެ އެހީތެރިކަމާއެކު މޯލްޑިވްސް އޯޕަން 2023 - 10 ބޯލް ޗެމްޕިއަންޝިޕުގެ ނަމުގައި ބައިނަލްއަޤްވާމީ މުބާރާތެއް ވަނީ ބާއްވާފައެވެ. މިއީ ދުނިޔޭގެ ބިލިއާޑް ރޭންކިންގެ ބޮޑު މުބާރާތެއް ރާއްޖޭގައި ޖެހިޖެހިގެން ބޭއްވި ދެވަނަ ފަހަރެވެ.
މީގެ އިތުރުން ގައުމީ ޓީމަށް ބިދޭސީ ކޯޗެއް ހަމަޖައްސައި، ޓީމުގެ ފަރިތަކުރުންތަކެއް ކުރިއަށްދިޔައެވެ. އަދި ދުނިޔޭގެ ރޭންކިންގެ ގިނަ އަދަދެއްގެ ޗެމްޕިއަނުން ރާއްޖޭގައި ބޭއްވި ބައިނަލްއަގުވާމީ މުބާރާތުގައި ވާދަކޮށްފައިވެއެވެ.
ނާސިފް ވިދާޅުވީ މި އަހަރުގެ ތެރޭގައި ޔޫތު ޑިވެލޮޕްމަންޓް ޕްރޮގްރާމް (ވައިޑީޕީ) ގެ ހަރަކާތްތައް ފެށި ކަމަށާއި، އަތޮޅުތެރޭގައި ބިލިއާޑުގެ ހަރަކާތްތައް ފުޅާކުރުމަށް ފެސިލިޓީ ގާއިމުކުރުމުގެ މަސައްކަތްތަކެއް ކުރި ކަމަށެވެ. އަދި މި ވޭތުވެދިޔަ ދެ އަަހަރު ގިނަ މަސައްކަތްތަކެއް ކޮށްފައިވާކަން ފާހަގަކުރައްވައި ނާސިފް ވިދާޅުވީ ބޭނުންވަނީ ބިލިއާޑް އެސޯސިއޭޝަނުގެ ހިންގުމުގެ ނިޒާމަކީ ރާއްޖޭގެ އެހެން ކުޅިވަރު އެސޯސިއޭޝަންތަކަށް މިސާލެއްގެ ގޮތުގައި ދެއްކުން ކަމަށެވެ.
އަދި ވޭތުވެދިޔަ އަހަރުތަކުގައި ކުރި މަސައްކަތްތަކާއެކު މިހާރު އަމާޒަކީ އަންނަ އަހަރު އިތުރު ހަރުފަތަކަށް ރާއްޖޭގެ ބިލިއާޑް ގެންދިއުން ކަމަށްވެސް ނާސިފް ވިދާޅުވިއެވެ.
ބިލިއާޑުގެ ބައިނަލްއަގުވާމީ މުބާރާތްތައް ރާއްޖޭގައި ބާއްވާއިރު، މި ކުޅިވަރުގައި ހަރަކާތްތެރިވާ ކުޅުންތެރިންގެ އަދަދު ދަނީ އަހަރަކަށް ފަހު އަހަރެއް އިތުރުވަމުންނެވެ. އަދި ހުނަރުވެރި މޮޅެތި ކުޅުންތެރިންތަކެއް ދަނީ ފާހަގަވަމުންނެވެ.