ރަޝިޔާ-ޔޫކްރެއިން ހަނގުރާމައަށް 22 މަސް ފާއިތުވެފައިވާއިރު ޔޫކްރެއިންގެ ރަށްތަކަށް ޙަމަލަދޭން ރަޝިޔާއިން މިހާތަނަށް 7,400 މިސައިލާއި 3,700 ޑްރޯން ބޭނުން ކޮށްފައިވާ ކަމުގައި ކީވުން ބުނެފިއެވެ. ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ހަނގުރާމައި މިހާތަނަށް ބޭނުން ކޮށްފައިވާ މިސައިލާގެ ޑްރޯންގެ ޢަދަދުތަކުން ހާމަވަނީ ޔޫކްރެއިންގެ ރަށްތަކަށް އަމާޒުކޮށް ރަޝިޔާއިން ހިންގަމުންދާ ވައިގެ ކެމްޕޭނުގެ ބޮޑު ކަމާއި ފުޅާ ކަމެވެ.
ޔޫކްރެއިންގެ އަސްކަރިއްޔާއިން ބުނީ، އެ ޤައުމުގެ ރަށްތަކަށް އަމާޒުކޮށް ރަޝިޔާއިން 7,400 މިސައިލް ޙަމަލަ ދިފައިވީ ނަމަވެސް، އޭގެ ތެރެއިން 1,600 އެއްހާ މިސައިލް ދިފާޢުކޮށްފައިވާ ކަމުގައެވެ. އަދި، 3,700 ޑްރޯންގެ ތެރެއިން 2,900 އަށްވުރެ ގިނަ ޑްރޯން ދިފާޢުކޮށް ވައްޓައިލާފައިވާ ކަމުގައެވެ. ޔޫކްރެއިންގެ ވައިގެ ސިފައިން ތަރުޖަމާނު ޔޫރީ އިހްނާތް ވިދާޅުވީ، ޔޫކްރެއިންގެ މިނިވަން ކަމާއި ސިޔާދަތު ހިމާޔަތް ކުރުމަށް ޓަކައި ރަޝިޔާގެ އިސްތިޢުމާރީ ބާރާ ދެކޮޅަށް ވައިގެ ސިފައިން ހިތްވަރާ އެކު ހަނގުރާމަ ކުރަމުންދާ ކަމުގައެވެ.
ޔޫކްރެއިނަށް ޙަމަލަދޭން ރަޝިޔާއިން ބޭނުންކޮށްފައިވާ މިސައިލްތަކުގެ ތެރޭގައި ގިނައީ 'ސުޕަރސޮނިކް' ދުވެލީގެ ބެލިސްޓިކް މިސައިލެވެ. އެއީ، އަޑަށްވުރެ ބާރަށް ދަތުރު ކުރުމުގެ ގާބިލު ކަން ލިބިފައިވާ މިސައިލްތަކެކެވެ. އިހްނާތް ވިދާޅުވީ، އެ ފަދަ މިސައިލްތައް ދިފާޢުކޮށް ވައްޓައިލުމަކީ ވަރަށް ދަތި ކަމެއް ކަމުގައެވެ. އަދި، އެ ފަދަ މިސައިލްތަކުން ދިފާޢުވުމަށް 'ޕެޓްރިއަޓް' މަރުކާގެ ވައިގެ ދިފާޢީ ނިޒާމު ބޭނުން ކުރަން ފަށާފައިވީ ނަމަވެސް، އެމެރިކާއިން އެ މަރުކާގެ ދިފާޢީ ނިޒާމު ޔޫކްރެއިނަށް ފޯރުކޮށްދީފައި ވަނީ ހަނގުރާމަ ފެށިތާ އެތަކެއް މަހެއް ފާއިތުވި ފަހުން ކަމުގައި ވެސް އޭނާ ވިދާޅުވިއެވެ.
ޔޫކްރެއިނުން ބުނީ، އީރާނުގައި އުފައްދާފައިވާ 'ޝާހިދް' މަރުކާގެ އަސްކަރީ ޑްރޯން ބޭނުން ކުރުން ރަޝިޔާއިން އިތުރު ކޮށްފައިވާ ކަމުގައެވެ. ނަމަވެސް، އެއީ ދިފާޢުކޮށް ވައްޓައިލަން ފަސޭހަ ޑްރޯނެކެވެ. ޔޫކްރެއިނުން ބުނީ، ރަޝިޔާގެ ގިނަ ޑްރޯން ޙަމަލަތައް އަމާޒު ކޮށްފައި ވަނީ ޢާންމުންނަށް ޒަރޫރީ ޚިދުމަތްތައް ދިނުމަށް ބޭނުން ކުރާ ވަސީލަތްތަކަށް ކަމުގައެވެ.
ރަޝިޔާއިން ވެސް ވަނީ، ޔޫކްރެއިންގެ ކަރަންޓާއި ފެނުގެ ވިއުގައަށް ޙަމަލަތައް އަމާޒު ކޮށްފައިވާ ކަމަށް އެއްބަސްވެފައެވެ. އެ ތަންތަނަށް ރަޝިޔާގެ ޙަމަލަތައް އަމާޒު ކުރަން ފަށާފައި ވަނީ 2022 ވަނަ އަހަރުގެ ސެޕްޓެންބަރު މަހަށް ފަހުއެވެ. ނަމަވެސް، ޔޫކްރެއިނުން ތުހުމަތު ކުރާ ގޮތަށް، ޢާންމުން ދިރިއުޅޭ އެއްވެސް ޢިމާރާތަކަށް ޙަމަލަތައް އަމާޒު ނުކުރާ ކަމަށް ރަޝިޔާއިން ބުނެއެވެ.
"ރަޝިޔާއިން ކޮންމެ ދުވަހަކު ވެސް ޔޫކްރެއިންގެ 10 ނުވަތަ 15 ރަށަކަށް އަމާޒުކޮށް ޑްރޯން ޙަމަލަ ދޭ،" އިހްނާތް ވިދާޅުވިއެވެ. އީރާނުގެ ޝާހިދު މަރުކާގެ ޑްރޯންތައް މިހާރު ރަޝިޔާގައި ވެސް އުފައްދަން ފަށާފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އަދި، ހުޅަނގުގެ ބައެއް މީޑިޔާތަކުން ވަނީ މި ކަމާ ގުޅޭ ހެކިތައް ވެސް ހާމަކޮށްފައެވެ.