ފޮޓޯ: ނެޝަނަލް ގްރޯން ޕްރީ 2023

މި މުބާރާތުގެ ފިރިހެން ބައިގެ އެއްވަނަ ފަޒީލަށް ލިބުނީ އޭނާ ވާދަކުރި އިވެންޓުތަކުގެ ތެރެއިން 3000 މީޓަރު ދުވުމުން ޤައުމީ ރިކޯޑަކާއެކު އެވެ. މި ރިކޯޑު މީގެ ކުރިންވެސް އޮތީ ފަޒީލް އަތުގައެވެ. އެއީ 9 މިނެޓު 02:57 ސިކުންތުން ދުވުން ނިންމައިގެންނެވެ. މި އަހަރުގެ ގްރޯން ޕްރީގައި ވާދަކޮށް ފަޒީލް ޤައުމީ ރިކޯޑު އައުކުރީ 8 މިނެޓު 55.87 ސިކުންތުންއިން ނިންމައިގެންނެވެ.

އެންމެ މޮޅު އަންހެން އެތުލީޓުގެ މަޤާމު ފަސޫހާއަށް ލިބުނީ ޖުމްލަ ދެ ޤައުމީ ރިކޯޑަކާއެކު އެވެ. ފަސޫހާ ވަނީ މުބާރާތުގެ ފުރަތަމަ ދުވަހު ރާއްޖޭގެ އަންހެނުންގެ 1500 މީޓަރު ދުވުމުގެ ގައުމީ ރިކޯޑް މުގުރާލައެވެ. ގްރޯން ޕްރީގެ 1500 މީޓަރު ރޭސް ފަސޫހާ ނިންމީ ފަސް މިނެޓު 4.02 ސިކުންތުންނެވެ. މި ރިކޯޑު މީގެ ކުރިން އޮތީ އައިޝަތު ޖާއިޝާ ޖުނީޒްގެ އަތުގައެވެ.

ފަސޫހާ ވަނީ މުބާރާތުގެ ދެވަނަ ދުވަހު އަންހެނުންގެ 800 މީޓަރު ދުވުމުން އެއްވަނަ ހޯދާ ޤައުމީ ރިކޯޑާއި މީޓު ރިކޯޑު އައުކޮށްފައެވެ. މީޓް ރިކޯޑު މީގެކުރިން އޮތީ އާމިނަތު ޖައިޝާ ޖުނީޒްގެ އަތުގައެވެ. އެއީ ދެ މިނެޓު 28.97 ސިކުންތުން ނިންމައިގެންނެވެ. މި އަހަރުގެ ގްރޯން ޕްރީގައި ވާދަކޮށް ފަސޫހާ މި ރިކޯޑު މުގުރާލީ ދެ މިނެޓު 19.73 ސިކުންތުން ނިންމައިގެންނެވެ. 800 މީޓަރު ދުވުމުގެ ޤައުމީ ރިކޯޑު މީގެކުރިން އޮތީ ފަސޫހާ އަތުގައެވެ. އެއީ ދެ މިނެޓު 20.66 ސިކުންތުން ނިންމައިގެންނެވެ.