ޔަހޫދީ ފައުޖުން އެއްގަމު މަގުން ޣައްޒާއަށް އަރައި ހިންގަމުންދާ ލާއިންސާނީ ޢުދުވާން އިތުރަށް ފުޅާ ކުރަން ފަށައިފިއެވެ. ޔަހޫދީ ފައުުޖުން ބަރުހަތިޔާރާ އެކު އެންމެ ފުރަަތަމަ އަރާފައި ވަނީ ޣައްޒާގެ އުތުރުގައިވާ ސަރަޙައްދުތަކަށެވެ. އެ ސަރަޙައްދު ސުންނާފަތި ކޮށްލުމަށް ފަހު، މިހާރު ޔަހޫދީ ފައުޖުން ދަނީ ޣައްޒާާގެ މެދުތެރޭގައިވާ ރަށްތަކަށް އެއްގަމު މަގުން އަރަމުންނެވެ. ޔަހޫދީ ފައުޖުގެ އަސްކަރީ ޓޭންކުފަހަރާއި ބަރުހަތިޔާރު ދަނީ އެ ދިމާލަށް ދަތުރު ކުރަމުންނެވެ.
ޣައްޒާގެ މެދުތެރޭގައިވާ ރަށްތަކަށް އަރައި ޢުދުވާންތައް ފުޅާ ކުރަން ޔަހޫދީ ފައުޖުން މަސައްކަތް ފަށާފައި ވަނީ، ޢުދުވާންތައް ހުއްޓުމަކަށް ގެނައުމާ ގުޅޭ ގޮތުން މިޞްރުގައި މަޝްވަރާތައް ކުރިއަށްދާ ދަނޑިވަޅެއްގައެވެ. އަދި، މަޝްވަރާތައް ފޭލުވެދާނެ ކަމަށް ބެލެވެން ފަށާފައިވާ ދަނޑިވަޅެއްގައެވެ.
ޣައްޒާގެ މެދުތެރޭގައި އޮންނަ އަލް-ބުރެއިޖު ހުސްކޮށް، ޣައްޒާގެ ދެކުނުގައިވާ ސަރަޙައްދުތަކަށް ބަދަލުވުމަށް އެ ރަށުގެ ރައްޔިތުންނަށް ޔަހޫދީ ފައުޖުން ވަނީ އަންގާފައެވެ. މިއީ، އެ ރަަށަށް އެރުމަށް ތައްޔާރުވުމުގެ ގޮތުން ދީފައިވާ އިންޒާރެއް ކަމަށް ބެލެވެއެވެ. ޔަހޫދީ ފައުޖުން އާޓިލަރީ ބަޑިއާއި އަސްކަރީ ޓޭންކުފަހަރު ބޭނުންކޮށްގެން އަލް-ބުރެއިޖަށް މިހާރު ވެސް ޙަމަލަދޭން ފަށާފައިވާ ކަމުގައި އެ ރަށުގެ ރައްޔިތުން ބުނެއެވެ. މީގެ ކުރިން ވެސް އަލް-ބުރެއިޖަށް އަރަން ޔަހޫދީ ފައުޖުން މަސައްކަތް ކޮށްފައިވެއެވެ. ނަމަވެސް، ޙަމާސްގެ މުޖާހިދުން ވަނީ އެ މީހުންނާ ކުރިމަތިލާފައެވެ.
ޣައްޒާގެ ޝިހާބް މީޑިޔާއިން ބުނީ ޣައްޒާގެ އުތުރުގައިވާ ރަށްތަކުގައި ވެސް ޔަހޫދީ ފައުޖުން ރަޙުމު ކުޑަ ޢުދުވާންތަކެއް ހިންގަމުންދާ ކަމުގައެވެ. މި ގޮތުން، ޖަބާލިޔާ އަލް-ބަލަދާއި ޖަބާލިިޔާ ރެފިއުޖީ ކޭމްޕުގައި ޔަހޫދީ ފައުޖުން ވަރުގަދަ ޢުދުވާންތަކެއް ހިންގަމުންދާ ކަމުގައި އެ މީޑިޔާއިން ރިޕޯޓު ކުރެއެވެ. މީގެ އިތުރުން، ޣައްޒާގެ ދެކުނުގައި އޮންނަ ޚާން ޔޫނިސާއި ރަފަޙަށް ވެސް ޔަހޫދީ ފައުޖުގެ އަސްކަރީ މަތިންދާބޯޓުތަކުން ދަނީ މެދުކެނޑުމެއް ނެތި ބޮން އަޅަމުންނެވެ.
މި ޢުދުވާނާ ގުޅިގެން، އެހެން ސަރަޙައްދުތަކަށް ވެސް ވަނީ ހަމަނުޖެހުންތައް ފެތުރިފައެވެ. ލުބްނާނުގައި ހަރަކާތްތެރިވާ ޙިޒްބުالله ޖަމާޢަތާއި ޔަމަނުގައި ހަރަކާތްތެރިވާ ހޫޘީން ވެސް ވަނީ ޔަހޫދީންނާ ދެކޮޅަށް އަސްކަރީ ހަރަކާތްތައް ފަށާފައެވެ. އެ ދެ ޖަމާޢަތަކީ ވެސް އީރާނުން ވާގިވެރިވާ ޖަމާޢަތްތަކެއް ކަމަށް ތުހުމަތު ކުރެވެއެވެ. ހޫޠީން ދަނީ ރަތް ކަނޑުން އިސްރާޢީލަށް މުދާ ގެންދާ އާގުބޯޓު ފަހަރަށް އަމާޒުކޮށް ވަރުގަދަ ޙަމަލަތަކެއް ދެމުންނެވެ. މި ޙަމަލަތައް ހުއްޓުވަން އެމެރިކާއިން އިސްނަގައިގެން އަސްކަރީ މަނަވަރުތަކެއް އެ ސަރަޙައްދަށް ފޮނުވަން މިހާރު ދަނީ މަސައްކަތް ކުރަމުންނެވެ.
މީގެ އިތުރުން، ހުޅަނގު އައްސޭރިއަށް އަރައި ވެސް ޔަހޫދީ ފައުޖުން ގެންދަނީ ޢުދުވާންތައް ހިންގަމުންނެވެ. ބައިތުލްމަޤްދިސްގައި ހުންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތް ކަމުގައިވާ މަސްޖިދުލްއަޤްޞާއަށް ފަލަސްޠީނުގެ އަންހެނުންނާއި އުމުރުން ދުވަސްވީ މީހުންނަށް ޔަހޫދީ ސިފައިން ދަނީ ހުރަސް އަޅަމުންނެވެ. އެ ކަން ހުއްޓުވަން ހުކުރު ދުވަހުގެ ހުކުރު ނަމާދަށް ފަހު ގިނަ ޢަދަދެއްގެ ބަަޔަކު މަސްޖިދުލްއަޤްޞާ ކައިރިއަށް އެއްވެފައިވާ ކަން ފާހަގަ ކޮށްލަން ޖެހެއެވެ. ޔަހޫދީ ފައުޖުން ވަނީ އެ މީހުންނާ ކުރިމަތިލައި، ކަރުނަ ގޭސް ބޭނުން ކޮށްގެން އެ މީހުންނަށް ޙަމަލަ ދީފައެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 20,000 އަށްވުރެ މައްޗަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 52,000 އަށް އުފުލިފައިވާއިރު، ޣައްޒާގެ 2.3 މިލިޔަން މީހުންގެ އާބާދީއަށް ހައިހޫނުކަމާ ކުރިމަތިލާން ޖެހިފައިވާ ކަމުގައި އދގެ އިދާރާތަކުން ބުނެއެވެ.