މިދިޔަ އަހަރުގެ ޖަނަވަރީ މަހުގެ 6 ވަނަ ދުވަހު އެމެރިކާގެ ޤާނޫނު ހަދާ މަޖިލީހުގެ އިދާރާ ކަމަށްވާ ކެޕިޓަލް ޢިމާރާތަށް ދިން ޙަމަލައަށާއި އެ ޙަމަލާ ދިނުމުގައި ބައިވެރިވި މީހުންނަށް ކުރީގެ ރައީސް ޑޮނަލްޑް ޓްރަމްޕް ފުރިހަމައަށް ތާޢީދު ކުރައްވާ ކަން ޔަގީންވާ ކަމުގައި ރައީސް ޖޯ ބައިޑަން ވިދާޅުވެއްޖެއެވެ.
2024 ވަނަ އަހަރު އެމެރިކާގައި ބާއްވާ ރިޔާސީ އިންތިޚާބުގައި ދެވަނަ ދަޢުރަކަށް ވާދަ ކުރައްވާނެ ކަން އިޢުލާނު ކުރައްވާފައިވާ ބައިޑަން މި މޭރުމުން ވާހަކަފުޅު ދައްކަވާފައި ވަނީ އިންތިޚާބުގައި ވާދަ ކުރުމަށް ޓްރަމްޕްގެ ޝަރުޠު ހަމަނުވާ ކަމަށް ކޮލޮރާޑޯ ސްޓޭޓްގެ ސްޕްރީމް ކޯޓުން ކަނޑައަޅާފައިވާ ދަނޑިވަޅެއްގައެވެ. ކޮލޮރާޑޯގެ ސްޕްރީމް ކޯޓުން މި ގޮތަށް ކަނޑައަޅާފައި ވަނީ ކެޕިޓަލަށް ދީފައިވާ ޙަމަލާގައި ޓްރަމްޕްގެ ބައިވެރިވުން އޮތް ކަމަށް އެ ކޯޓަށް ފެންނާތީއެވެ. ކޯޓުގެ ނިންމުން ނިންމާފައި ވަނީ އެމެރިކާގެ ޤާނޫނު އަސާސީއަށް ގެނައި 14 ވަނަ އިސްލާޙުގެ ތިންވަނަ މާއްދާގެ ދަށުންނެވެ.
ކޮލޮރާޑޯ ސްޕްރީމް ކޯޓުގެ ނިންމުމާ ގުޅޭގޮތުން ވާހަކަފުޅު ދައްކަވަމުން ބައިޑަން ވިދާޅުވީ، "އަޅުގަނޑު ކޯޓުގެ ނިންމުމާ މެދު އެއްޗެއް ބުނާކަށް ނެތީން. ނަމަވެސް، އެމެރިކާގެ ދަޢުލަތާ ދެކޮޅަށް ތެދުވި މީހުންނަށް އޭނާގެ [ޓްރަމްޕްގެ] ތާޢީދު ލިބުނު. އެ ކަމާ މެދު އެއްވެސް ސުވާލެއް، ޝައްކެއް ނެތް،" ކަމުގައެވެ.
ކޮލޮރާޑޯގެ ކޯޓުގެ ނިންމުމާ އެކު، އެ ސްޓޭޓްގައި ބާއްވާ ރިޔާސީ ޕްރައިމަރީގެ ވޯޓު ކާރުދާހުގައި ޓްރަމްޕްގެ ނަމެއް ނޯންނާނެއެވެ. އެ ނިންމުން ބަދަލު ކުރެވޭނީ އެމެރިކާގެ އެންމެ މަތީ ކޯޓު ކަމުގައިވާ ޔޫއެސް ސްޕްރީމް ކޯޓަށެވެ. ޓްރަމްޕްގެ ރިޕަބްލިކަން ޕާޓީން ވަނީ ކޮލޮރާޑޯ ކޯޓުގެ ނިންމުން އިސްތިޢުފާނު ކުރާނެ ކަމަށް ބުނެފައެވެ. ނަމަވެސް، މަސްރަޙު ދިރާސާކުރާ ފަރާތްތަކުން ދެކޭ ގޮތުގައި، 2024 ވަނަ އަހަރުގެ ރިޔާސީ އިންތިޚާބު ވެގެންދާނީ، 2020ގައި ބޭއްވި އިންތިޚާބުގެ ފަށްކުރުމަކަށެވެ. އެ އިންތިޚާބުގައި ވެސް ދެ ފަރާތުން ފެނިގެން ދިޔައީ ބައިޑަނާއި ޓްރަމްޕެވެ.
ކެޕިޓަލް ޙަމަލައާއި ޓްރަމްޕާ ގުޅުވައި ބައިޑަން ވާހަކަފުޅު ދައްކަވާފައިވާއިރު، މިއީ އޭނާ ޓްރަމްޕްގެ މައްޗަށް މި ފަދަ ތުހުމަތެއް ފާޅުގައި ކުރައްވާފައިވާ މަދު ފަހަރުތަކުގެ ތެރެއިން ފަހަރެއް ކަން ފާހަގަ ކޮށްލަން ޖެހެއެވެ. ޓްރަމްޕްގެ މައްޗަށް ގިނަ ދަޢުވާތަކެއް އުފުލައި ސަރިޔަތް ހިނގަމުންދާއިރު، މި ކަމާ ގުޅޭ ގޮތުން ވާހަކަފުޅު ދައްކަވަން ބައިޑަން މީގެ ކުރިން ވަނީ ދެކޮޅު ހައްދަވާފައެވެ. ނަމަވެސް، ފަހަކަށް އައި އޭނާ ގެންދަވަނީ ޓްރަމްޕަށް ބަހުގެ ޙަމަލަތައް އަމާޒު ކުރައްވަމުންނެވެ.
ދާދިފަހުން ބޭއްވި ކެމްޕޭން ހަފުލާއެއްގައި ވާހަކަފުޅު ދައްކަވަމުން ބައިޑަން ވަނީ ޓްރަމްޕަކީ "ޑިމޮކުރަސީއަށް ހުރި ބޮޑު ނުރައްކަލެއް"ގެ ގޮތުގައި ސިފަ ކުރައްވާފައެވެ. "އަޅުގަނޑުމެންނަށް [އިންތިޚާބު] ގެއްލިއްޖެ ނަމަ، އަޅުގަނޑުމެންގެ އަތުން ހުރިހާ އެއްޗެއް ބީވެގެން ދާނެ،" ބައިޑަން ވިދާޅުވިއެވެ. އަދި ޓްރަމްޕަކީ ހަމަނުޖެހުމަށް ހިތްވަރުދޭ މީހެއްގެ ގޮތުގައި ވެސް ބައިޑަން ސިފަ ކުރެއްވިއެވެ.