ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ އުދުވާންތައް ހުއްޓުވުމަށް ފިޔަވަޅުތަކެއް އެޅުމަށް ރަޝިޔާއާއި ޢަރަބި ލީގުން އދއަށް ގޮވާލައިފިއެވެ. ރަޝިޔާއާއި ޢަރަބި ލީގުން މި ކަމަށް ގޮވައިލާފައި ވަނީ މަޣްރިބުގެ މަރާކިޝްގައި ބޭއްވި ރަޝިޔާ-ޢަަރަބް ކޯޕޮރޭޝަން ފޯރަމްގައެވެ. އެއީ، ރަޝިޔާއާއި ޢަރަބި ޤައުމުތަކާ ދެމެދު ގުޅުންތައް ބަދަހި ކުރުމާ ގުޅޭ ގޮތުން މަޝްވަރާ ކުރުމަށް ބާއްވާ ބައްދަލުވުމެވެ. ނަމަވެސް، މި އަހަރުގެ ބައްދަލުވުމުގެ އެޖެންޑާގައި އޮތީ ޣައްޒާގެ މުސްލިމުންނަށް ޔަހޫދީން ޖައްސަމުންދާ ނިކަމެތި ހާލުގެ މައުޟޫޢެވެ.
"އަޅުގަނޑުގެ އުންމީދަކީ، މި ކަމާ މެދު އދގެ ސަލާމަތީ މަޖިލީހުން ވީ އެންމެ އަވަހަކަށް ގޮތެއް ނިންމައި، ޔަހޫދީންގެ ލާއިންސާނީ ޢުދުވާން ހުއްޓުވަން ޤަރާރެއް ފާސްކުރުން. މި ކަމާ ގުޅޭ ގޮތުން އދއަށް ބާރުއަޅަން ރަޝިޔާއާއި ޢަރަބި ޤައުމުތަކުން ގުޅިގެން މަސައްކަތް ކުރަން އަޅުގަނޑުމެން ވާނީ އެއްބަސްވެފައި،" ރަޝިޔާގެ ޚާރިޖީ ވަޒީރު ސެރްގިޔޭ ލެވްރޮފް ވިދާޅުވިއެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު 20,000 އަށް އުފުލިފައިވާއިރު، މި ޢުދުވާން ހުއްޓުވަން އދގެ ސަލާމަތީ މަޖިލީހުން ކުރާ ހުރިހާ މަސައްކަތަކަށް އެމެރިކާއިން ދަނީ ހުރަސް އަޅަމުންނެވެ. އެ މަޖިލީހަށް ހުށަހަޅާފައިވާ ދެ ޤަރާރެއް ވީޓޯގެ ބާރު ބޭނުންކޮށް އެމެރިކާއިން ފޭލު ކޮށްލާފައިވާއިރު، އެ މަޖިލީހަށް ހުށަހަޅަން ތައްޔާރު ކުރަމުންދާ ޤަރާރު ވެސް އެމެރިކާއިން ބޭރު ކޮށްލާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
"ޢުދުވާންތައް ހުއްޓުވަން ގޮވައިލާ އިތުރު ޤަރާރެއް ސަލާމަތީ މަޖިލީހަށް ހުށަހެޅުމަށް މި ދަނީ ތައްޔާރުވަމުން. އަޅުގަނޑުމެންގެ އުންމީދަކީ، އެމެރިކާއިން އެ ޤަރާރު ވީޓޯ ނުކޮށް، ފާސްވިޔަ ދިނުން. އަދި، ޔަހޫދީންގެ ޢުދުވާންތައް ހުއްޓުވުން. ޔަހޫދީންގެ އަމަލުތަކާ މެދު ޢަރަބިންގެ ކެތްތެރިކަން ކޮޅުންލައިފި ކަން އެމެރިކާއިން ޤަބޫލުކުރާނެ ކަމަށް އުންމީދު ކުރަން،" ޢަރަބި ލީގުގެ ސެކްރެޓަރީ ޖެނެރަލްގެ ނައިބު ޙުސާމް ޒަކީ ވިދާޅުވިއެވެ. މަކާރިޝްގައި ބޭއްވި ސަމިޓުގައި ޢަރަބި ލީގުގެ 22 މެންބަރު ޤައުމުގެ މަންދޫބުން ބައިވެރިވެ ވަޑައިގެންނެވިއެވެ.
ޔަހޫދީންގެ ޢުދުވާނުގައި ޒަޚަމު ކޮށްލާފައިވާ މީހުންގެ ޢަދަދު ވެސް ވަނީ 52,000 އަށް އުފުލިފައެވެ. އަދި، ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 7,000 އަށްވުރެ ގިނަ މީހުންގެ ހަށިތައްވާ ކަމަށް ވެސް ޣައްޒާގެ އޮފިޝަލުން ވިދާޅުވިއެވެ. މި ޢުދުވާންތައް ހުއްޓުމަކަށް ގެނައުމަށް ޤަޠަރުންނާއި މިޞްރުން ގުޅިގެން ދަނީ ޙަމާސްއާއި ޔަހޫދީންނާ ދެމެދު މަޝްވަރާތައް ވިލަރެސް ކުރަމުންނެވެ.