އެމެރިކާއިން ޔަމަނަށް ޙަމަލަދޭން ނިންމައިފި ނަމަ، ރަތް ކަނޑުގައި ހަރަކާތްތެރިވާ އެމެރިކާގެ މަނަވަރުތަކަށް ޙަމަލަދޭނެ ކަމަށް ބުނެ ހޫޘީ ޖަމާޢަތުން އެމެރިކާއަށް ވަރުގަދަ އިންޒާރެއް ދީފިއެވެ. ޔަމަނުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ހޫޘީންގެ އިސްވެރިޔާ ޢަބްދުލްމާލިކް އަލް-ހޫޘީ އެމެރިކާއަށް އިންޒާރު ދީފައި ވަނީ ރަތް ކަނޑުގައި ދަތުރުކުރާ އާގުބޯޓުތަކުގެ ރައްކާތެރިކަން ކަށަވަރު ކުރުމަށް އެމެރިކާއިން އިސްވެ ކަނޑުގެ ސިފައިންގެ ލަޝްކަރެއް ފޮނުވުމުންނެވެ.
ޔަމަނުގެ ބޮޑު ސަރަޙައްދެއްގައި ވެރިކަން ކުރާ ހޫޘީން ދާދި ފަހުން ވަނީ ރަތް ކަނޑުގައި ދަތުރުކުރާ ޔަހޫދީންނާ ގުޅުންހުރި އާގުބޯޓުފަހަރަށް ޙަމަލަދޭން ފަށާފައެވެ. މިއީ، ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓައިނުލުމުން އެ ކަމުގެ ބަދަލުހިފުމުގެ ގޮތުން ހޫޘީން ދެމުންދާ ޙަމަލަތަކެކެވެ. ރަތް ކަނޑުގައި ދަތުރުކުރާ އުޅަނދުފަހަރަށް ޙަމަލަދޭން ހޫޘީން ދަނީ ޑްރޯނާއި މިސައިލް ފަދަ ހަތިޔާރު ބޭނުން ކުރަމުންނެވެ.
މި ޙަމަލަތައް ދެމުން ދަނީ، މުދަލާ އެކު ޔަހޫދީންގެ ބަނދަރުތަކަށް ދަތުރު ކުރާ އުޅަނދުފަހަރަށް އެކަނި ކަމުގައި ހޫޘީން ބުނެއެވެ. އެ ޖަމާޢަތުގެ ޙަމަލަތަކާ ގުޅިގެން ރަތް ކަނޑުގައި ދަތުރުކުރާ ގިނަ ވިޔަފާރި އުޅަނދުފަހަރު ވަނީ، އެ ސަރަޙައްދު ބޭނުން ކުރުން ހުއްޓައިލާފައެވެ. އެހެންކަމުން އޭޝިޔާގެ ޤައުމުތަކާއި އުތުރު އެމެރިކާ އަދި ވިލާތުގެ ޤައުމުތަކުގެ ދެމެދުގައި ކަނޑުމަގުން ކުރާ ވިޔަފާރި ދަތުރުތަކަށް ވަނީ ގޮންޖެހުންތަކެއް ކުރިމަތިވެފައެވެ. އެ ދެމެދުގައި ދަތުރުކުރާ ގިނަ އާގުބޯޓުފަހަރު މިހާރު ދަތުރު ކުރަނީ އެފްރިކާ ބައްރު ވަށައިލާފައެވެ. މިއީ، ކުރިއަށްވުރެ ދިގު އަދި ޚަރަދު ބޮޑު ދަތުރެކެވެ. ހޫޘީންގެ ޙަމަލާތަކުން އާގުބޯޓުފަހަރު ހިމާޔަތް ކުރުމަށް އެމެރިކާއާ ގުޅިގެން އިތުރު 10 ޤައުމަކުން އަސްކަރީ މަނަވަރުތައް ފޮނުވާނެ ކަމަށް ބެލެވެއެވެ.
"އާގުބޯޓުތަކަށް ހިމާޔަތް ދިނުމުގެ ނަމުގައި އެމެރިކާއިން ޔަމަނަށް ޙަމަލައެއް ދީފި ނަމަ އަހަރުމެން މަޑުން ބަލާކަށް ނުތިބޭނަން. ޔަަމަނާ ދެކޮޅަށް ހަނގުރާމައެއް ފަށައިފިނަމަ، އެމެެރިކާއާ ކުރިމަތިލާން މި ތިބީ ތައްޔާރަށް. ރަތް ކަނޑަށް ވަންނަ އެމެރިކާގެ އަސްކަރީ މަނަވަރުތަކަށް ވަރުގަދަ ޙަމަލާތަކެއް ދޭނަން،" އަލް-ހޫޘީ ބުންޏެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ލާއިންސާނީ ޢުދުވާނުގައި ޣައްޒާގައި ޝަހީދު ކޮށްލާފައިވާ މީހުންގެ ޢަދަދު 20,000 އަށް އަރާފައިވާއިރު، ހޫޘީންގެ އިތުރުން ލުބްނާނުގައި ޙަރަކާތްތެރިވާ ޙިޒްބުالله ޖަމާޢަތުން ވެސް ވަނީ ޔަހޫދީންނާ ދެކޮޅަށް ޙަރަކާތްތެރި ވާން ފަށާފައެވެ. އީރާނުން ވާގިވެރިވާ ކަމަށް ތުހުމަތު ކުރެވޭ އެ ދެ ޖަމާޢަތުން ވެސް ވަނީ ޔަހޫދީންގެ ރަށްތަކަށް އަމާޒުކޮށް ވަރުގަދަ ޙަމަލަތަކެއް ދީފައެވެ. އެ ޙަމަލަތަކުގައި އެ ދެ ޖަމާޢަތުން ވެސް ދަނީ ޑްރޯނާއި މިސައިލް ފަދަ ފަހުގެ ޒަމާނީ ހަތިޔާރުތައް ބޭނުން ކުރަމުންނެވެ.
ރަތް ކަނޑުގައި އެމެރިކާއިން އިސްވެ އެކުލަވާލުމަށް ތައްޔާރުވެފައިވާ އަސްކަރީ އިއްތިޙާދަށް ދީފައިވާ ނަމަކީ އޮޕަރޭޝަން ޕްރޮސްޕެރިޓީ ގާޑިޔަންނެވެ. އެ އިއްތިޙާދުގައި އެމެރިކާގެ އިތުރުން އިނގިރޭސިވިލާތާއި ބަޙްރައިނާއި ކެނެޑާއާއި ޑެންމާނާއި ފަރަންސޭސިވިލާތާއި އިޓަލީވިލާތާއި ނެދަލެންޑްސްސާއި ނޯވޭއާއި ސްޕެއިންނާއި ސޭޝެލްސް ބައިވެރިވާނެއެވެ. އެ އިއްތިޙާދުގެ ދަށުން އެ ޤައުމުތަކުގެ މަނަވަރުތަކުން ރަތް ކަނޑާއި އަދަން ކަނޑާ ދެމެދު ފޯރިމަރާނެ ކަމަށް އެމެރިކާއިން ބުނެއެވެ.