ރަޝިޔާއިން ޔޫކްރެއިންގައި ކުރަމުންދާ ހަނގުރާމައާއި ޔޫކްރެއިންގެ ކުރިމަގާ ގުޅޭ ގޮތުން އެމެރިކާގެ އިތުރުން ވިލާތުގެ ޤައުމުތަކާ މަޝްވަރާ ކުރަން ތައްޔާރަށް ހުންނެވި ކަމުގައި ރަޝިޔާގެ ރައީސް ވްލަޑިމިޔަރ ޕުޓިން ވިދާޅުވެއްޖެއެވެ. އޭނާ އެހެން ވިދާޅުވީ ރަޝިޔާގެ ދިފާޢީ ދާއިރާގެ އިސްވެރިންނާ އެކު ބޭއްވެވި ބައްދަލުވުމެއްގައި ވާހަކަފުޅު ދައްކަވަމުންނެވެ.
މިއީ، ޔޫކްރެއިންގެ ކުރިމަގާ މެދު މަޝްވަރާ ކުރައްވަން ތައްޔާރަށް ހުންނެވި ކަން ޕުޓިން އިޢުލާނު ކުރެއްވި ފުރަތަމަ ފަހަރެއް ނޫނެވެ. ޔޫކްރެެއިނާ އެކު މަޝްވަރާ ކުރަން ތައްޔާރަށް ހުއްނެވި ކަމުގައި ޕުޓިން ކުރިން ވިދާޅުވެފައިވީ ނަމަވެސް، އެ ކަމާ މެދު އެއްވެސް އަމަލީ ފިޔަވަޅެއް އަޅުއްވާފައި ނުވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. ބެލެވޭ ގޮތުގައި، އޭނާ މި ކަމާ މެދު ފިޔަވަޅެއް އަޅުއްވާނީ، 2024 ވަނަ އަހަރު އެމެރިކާގައި ބާއްވާ އެ ޤައުމުގެ ރިޔާސީ އިންތީޚާބަށް ފަހުއެވެ. އެ އިންތިޚާބުގެ ނާތީޖާއަށް ބެއްލެވުމަށް ފަހުއެވެ.
ޕުޓިން ވަނީ، ރަޝިޔާއާ މެދު ދުޝްމަނު ކަން ބާއްވާ ޔޫކްރެއިންގެ ރައްޔިތުންނާއި، އެމެރިކާގެ އިތުރުން ވިލާތުން ވެސް ރަޝިޔާއާ އެކު މަޝްވަރާ ކުރަން ބޭނުންކަމާ މެދު ސުވާލު އުފައްދަވާފައެވެ. "މަޝްވަރާ ކުރަން އެ މީހުންނަށް ހުޅުވައިލަން. ނަމަވެސް، [ރަޝިޔާއިން] ކުރާ އެއްވެސް މަޝްވަރާއެއްގައި އެންމެ އިސްވާނީ ރަޝިޔާގެ ޤައުމީ މަސްލަޙަތު. އަހަރުމެންގެ ބިމުން އެންމެ ތަންކޮޅެއް ވެސް ބީވިޔަކަ ނުދޭނަން،" ޕުޓިން ވިދާޅުވިއެވެ.
ވިލާތުގެ ޤައުމުތަކާ ދެކޮޅަށް ހަނގުރާމައެއް ފަށަން ބޭނުންފުޅު ނުވާ ކަމުގައި ވެސް ޕުޓިން ވިދާޅުވިއެވެ. 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ފަށާފައިވާ ހަނގުރާމައިގައި، އެ ޤައުމުގެ 17.5 އިންސައްތައަށް ރަޝިޔާ ސިފައިން ވަނީ އަތްގަދަ ކޮށްފައެވެ. އޭގެ ތެރޭގައި ޔޫކްރެއިންގެ ދޮންބާސްގައި އޮންނަ ލުހާންސްކާއި ދޮނެޓްސްކުގެ އިތުރުން ދެކުނުގައި އޮންނަ ޒަޕޮރީޜީޔާ ހިމެނެއެވެ. އަދި، 2014 ވަނަ އަހަރު ވެސް ރަޝިޔާއިން ވަނީ ޔޫކްރެއިންގެ ދެކުނުގައި އޮންނަ ކްރައިމިޔާއަށް އަތްގަދަ ކޮށް، އެ ސަރަޙައްދު ހިފާފައެވެ.
ޔޫކްރެއިންގެ ހަތަރު ސަރަޙައްދަކަށް އަތްގަދަ ކުރުމަށް ފަހު ރަޝިޔާއިން ވަނީ އެ ސަރަޙައްދުތަކުގައި ފެންނަ ނުފެންނަ ވޯޓެއް ނަގައި، އެއީ ރަޝިޔާގެ ބަޔެއްގެ ގޮތުގައި ކަނޑައަޅާފައެވެ. ނަމަވެސް، އެ ސަރަޙައްދުތަކުގައި ރަޝިޔާގެ ފުރިހަމަ ކޮންޓްރޯލެއް ނެތް ކަން ފާހަގަ ކޮށްލަން ޖެެހެއެވެ. އަދި، ރަޝިޔާއާއި ޔޫކްރެއިންގެ ފައުޖުތަކާ ދެމެދު އަދިވެސް ދަނީ ވަރުގަދައަށް ޙަމަލާ ބަދަލު ކުރަމުންނެވެ.
ޕުޓިން ބޭއްވެވި ދިފާޢީ އިސްވެރިންގެ ބައްދަލުވުމުގައި ރަޝިޔާގެ ދިފާޢީ ވަޒީރު ސަރްގޭ ޝޮއިގޫގެ އިތުރުން އަސްކަރިއްޔާގެ އިސް ޖެނެރަލް ވަލޭރީ ގިރާސިމޮފާއި އަސްކަރިއްޔާގެ އިސް އޮފިސަރުން ބައިވެރިވިއެވެ. އަދި، ފެޑެރަލް ސެކިޔުރިޓީ ސަރވިސް (އެފް.އެސް.ބީ)ގެ އިސްވެރިން ވެސް ބައިވެރިވިއެވެ. "އަހަރުމެން [ޔޫކްރެއިނަށް އަރައި ފެށި] އަސްކަރީ ޙަރަކާތުގެ ލަނޑުދަނޑިތައް ދޫކޮށެއް ނުލާނަން،" އެ ބޭފުޅުންނާ ވާހަކަފުޅު ދައްކަވަމުން ޕުޓިން ވިދާޅުވިއެވެ.
ރަޝިޔާ-ޔޫކްރެއިން ހަނގުރާމައަށް 665 ފާއިތުވެފައިވާއިރު، މި ހަނގުރާމައިގެ ތެރެއިން ނޭޓޯގެ ޤައުމުތަކާ ކުރިމަތިލުމެއް ފެށުމުގެ އެއްވެސް ނިޔަތެއް އަދި ބޭނުމެއް ވެސް ނެތް ކަމުގައި ޕުޓިން ވަނީ ވިދާޅުވެފައެވެ. ނަމަވެސް، ޔޫކްރެއިން ހަނގުރާމަ ފެށި ފަހުން ރަޝިޔާއިން ހަތިޔާރު އުފައްދާ މިންވަރު އެތަކެއް ގުނައަކަށް އިތުރު ކޮށްފައިވާ ކަން ފާހަގަ ކޮށްލަން ޖެހެއެވެ.
ރަޝިޔާގެ ދިފާޢީ ދާއިރާއިން ވަނީ އަސްކަރީ ޓޭންކުފަހަރު އުފައްދާ މިންވަރު ފަސް ގުނައަށް އިތުރު ކޮށްފައެވެ. އަދި، ޑްރޯން ފަދަ އުޅަނދުފަހަރު އުފައްދާ މިންވަރު 17 އިންސައްތަ ހަލުވި ކޮށްފައިވާއިރު، ބޮން އުފައްދާ މިންވަރު ވަނީ 18 އިންސައްތަ އިތުރު ކޮށްފައެވެ. މީގެ އިތުރުން، މި އަހަރުގެ ތެރޭގައި ރަޝިޔާއިން ވަނީ އިތުރު 490,000 ސިފައިން ޚިދުމަތަށް ނެރެފައެވެ. ކުރިއަށް އޮތް އަހަރު މި ޢަދަދު 745,000 އަށް އިތުރު ކުރަން އަމާޒު ހިފާފައިވާ ކަމުގައި ޝޮއިގޫ ވިދާޅުވިއެވެ.