އަންނަ އަހަރު އެމެރިކާގައި ބާއްވާ ރިޔާސީ އިންތިޚާބުގައި ވާދަ ކުރައްވަން ނިންމަވާފައިވާ ޑޮނަލްޑް ޓްރަމްޕްގެ ޝަރުޠު ހަމަނުވާ ކަމަށް އެ ޤައުމުގެ ސްޓޭޓެއް ކަމުގައިވާ ކޮލޮރާޑޯގެ ސުޕްރީމް ކޯޓުން ކަނޑައަޅައިފިއެވެ. އެ ކޯޓުން ބުނީ، 2021 ވަނަ އަހަރު އެމެރިކާގެ ޤާނޫނު ހަދާ މަޖިލީހުގެ އިދާރާ ކަމަށްވާ ކެޕިޓަލްއަށް ދީފައިވާ ޙަމަލާގައި ޓްރަމްޕްގެ ބައިވެރިވުން އޮތުމުން، ވެރިކަމަށް ކުރިމަތިލުމަށް އޭނާގެ ޝަރުޠު ހަމަނުވާ ކަމަށާއި، އެ ސްޓޭޓްގައި ބާއްވާ ރިޕަބްލިކަން ޕާޓީގެ ރިޔާސީ ޕްރައިމަރީގައި ޓްރަމްޕަށް ވާދަ ނުކުރެއްވޭނެ ކަމުގައެވެ.
އެ ހުކުމަށް އަމަލު ކުރަން ޖެހޭނީ ކޮލޮރާޑޯގައި އެކަނި ނަމަވެސް، ޓްރަމްޕްގެ ކެނޑިޑެސީއާ ދެކޮޅަށް އެ ސްޓޭޓްގެ ސްޕްރީމް ކޯޓުން ހުކުމް ކޮށްފައި ވަނީ ބައެއް އެހެން ސްޓޭޓްތަކުން ވެސް މިފަދަ ހުކުމްތަކެއް ކުރަން ތައްޔާރުވަމުންދާ ދަނޑިވަޅެއްގައި ކަން ފާހަގަ ކޮށްލަން ޖެހެއެވެ. މިއީ، އެމެރިކާގެ ޤާނޫނު އަސާސީގެ 14 ވަނަ އިސްލާޙުގެ ތިންވަނަ މާއްދާގެ ދަށުން ރައީސް ކަމުގެ މަޤާމަށް ކުރިމަތިލާފައިވާ ކެނޑިޑޭޓެއްގެ ޝަރުޠު ހަމަނުވާ ކަމަށް ކޯޓަކުން ކަނޑައަޅާފައިވާ ފުރަތަމަ ފަހަރެވެ.
"ޤާނޫނު އަސާސީއަށް ގެނައި 14 ވަނަ އިސްލާޙުގެ ތިންވަނަ މާއްދާގެ ދަށުން ޓްރަމްޕްގެ ޝަރުޠު ހަމަނުވާ ކަމަށް ކޯޓުގެ އަޣުލަބިއްޔަތުން ޤަބޫލު ކުރޭ. މި ނިންމުމާ އެކު މި ސްޓޭޓްގައި ބާއްވާ ރިޔާސީ ޕްރައިމަރީގެ ވޯޓު ކަރުދާހުގައި އޭނާގެ ނަން އޮތުމަކީ ޤާނޫނާ ޚިލާފު ކަމަކަށް ވާނެ،" ކޮލޮރާޑޯގެ ކޯޓުން ބުންޏެވެ.
ޓްރަމްޕްގެ ރިޕަބްލިކަން ޕާޓީން ވަނީ މި ނިންމުން ކުށްވެރި ކޮށްފައެވެ. އަދި، މި ނިންމުން އިސްތިޢުނާފު ކުރާނެ ކަން އިޢުލާނު ކޮށްފައެވެ. ކޮލޮރާޑޯގެ ސްޕްރީމް ކޯޓުން ޓްރަމްޕްގެ ކެނޑިޑެސީ ބާޠިލު ކަމަށް ކަނޑައަޅާފައި ވަނީ، އޭނާއާ ދެކޮޅަށް ގިނަ ޢަދަދެއްގެ ދަޢުވާތަކެއް އުފުލައި، ޝަރީއަތް ހިނގަމުންދާ ދަނޑިވަޅެއްގައެވެ. އޭނާއަށް ދެކޮޅަށް އުފުލާފައިވާ ބައެއް ދަޢުވާ ތަކުގެ ތެރޭގައި 2020 ވަނަ އަހަރު އެމެރިކާގައި ބޭއްވި ރިޔާސީ އިންތިޚާބުގެ ނަތީޖާ އޮޅުވައިލައްވަން މަސައްކަތް ކުރެއްވުމުގެ ކުށް ހިމެނެއެވެ. މިއީ، ޓްރަމްޕާ ދެކޮޅަށް އުފުލާފައިވާ ސިޔާސީ ދަޢުވާތަކެއްގެ ގޮތުގައި އޭނާ ސިފަ ކުރައްވައެވެ.
ރައީސް ކަމުގެ މަޤާމަށް ޓްރަމްޕްގެ ޝަރުޠު ހަމަނުވާ ކަމަށް ކަނޑައަޅައިދިނުމަށް އެދި ކޮލޮރާޑޯގެ ކޯޓަށް މައްސަލަ ހުށަހަޅާފައި ވަނީ މަދަނީ ޖަމުޢިއްޔާއެއް ކަމުގައިވާ ސިޓިޒެންސް ފޯ ރެސްޕޮންސިބިލިޓީ އެންޑް އެތިކްސް އިން ވޮޝިންޓަނުންނެވެ. އެ ޖަމާޢަތުން ވަނީ ސްޕްރީމް ކޯޓުގެ ނިންމުމަށް މަރުޙަބާ ކިޔާފައެވެ. އެ ކޯޓުން މި މައްސަލައިގައި ގޮތެއް ނިންމާފައި މި ވަނީ، ކޮލޮރާޑޯގެ ދަށު ކޯޓަކުން ވެސް، ކުރިއަށް އޮތް ރިޔާސީ އިންތިޚާބުގައި ވާދަކުރުމުގެ ޝަރުޠުތައް ޓްރަމްޕްގެ ހަމަ ނުވާ ކަމަށް ހުކުމް ކޮށްފައިވާ ދަނޑިވަޅެއްގައި ކަން ފާހަގަ ކޮށްލަން ޖެހެއެވެ.
ކޮލޮރާޑޯގެ ސްޕްރީމް ކޯޓުގެ ހުކުމަށް އަމަލު ކުރަން ފަށާނީ އަންނަ އަހަރުގެ ޖަނަވަރީ 4 ވަނަ ދުވަހަށް ފަހުއެވެ. ނުވަތަ، މި ކަމާ މެދު އެމެރިކާގެ އެންމެ މަތީ ކޯޓު ކަމުގައިވާ ސްޕްރީމް ކޯޓުން ގޮތެއް ކަނޑައެޅުމަށް ފަހުއެވެ. ޖަނަވަރީ 5 ވަނަ ދުވަހަކީ، ކޮލޮރާޑޯގައި ބާއްވާ ރިޔާސީ ޕްރައިމަރީގެ ވޯޓު ކަރުދާސްތައް ޕްރިންޓު ކުރުމާ މެދު ގޮތެއް ނިންމަންޖެހޭ އެންމެ ފަހު ދުވަހެެވެ. ރިޕަބްލިކަން ޕާޓީގެ ޕްރައިމަރީ ބޭއްވުމަށް ހަމަޖެހިފައި ވަނީ އަންނަ އަހަރުގެ މާރިޗު މަހުއެވެ.