ޣައްޒާގައި ވެރިކަން ކުރާ ޙަމާސް ޖަމާޢަތުގެ އިސްވެރިޔާ އިސްމާޢީލް ހަނިއްޔާ މިޞްރަށް ވަޑައިގަންނަވައިފިއެވެ. އޭނާގެ މި ދަތުރުފުޅަކީ، ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތައް މެދުކަނޑައިލުމާ ގުޅޭ ގޮތުން ކުރިއަށްދާ މަޝްވަރާތަކުގައި ބައިވެރިވެ ވަޑައިގެންނެވުމަށް ކުރައްވާ ދަތުރުފުޅެކެވެ. ޢާންމު ގޮތެއްގައި ޤަޠަރުގައި ދިރިއުޅުއްވާ ހަނިއްޔާ އެންމެ ފަހުން މިޞްރަށް ދަތުރުފުޅެއް ކުރެއްވީ ހުސްވި ނޮވެންބަރު މަހުގެ ކުރީކޮޅެވެ.
އެ ފަހަރު އޭނާ މިޞްރަށް ކުރެއްވި ދަތުރުފުޅަށް ފަހު ޙަމާސުން ވަނީ ޔަހޫދީންނާ އެކު އެއްބަސްވުމެއް ހަދާފައެވެ. ހަތް ދުވަހުގެ މުއްދަތަކަށް އަމަލު ކުރި އެ އެއްބަސްވުމުގެ ދަށުން ޔަހޫދީން ވަނީ ޣައްޒާއަށް ބޮންއެޅުން ވަޤުތީ ގޮތުން މެދުކަނޑައިލާފައެވެ. އަދި، ޙަމާސުން ވަނީ އެ ޖަމާޢަތުން ރަހީނު ކޮށްފައިވާ ޔަހޫދީންގެ ތެރެއިން 100 އެއްހާ އަސީރުން މިނިވަން ކޮށްފައެވެ.
ފަލަސްޠީނުގެ މުޖާހިދުންގެ އެހެން ޖަމާޢަތެއް ކަމުގައިވާ އިސްލާމިކް ޖިހާދުން ވެސް ވަނީ އެ ޖަމާޢަތުގެ އިސްވެރިން ކުރިއަށް އޮތް ދުވަސްތަކުގެ ތެރޭގައި މިޞްރަށް ދާނެ ކަމަށް ބުނެފައެވެ. އެ ޖަމާޢަތުގެ ބެލުމުގެ ދަށުގައި ވެސް އަސީރުން ތިބި ކަން ފާހަގަ ކޮށްލަން ޖެހެއެވެ. މިޞްރުގައި ކުރިއަށްދާ މަޝްވަރާތަކާ ގުޅޭ މަޢުލޫމާތު އެނގޭ ފަރާތަކުން ބުނީ، ޙަމަލަ ބަދަލު ކުރުން މެދުކަނޑައިލުމަށް އައު އެއްބަސްވުމެއް އެކުލަވައިލާ، ޙަމާސްގެ ބެލުމުގެ ދަށުގައި ތިބި އަސީރުންގެ ތެރެއިން މިނިވަން ކުރާނެ ބަޔަކާ މެދު ދެ ފަރާތުގެ މެދުގައި ވާހަކަ ދެކެވެމުންދާ ކަމުގައެވެ.
އައު އެއްބަސްވުމެއްގެ ދަށުން ޔަހޫދީ ސިފައިން ހައްޔަރުކޮށް ޖަލަށް ލާފައިވާ ފަލަސްޠީނުގެ އިތުރު ރައްޔިތުންތަކެއް މިނިވަން ކުރުމަށް ވެސް މަޝްވަރާ ކުރަމުންދާ ކަމުގައި އެ ފަރާތުން ބުންޏެވެ. އަދި، ކުރިއަށް އޮތް ދުވަސްތަކުގެ ތެރޭގައި ދެ ފަރާތުގެ މެދުގައި އެއްބަސްވުމަކަށް އާދެވޭނެ ކަމަށް ބެލެވޭ ކަމުގައި ވެސް އެ ފަރާތުން ބުންޏެވެ.
ނަމަވެސް، ޙަމާސްއާއި ޔަހޫދީން ދަނީ ޙަމަލާ ބަދަލު ކުރުން ހުއްޓައިނުލާނެ ކަމަށް ފާޅުގައި ބުނަމުންނެވެ. ޙަމާސުން ބުނީ، ޔަހޫދީންގެ ޢުދުވާންތައް ވަގުތީ ގޮތުން މެދުކަނޑައިލުމަކީ ޙައްލެއް ނޫން ކަމަށާއި، ބޭނުން ވަނީ ޢުދުވާނަށް ނިމުމެއް ގެންނަން ކަމުގައެވެ. ނަމަވެސް، ޔަހޫދީން ދަނީ އެ ކަމާ ދެކޮޅު ހަދަމުންނެވެ. އަދި، އެއްބަސްވެވޭނެ ހަމައެކަނި ކަމަކީ، ޣައްޒާއަށް އިންސާނީ އެހީގެ ސާމާނު ވެއްދުމުގެ ފުރުޞަތު ދިނުމަށް ކަމުގައި ޔަހޫދީން ބުނެއެވެ.
ޙަމާސްއާއި ޔަހޫދީންނާ ދެމެދު މަޝްވަރާތައް ބާއްވަނީ، ބައިނަލްއަޤުވާމީ މުޖުތަމަޢުގެ ފާޑުކިޔުންތައް ޔަހޫދީންނަށް އަމާޒުވެފައިވާ ދަނޑިވަޅެއްގައެވެ. ޔަހޫދީންނާ އެއްބައިވެ، އެކުގައި މި ވަޤުތު އޮތީ އެމެރިކާއިން އެކަނި ކަމަށް ބުނެވިދާނެ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. މުޅި ދުނިޔެއިން ވެސް ގޮވައިލަމުން ދަނީ، ޣައްޒާގެ މުސްލިމުންނާ ދެކޮޅަށް ހިންގަމުންދާ ޤަތުލުޢާންމު ހުއްޓައިލާ، ފަލަސްޠީނުގެ ރައްޔިތުން ޝަހީދު ކުރުމަށް ނިމުމެއް ގެނައުމަށެވެ. އެމެރިކާއިން ވެސް ވަނީ ފާޅުގައި މި ކަމަށް ގޮވައިލާފައެވެ.
ޔަހޫދީންގެ ލާއިންސާނީ ޢުދުވާން ހުއްޓުމަކަށް ގެނައުމަށް ގޮވައިލާ ޤަރާރެއް ފާސް ކުރުމަށް އދގެ ސަލާމަތީ މަޖިލީހުން އަނެއްކާ ވެސް ދަނީ މަސައްކަތް ކުރަމުންނެވެ. ޑިސެންބަރު 18 ވަނަ ދުވަހު މި ކަމާ މެދު ވޯޓަށް އަހަން މަސައްކަތް ކުރި ނަމަވެސް، ޤަރާރުގެ ދެލިކޮޕީއާ މެދު އޮތް ޚިޔާލު ތަފާތުވުންތަކާ އެކު ވޯޓު ވަނީ ފަސް ކޮށްފައެވެ. މީގެ ކުރިން އދގެ ސަލާމަތީ މަޖިލީހަށް ހުށަހަޅާފައިވާ ޤަރާރުތައް އެމެރިކާއިން ވަނީ ވީޓޯގެ ބާރު ބޭނުންކޮށް ފޭލު ކޮށްލާފައެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 19,450 އަށްވުރެ މައްޗަށް އުފުލިފައެވެ. އަދި، ޒަޙަމު ކޮށްލާފައިވާ މީހުންގެ ޢަދަދު 52,000 އަށް އަރާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ. ނަމަވެސް، ޣައްޒާގެ ހޮސްޕިޓަލްތަކަށް ބޮންއަޅައި، އެ ތަންތަން ސުންނާފަތި ކުރަމުންދާތީ، ޒަޚަމުވެފައިވާ މީހުންނަށް ފަރުވާދޭނެ ގޮތެއް ނެތް ކަމުގައި ވެސް އެ ވުޒާރާއިން ބުނެއެވެ.