ޣައްޒާއިން ކާބޯތަކެތި ހުސްވެ ބަނޑުފުރާނަ މުއްތިކުރެވޭނެ ގޮތެއް ނެތި ޣައްޒާގެ ރައްޔިތުން ގޮތްހުސްވެއްޖެއެވެ. އޮކްޓޫބަރު 7 ވަނަ ދުވަހު ޣައްޒާގެ ފުރަބަންދު ހަރުކަށިކޮށް، ޔަހޫދީން ވަނީ އެ ސަހަރަށް ޒަރޫރީ ސަމާނު އެތެރެ ކުރުމަށް ހުރަސް އަޅާފައެވެ. މިއާ އެކު، ޣައްޒާއިން ކާބޯތަކެއްޗާއި ސާފުބޯފެން ވަނީ ހުސްވެފައެވެ. އަދި، ޞިއްޙީ ފަރުވާ ދިނުމަށް ބޭނުންވާ ބޭސްފަރުވާގެ ސާމާނާއި ތެޔޮ ވެސް ވަނީ ހުސްވެފައެވެ.
ރަފަޙްގައި އޮންނަ ޣައްޒާއާއި މިޞްރު ގުޅޭ ސަރަޙައްދީ ހުރަސް ތެރެއިން ޣައްޒާއަށް ވަރަށް މަދު ޢަދަދެއްގެ އެހީގެ ސާމާނު މިހާރު ދަނީ ވައްދަމުންނެވެ. އަދި، ޔަހޫދީ ދަޢުލަތާއި ޣައްޒާ ގުޅޭ ކަރީމް އަބޫ ސާލިމް ހުރަސް ވެސް މިހާރު ވަނީ ހުޅުވައިލާފައެވެ. ނަމަވެސް، ޣައްޒާގައި ދިރިއުޅޭ 2.3 މިލިޔަން މީހުންނަށް ބޭނުންވާ މިންވަރަށް، އަދި އެ މީހުންގެ ބަނޑުފުރާނަ މުއްތިކުރެވޭނެ މިންވަރަށް ކާބޯތަކެތި އެތެރެ ކުރަން ޔަހޫދީން އަދިވެސް ދަނީ ހުރަސް އަޅަމުންނެވެ.
މިއާ އެކު ޣައްޒާގެ ރައްޔިތުންެގެ އިންސާނީ ހާލަތު ދަށު ދަރަޖައަކަށް ވެއްޓިފައިވާއިރު، ބަނޑުފުރާނަ މުއްތިކުރެވޭނެ ގޮތެއް ހޯދުމަށް ބައެއް މީހުން ވަނީ އެހީގެ ސާމާނު އެތެރެކުރާ އުޅަނދުފަހަރު ލޫޓުވާފައެވެ. މި ހާދިސާ ހިނގާފައި ވަނީ ރަފަޙް ހުރަސް ކައިރީގައެވެ. މި ކަމުގައި 12 ވަރަކަށް މީހުން ބައިވެރިވި ކަމުގައި ރިޕޯޓުތައް ބުނެއެވެ. އެ މީހުން ވަނީ، އުޅަނދުގައި ހުރި ކާބޯތަކެތި، އެ ސަރަޙައްދަށް ޖަމާވެފައިވާ މީހުންނަށް ބަހާފައެވެ.
"ޣައްޒާގެ ރައްޔިތުންގެ އަތުގައި އެއްވެސް އެއްޗެއް ނެތް. އެ މީހުންގެ ގެދޮރެއް ނެތް. ކާބޯތަކެތި ހޯދޭނެ ގޮތެއް ނެތް. ބަނޑުފުރާނަ މުއްތިކުރެވޭނެ ގޮތެއް ނެތް. ބޯނެ ފެންފޮދެއްހާ މިންވަރު ވެސް، ބޭހެއް ވެސް ނެތް. އެހީގެ ސާމާނު ބަރުކޮށްގެން ދަތުރު ކުރަމުން ދިޔަ އުޅަނދެއް ހުއްޓުވައި، ކާބޯތަކެތި ހޯދަން މަސައްކަތް ކުރުމަކީ މި ފަދަ ހާލަތެއްގައި ހިނގާފާނެ ކަމެއް ކަން ޤަބޫލު ކުރަން ޖެހޭ،" ޣައްޒާގެ މިހާރުގެ ހާލަތު ކިޔައިދެމުން ނޫސްވެރިއަކު ބުންޏެވެ.
އެހީގެ ސާމާނު ހިފައިގެން ޣައްޒާއަށް ވަންނަ ބައެއް އުޅަނދުފަހަރު ހުއްޓުވައި، އޭގައި ހުރި ކާބޯތަކެތި އަތުލަމުންދާ ކަމުގައި އ.ދއިން ވެސް ދާދި ފަހުން ވަނީ ބުނެފައެވެ. ފަލަސްޠީނުގެ ރެފިއުޖީންނާ ބެހޭ އ.ދގެ އިދާރާގެ އިސްވެރިޔާ ފިލީޕޯ ލަޓްޒަރީނީ ވިދާޅުވީ ޣައްޒާގެ ރައްޔިތުން މިހާރު ތަޙައްމުލު ކުރަމުންދާ ހާލަތަކީ އެ މީހުންނަށް އައު ހާލަތެއް ކަމުގައެވެ. އަދި، މި ފަދަ މިންވަރަކަށް ހައިހޫނުކަމާ އެ މީހުންނަށް މީގެ ކުރިން ދުވަހަކުވެސް ކުރިމަތިލާން ޖެހިފައި ނުވާ ކަމުގައި އޭނާ ވިދާޅުވިއެވެ.
މި ކަމާ ގުޅޭ ގޮތުން ދުނިޔޭގެ ކާބޯތަކެއްޗާ ބެހޭ ޕުރޮގުރާމުގެ ޑެޕިޔުޓީ ޑިރެކްޓަރ ކޯލް ސްކައޫ ވިދާޅުވީ ޣައްޒާގެ އާބާދީގެ ދެބައިކުޅަ އެއްބައި މީހުން މިހާރު ދަނީ ހައިހޫނު ކަން ތަޙައްމުލު ކުރަމުން ކަމުގައެވެ. އަދި، ދެން ކާބޯއެއްޗެއް ލިބޭނެ ދުވަހެއް، އެ މީހުންނަށް ނޭނގޭ ކަމުގައި އޭނާ ވިދާޅުވިއެވެ. ޔަހޫދީިންގެ މެދުކެނޑުމެއް ނެތް ޢުދުވާނާ ގުޅިގެން ޣައްޒާގެ މެދުތެރެއާއި އުތުރުގެ ސަރަޙައްދުގައި ތިބި ރައްޔިތުންނާ ހަމައަށް ކާބޯތަކެތި ފޯރުކޮށްދެވޭނެ ގޮތެއް ނެތް ކަމުގައި ވެސް އެހީދޭ ޖަމާޢަތްތަކުން ބުނެއެވެ.
އޮކްޓޫބަރު 7 ވަނަ ދުވަހު ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ފަށާފައިވާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު 19,543 އަށް އަރާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ހާމަކުރެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 52,000 އަށް އުފުލިފައިވާއިރު، އެ މީހުންނަށް ފަރުވާދޭނެ ގޮތެއް، އަދި ވަޞީލަތެއް ވެސް ޣައްޒާގައި މި ވަގުތު ނެތެވެ. އަދި، ޔަހޫދީން ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 7,000 މީހެއްގެ ހަށިގަނޑު ތާށިވެފައިވާ ކަމުގައި ވެސް ޣައްޒާގެ އޮފިޝަލުން ވިދާޅުވިއެވެ.