އެމްޑަބްލިއުއެސްސީ ދިވެހި ޕްރިމިއާ ލީގުގައި ކުލަބު އީގަލްސް ބަލިކޮށް، މާޒިޔާ ސްޕޯޓްސް އެންޑް ރެކްރިއޭޝަނުން ޖެހިޖެހިގެން ހަތަރުވަނަ ފަހަރަށް ލީގު ޗެމްޕިއަންކަން ހޯދައިފިއެވެ.
މާޒިޔާއިން ލީގު ޗެމްޕިއަންކަން ކަށަވަރުކުރީ ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު ލީގުގެ ފަހު މެޗުގައި 1-0 ގެ ނަތީޖާއަކުން އީގަލްސް ބަލިކޮށްގެންނެވެ. މިއީ މާޒިޔާއިން ލީގު ޗެމްޕިއަންކަން ހޯދި ފަސްވަނަ ފަހަރެވެ. އެގޮތުން މިދިޔަ ހަތަރު މުބާރާތުގެ އިތުރުން މާޒިޔާއިން 2016 ވަނަ އަހަރު ފުރަތަމަ ފަހަރަށް ލީގު ކާމިޔާބުކޮށްފައެވެ.
މިއަދު ކުޅުނު މެޗުގައި ދެ ޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މި މެޗުގައި މާޒިޔާއިން ކާމިޔާބުކުރި ހަމައެކަނި ލަނޑު ފެނިގެންގޮސްފައިވަނީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. ލިބުނު ޕެނަލްޓީއަކުން މި ލަނޑު ކާމިޔާބުކޮށްދިނީ ސާބިއާގެ ފޯވާޑް ވޮޖިސްލާފް ބަލަބަނޮވިޗެވެ. މިއީ އޭރިއާ ތެރެއިން މާޒިޔާގެ ހަމްޒާ މުޙައްމަދު (ހަމްޕު) އަށް އީގަލްސްގެ ރިިލްވާން ވަހީދު (ރިލޭ) ކުރި ފައުލަކަށް ދިން ޕެނަލްޓީއެކެވެ.
މި މެޗުގެ ދެވަނަ ހާފުގައި އީގަލްސްއިން ރަނގަޅު ކުޅުމެއް ދެއްކިއިރު، މި ހާފުގައި އެ ޓީމުން ނުރައްކާތެރި ދެ ހަމަލާއެއް އުފައްދާފައެވެ. އެގޮތުން އޭރިއާ ބޭރުން އަބްދުﷲ ސަމީހު މޫސާ (ސަމިއްޓެ) އާއި އޭރިއާ ތެރެއިން ކެޕްޓަން އަޙްމަދު ރިޒުވާން (ރިޒޭ) ފޮނުވާލި ހަމަލާތަކުގެ ހުރަހަކަށްވީ މާޒިޔާގެ ގޯލްކީޕަރު ހުސެއިން ޝަރީފެވެ.
މި މޮޅާއެކު މާޒިޔާގެ ލީގު ޗެމްޕިއަންކަން ހޯދީ މެޗަކުން ބަލިނުވެއެވެ. މި ފަހަރުގެ ލީގުގައި އެންމެ ފުރަތަމަ ތިން ބުރެއް ކުޅުމަށް ނިންމި ނަމަވެސް، މާލީ މައްސަލަތަކާ ގުޅިގެން ދެވަނަ ބުރަށްފަހު ލީގު ވަނީ ނިންމާލާފައެވެ. ޗެމްޕިއަންކަން ހޯދި މާޒިޔާއަށް ލީގުގައި ކުޅުނު 14 މެޗުން 40 ޕޮއިންޓް ލިބުނުއިރު، ދެވަނައިގައި ނިންމި އީގަލްސްއަށް 14 މެޗުން ލިބުނީ 35 ޕޮއިންޓެވެ. މި ފަހަރުގެ ލީގުގައި އީގަލްސް ބަލިވީ މިއަދުގެ މެޗުން އެކަންޏެވެ.