މިޞްރުގައި ބޭއްވި ރިޔާސީ އިންތިޚާބުގައިި އެ ޤައުމުގެ ރައީސް ޢަބްދުލް ފައްތާޙް އަލްސީސީ ކުރި ހޯއްދަވައި ތިންވަނަ ދައުރަކަށް އިންތިޚާބު ވަޑައިގަންނަވައިފިއެވެ.
މެދުއިރުމަތީގެ އެންމެ އާބާދީ ބޮޑު ޤައުމު ކަމުގައިވާ މިޞްރުގެ ރިޔާސީ އިންތިޚާބުގެ ވޯޓުލުން ކުރިއަށް ގެންގޮސްފައި ވަނީ ޑިސެންބަރު 10ން 12 އަށެވެ. އިންތިޚާބުގައި ސީސީ ކުރި ހޯއްދަވާފައި ވަނީ ވޯޓުގެ 89.6 އިންސައްތަ ކާމިޔާބު ކުރައްވައިގެންނެވެ.
މިޞްރުގެ އިންތިޚާބާ ބެހޭ އިދާރާއިން ބުނީ، ރިޔާސީ އިންތިޚާބުގައި ވޯޓުލުމުގެ ޙައްޤު ލިބިފައިވާ 67 މިލިޔަން މީހުންގެ ތެރެއިން 66.8 އިންސައްތަ މީހުން ވޯޓު ލާފައިވާ ކަމުގައެވެ. އޭގެ ތެރެއިން 39 މިލިޔަނެއްހާ މީހުން ވަނީ ސީސީއަށް ތާޢީދު ކޮށްފައެވެ. މިޞްރުގައި ރިޔާސީ އިންތިޚާބު ބާއްވާފައި މި ވަނީ ސަރަޙައްދީ ބޮޑެތި މައްސަލަތަކެއް ނިއުޅެމުން ދިޔަ ދަނޑިވަޅެއްގައި ކަން ފާހަގަ ކޮށްލަން ޖެހެއެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޢުދުވާނެއް ފަށާފައިވާ މި ދަނޑިވަޅުގައި، މިޞްރަށް ވެސް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. އޭގެ ތެރޭގައި، އެ ޤައުމުގެ އިޤުތިޞާދަށް ކުރިމަތިވެފައިވާ ހީނަރު ކަމާއި، ތަކެތީގެ އަގުތައް އިންތިހާއަށް އުފުލުމާއި، ފައިސާގެ އަގު ވެއްޓުން ފާހަގަ ކޮށްލަން ޖެހެއެވެ. މިއީ، ސީސީއަށް އިންތިޚާބު ކާމިޔާބު ކުރެއްވުމަށް ހުރި ހުރަސްތަކެއްގެ ގޮތުގައި ކުރިން ބެލެވުނެވެ.
މީގެ ތެރެެއިން ވެސް މިޞްރުގެ އިޤުތިޞާދީ ހާލަތާ ގުޅިގެން ވޯޓުގެ ނަތީޖާއަށް އަަސަރުތަކެއް ކުރާނެ ކަމަށް ގިނަ ބަޔަކު ޤަބޫލު ކުރިއެވެ. މިޞްރުގެ އިޤުތިޞާދު އަނދަވަޅަކަށް ވެއްޓިފައިވާއިރު، ތަކެތީގެ އަގުތައް ވަނީ 40 އިންސައްތައަށް އުފުލިފައެވެ. އަދި، އެ ޤައުމުގެ ފައިސާގެ އަގު ވަނީ ދެބައިކުޅަ އެއްބައި ދަށްވެފައެވެ. މިޞްރަށް މިހާރު ކުރިމަތިވެފައިވާ އިޤުތިޞާދީ ޙާލަތުގެ ކުރިން ވެސް 106 މިލިޔަން މީހުންގެ އާބާދީއެއް އޮންނަ މިޞްރުގެ އާބާދީގެ ދެބައިކުޅަ އެއްބައި ރައްޔިތުން ދިރުއުޅެމުން ގޮސްފައި ވަނީ ފަޤީރު ހާލުގައެވެ.
މި ހުރިހާ ގޮންޖެހުންތަކެއް ހުރި ނަމަވެސް، ސީސީއަށް އިންތިޚާބު ކާމިޔާބު ކުރައްވަން ފަސޭހަވި ސަބަބުތަކެއް އެބަހުއްޓެވެ. އޭގެ ތެރެއިން އެއް ސަބަބަކީ، މިޞްރުގައި ހަރުދަނާ އިދިކޮޅު ޕާޓީއެއް ނެތުމެވެ. އަދި، އިންތިޚާބުގައި އޭނާއާ ވާދަ ކުރެއްވި ކެނޑިޑޭޓުންނަށް ބޮޑު ތަރުހީބެއް ނެތުމެވެ. ސީސީގެ ވެރިކަމުގައި، އޭނާގެ ސަރުކާރާ ދެކޮޅު އެތަކެއް ހާސް ބަޔަކު ސިޔާސީ ކުށްވެރިންގެ ގޮތުގައި ވަނީ ޖަލަށް ލައިފައެވެ. އަދި، ޣައްޒާގައި ޔަހޫދީން ހިންގަމުންދާ ލާއިންސާނީ އުދުވާނާ ގުޅިގެން، ރިޔާސީ އިންތިޚާބުގެ ކެމްޕޭނަށް ޢާންމު ރައްޔިތުން ދީފައިވާ އަހަންމިއްޔަތު ކަން ކުޑަ ކަމުގައި ވެސް މަސްރަޙު ދިރާސާ ކުރާ ފަރާތްތަކުން ބުނެއެވެ.
އިންތިޚާބުގައި ސީސީއާ ވާދަ ކުރައްވާފައިވާ ކެނޑިޑޭޓުންނަކީ އިޖިޕްޝަން ސޯޝަލް ޑިމޮކްރެޓިކް ޕާޓީގެ ކެނޑިޑޭޓު ފަރީދު ޒަހްރާނާއި، އަލް-ވަފްދު ޕާޓީގެ ކެނޑިޑޭޓު ޢަބްދުއްސަނަދީ ޔަމާމަތާއި، ރިޕަބްލިކަން ޕީޕަލްސް ޕާޓީގެ ކެނޑިޑޭޓު ޙާޜިމް ޢުމަރެވެ. މިޞްރުގެ ރައީސް ކަމުގެ މަޤާމަށް ސީސީ އިންތިޚާބުވެ ވަޑައިގެންނެވީ މުސްލިމް ބްރަދަރހުޑްގެ ކުރީގެ ރައީސް މުޙައްމަދު މުރްސީގެ ވެރިކަން ވައްޓައިލުމަށް ފަހު 2013 ވަނަ އަހަރުއެވެ.
އެއަށްފަހު، 2014 އަދި 2018 ވަނަ އަހަރު ބޭއްވި ރިޔާސީ އިންތިޚާބުތައް ސީސީ ވަނީ ބޮޑު އަޣުލަބިއްޔަތަކުން ކާމިޔާބު ކުރައްވައިފައެވެ. އޭނާއަކީ މިޞްރުގެ އަސްކަރިއްޔާގައި ގިނަ އަހަރުތަކެއް ވަންދެން ޚިދުމަތް ކުރައްވާފައިވާ ބޭފުޅެކެވެ.