ލުބުނާނުގެ ސަރަޙައްދީ ރޮނގު ކައިރީގައި ޤާއިމުކޮށްފައިވާ ޔަހޫދީ އަސްކަރިއްޔާގެ ތިން މަރުކަޒަކަށް އަމާޒުކޮށް ޙަމަލާދީފައިވާ ކަމަށް ލުބުނާނުގައި ޙަރަކާތްރެރިވާ ހިޒްބުالله ޖަމާޢަތުން ބުނެފިއެވެ. އެ ޙަމަލާތަކުގައި ޔަހޫދީ އަސްކަރިއްޔާގެ ގިނަ ބަޔަކު މަރުވެ، އެތައް ބަޔަކު ޒަޚަމްވެފައިވާ ކަމަށް ޙިޒްބުﷲން ބުނެއެވެ.
ޙިޒްބުﷲން ޙަމަލާތައް އަމާޒުކޮށްފައިވާ ޔަހޫދީންގެ ސަރަޙައްދުތަކަކީ ރަމީމް ޝަމާލީއާއި މުޠުލާގައި ހުންނަ މަރުކަޒުތަކެވެ. އެ ދެ ސަރަޙައްދުގެ އިތުރުން ލުބުނާނުގެ ސަރަޙައްދީ ރޮނގު ކައިރީގައި އޮންނަ ޔަހޫދީންގެ އަސްކަރީ މަރުކަޒަކަށް ވެސް މިސައިލު ޙަމަލާއެއް ޙިޒްބުﷲން ވަނީ ދީފައެވެ.
ޙިޒްބުﷲއާއި ޔަހޫދީންގެ ފައުޖުތަކުން ބަދަލުކުރަމުންދާ ޙަމަލާތަކަކީ 2006 ވަނަ އަހަރު ދެ ޤައުމުން ކުރި ހަނގުރާމައަށްފަހު ހިނގާ އެންމެ ނުރައްކާތެރި ޙަމަލާތަކެވެ. ލުބުނާނުގެ ސަރަޙައްދީ ރޮނގު ކައިރީގައި ދެ ފަރާތުގެ ޙަމަލާތައް ވަރުގަދަކޮށްފައިވަނީ އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ދެމުންގެންދާ ލާއިންސާނީ ރަޙުމުކުޑަ ޙަމަލާތަކާ ގުޅިގެންނެވެ.