ފަލަސްޠީނުގެ ރައްޔިތުންނާ ދެކޮޅަށް ލާއިންސާނީ ޖަރީމާތައް ހިންގަމުންދާ ހައްދުފަހަނަ އަޅާފައިވާ ޔަހޫދީންނާ ދެކޮޅަށް ހަރުކަށި ފިޔަވަޅުތަކެއް އަޅަން ތާޢީދު ކުރައްވާ ކަމުގައި ވިލާތުގެ އިއްތިހާދު (އީ.ޔޫ) ކޮމިޝަނުގެ ރައީސާ އުރްސުލާ ފޮންޑެ ލަޔަން ވިދާޅުވެއްޖެއެވެ. ހައްދުފަހަނަ އަޅާފައިވާ ޔަހޫދީންނޭ ވިދާޅުވެ އޭނާ އިޝާރާތް ކުރައްވާފައި މި ވަނީ، ފަލަސްޠީނުގެ ބިންތަކުގައި ވަޒަންވެރި ކޮށްފައިވާ ޔަހޫދީންނަށެވެ.
"ހައްދުފަހަނަ އެޅި ޔަހޫދީންގެ ކިބައިން ފަލަސްޠީނުގެ ރައްޔިތުންނަށް ދަނީ ބޮޑެތި އަނިޔާތައް ލިބެމުން. މިއީ، މެދުއިރުމަތީގައި ދެމެހެއްޓެނިވި ގޮތެއްގައި ސުލްޙަ ގާއިމު ކުރަން ކުރަމުންދާ މަސައްކަތްތަކަށް އޮތް ބޮޑު ހުރަހެއް. އަދި، އެ ސަރަޙައްދުގެ ހަމަޖެހުން ދަމަހައްޓަން އޮތް ހުރަހެއް،" ފޮންޑެ ލަޔަން ވިދާޅުވިއެވެ. އޭނާ މި މޭރުމުން ވާހަކަފުޅު ދައްކަވާފައި ވަނީ އީ.ޔޫގެ ޤާނޫނު ހަދާ މަޖިލީހުގެ މެންބަރުންނާ މުޚާތަބް ކުރައްވައި ވާހަކަފުޅު ދައްކަވަމުންނެވެ.
"ހުޅަނގު އައްސޭރީގައި ދިރިއުޅޭ ޔަހޫދީންނާ ދެކޮޅަށް ދަތިކުރުމުގެ ފިޔަވަޅުތައް އަޅަން އަޅުގަނޑު ތާޢީދު ކުރަން. އެ މީހުން ޖަވާބުދާރީ ކުރުވެން ޖެހޭނެ. މިއީ، ޙަމާސް ޖަމާޢަތާ ދެކޮޅަށް ޔަހޫދީ ފައުޖުން ފަށާފައިވާ ހަނގުރާމައާ ގުޅުމެއް ހުރި ކަމެއް ނޫން. ހައްދުފަހަނަ އެޅި ޔަހޫދީން ހުއްޓުވަން ޖެހޭ،" ފޮންޑެ ލަޔަން ވިދާޅުވިއެވެ.
އޭނާ މިހެން ވިދާޅުވެފައިވާއިރު، އީ.ޔޫގެ ޚާރިޖީ ސިޔާސަތާ ބެހޭ މުޝީރު ޖޮސެފް ބޮރެލް ވެސް ވަނީ ހައްދުފަހަނަ އަޅާފައިވާ ޔަހޫދީންނާ މެދު އަޅާނެ ފިޔަވަޅުތަކަކާ މެދު ވިސްނަމުންދާ ކަމުގައި ވިދާޅުވެފައެވެ. ނަމަވެސް، އީ.ޔޫއަށް މި ފަދަ ނިންމުމެއް ނިންމޭނީ އެ އިއްތިހާދުގެ 27 މެންބަރު ޤައުމުގެ ތާޢީދު ލިބިގެންނެވެ. ފަލަސްޠީނުގައި ޔަހޫދީން ހިންގަމުންދާ ގަތުލުއާންމާ ގުޅޭ ގޮތުން އެ އިއްތިހާދުގެ މެންބަރު ޤައުމުތަކުގެ މެދުގައި ޚިޔާލު ތަފާތުވުންތަކެއް އުފެދިފައިވާ ކަން ފާހަގަ ކޮށްލަން ޖެހެއެވެ.
ހައްދުފަހަނަ އެޅި ޔަހޫދީންނާ ދެކޮޅަށް ފިޔަވަޅު އެޅުމާ މެދު އީ.ޔޫން ވިސްނަމުންދާއިރު، އެމެރިކާއިން ވެސް ދާދި ފަހުން ވަނީ ހައްދުފަހަނަ އެޅި ޔަހޫދީންނާ ދެކޮޅަށް ފިޔަވަޅުތަކެއް އެޅުމަށް ނިންމާފައެވެ. އެމެރިކާއިން ބުނީ، ހުޅަނގު އައްސޭރީގައި ފަލަސްޠީނުގެ ރައްޔިތުންނާ ދެކޮޅަށް ލާއިންސާނީ ޖަރީމާތައް ހިންގާ ޔަހޫދީންނަށް ވިސާ ދޫ ކުރުން އެ ޤައުމުން ހުއްޓައިލާފައިވާނެ ކަމުގައެވެ.
އީ.ޔޫގެ މެންބަރު ޤައުމުތަކުގެ ތެރެއިން ފަަލަސްޠީނާ އެއްކޮޅަށް ވަކާލާތު ކުރަމުން ދަނީ މަދު ޤައުމުތަކެކެވެ. އޭގެ ތެރޭގައި ސްޕެއިން ހިމެނެއެވެ. "މިހާރު ކަންތައް ކޮޅުން ލައިފި. ފަލަސްޠީނުގެ ޢާންމު ރައްޔިތުން ޝަހީދު ކުރުން ހުއްޓުމަކަށް ގެންނަން ޖެހޭ. ޣައްޒާއަށް ބޮންއެޅުން ހުއްޓައިލަން ޖެހޭ،" ސްޕެއިންގެ ބޮޑުވަޒީރު ޕެދްރޯ ސަންޗޭޒް ވިދާޅުވިއެވެ.
އޮކްޓޫބަރު 7 ވަަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ އުދުވާންތަކުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,600 އަށް އުފުލިފައެވެ. އޭގެ ތެރޭގައި 6,000 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 50,000 އަށް އުފުލިފައެވެ.