ދެވަނަ ޑިވިޝަން ފުޓްބޯޅަ މުބާރާތް ކުރިއަށްގެންދިޔުމަށް ކުރިމަތިވެފައިވާ ދަތިތަކާ ގުޅޭގޮތުން ކުޅިވަރާ ބެހޭ ވަޒީރު ޢަބްދުﷲ ރާފިޢު އާއެކު މެޖޯރިޓީ ކުލަބުތަކުން މަޝްވަރާކޮށްފިއެވެ.
ޖުމްލަ 15 ޓީމާއެކު ދެވަނަ ޑިވިޝަން މި މަހުގެ ތެރޭގައި ބޭއްވުމަށް މަސައްކަތްކުރަމުން އަންނައިރު، މުބާރާތް އެންމެ ފުރަތަމަ ބާއްވަން ތާވަލުކުރީ މިދިޔަ ނޮވެމްބަރު މަހުގެ 20 ވަނަ ދުވަހެވެ. އެއަށްފަހު އޭގެ ފަސް ދުވަސް ފަހުން މުބާރާތް ފަށާނެކަމަށް ވާހަކަ ދެކެވުނު ނަމަވެސް، އެފްއޭއެމުން ފަހުން ވަނީ މި މަހުގެ 10 ވަނަ ދުވަހު މުބާރާތް ފަށާނެކަން ހާމަކޮށްފައެވެ.
ނަމަވެސް އެ ތާރީޚުގައިވެސް މުބާރާތް ފެށިފައި ނުވާއިރު، އެ އިދާރާގެ އެކްޓިން ޖެނެރަލް ސެކްރެޓަރީ ޖައުޝަން ޝަރީފް ވަނީ މުބާރާތް އެ ތާރީޚަށްވުރެ ފަސްވާނެ ކަމަށާއި, ފަށާނެ ދުވަސް ވަރަށް އަވަހަށް އިއުލާންކުރާނެ ކަމަށް މި މަހުގެ ކުރީކޮޅު ވިދާޅުވެފައެވެ. ނަމަވެސް މިހާތަނަށް އައިރުވެސް މުބާރާތް ފަށާނެ ތާރީޚެއް ފައިނަލް ކޮށްފައެއް ނުވެއެވެ.
އެއާއެކު މިއަދުގެ ވަގުތެއްގައި ދެވަނަ ޑިވިޝަނުގައި ވާދަކުރާ ކުލަބުތަކުގެ އިސް އޮފިޝަލުން ވަނީ ކުޅިވަރާ ބެހޭ ވަޒީރު ޢަބްދުﷲ ރާފިޢުއާ ބައްދަލުކޮށްފައެވެ. އަދި މި ބައްދަލުވުމުގައި ވަނީ އެ މުބާރާތް ކުރިއަށްގެންދިޔުމަށް ކުރިމަތިވެފައިވާ ދަތިތަކާ ގުޅޭގޮތުން މަޝްވަރާކޮށްފައެވެ.
ދެވަނަ ޑިވިޝަން ފުޓްބޯޅަ މުބާރާތަކީ ގިނަ ޓީމުތަކަކުން ދުރާލާ ތައްޔާރުވަމުން އަންނަ އެއް މުބާރާތެވެ. އަދި މިހާރު ދިވެހި ފުޓްބޯޅައިގައި ޓީމުތަކުން ކުރާ ޚަރަދުތަކަށް ބަލާއިރު އެންމެ އަގުބޮޑު މުބާރާތެވެ. ތިންވަނަ ފަހަރަށް މި މުބާރާތް ފަސްކުރަން އެފްއޭއެމުން ނިންމިއިރު، ގިނަ ކުލަބުތަކަކުން ވަނީ ބޮޑު ޚަރަދުތަކެއްވެސް ކޮށްފައެވެ. އަދި ގިނަ ބިދޭސީ ކުޅުންތެރިންތަކެއްވެސް ވަނީ ގެނެސްފައެވެ.
އެގޮތުން މި އަހަރުގެ މުބާރާތަށް އެންމެ ބޮޑު ތައްޔާރުވި ދެ ޓީމު ކަމަށްވާ ނިއު ރޭޑިއަންޓް ސްޕޯޓްސް ކުލަބާއި ވިކްޓްރީ ސްޕޯޓްސް ކުލަބުން ވަނީ ބިދޭސީ ކުޅުންތެރިންނާއި، ފުރަތަމަ ޑިވިޝަނުގެ ވަރުގަދަ ކުޅުންތެރިންނާއެކު ވަރުގަދަ ސްކޮޑުތަކެއް އެކުލަވާލާފައެވެ.
އެ ކުލަބުތަކުގެ އިތުރުން ތިންވަނަ ޑިވިޝަނުގެ ތަށި ހޯދައިގެން ދެވަނަ ޑިވިޝަނަށް އެރި ބިސްބުރު ސްޕޯޓްސް ކުލަބާއި، މަސްއޮޑި ސްޕޯޓްސް ކުލަބުންވެސް އަންނަނީ ދެވަނަ ޑިވިޝަނަށް ދުރާލާ ތައްޔާރުވަމުންނެވެ.
މުބާރާތް ލަސްކުރުމާއެކު ދެވަނަ ޑިވިޝަނުގައި ވާދަކުރާ ގިނަ ކުލަބުތަކަށް ބޮޑު ގެއްލުމެއް ލިބޭނެ ކަމަށް އެ ކުލަބުތަކުން ވަނީ މީގެ ކުރިންވެސް ބުނެފައެވެ. ދެވަނަ ޑިވިޝަން ބޭއްވުމަށް އެފްއޭއެމަށް ދަތިތަކެއް ކުރިމަތިވެފައިވާއިރު، އެ މުބާރާތް ހިންގުމަށް އުޖޫރައެއް ނެގުމެއްނެތި ކުރިއަށްދާން، ތައްޔާރުކަމަށް ބުރު ސްޕޯޓްސް ކުލަބާއި އަންހެން ގައުމީ ފުޓްބޯޅަ ޓީމުގެ ކޯޗު މުޙައްމަދު ނިޒާމް (ނިޒާމްބެ) ވަނީ މީގެ ކުރިން ހާމަކޮށްފައެވެ.