ޢާންމު ރައްޔިތުންނާ ދެކޮޅަށް ބޭނުން ކުރުން މަނާކޮށްފައިވާ ނުރައްކާތެރި ހަތިޔާރެއް ކަމުގައިވާ ވައިޓް ފޮސްފޮރަސް އެކުލެވޭ ހަތިޔާރު ހުރި ކަމަށް ޔަހޫދީ ފައުޖުން އެންމެ ފަހުން އެއްބަސްވެެއްޖެއެވެ. ނަމަވެސް، ޣައްޒާގެ މުސްލިމުންނާއި ލުބްނާނުގެ ޢާންމު ރައްޔިތުންނަށް ޙަމަލަދޭން ވައިޓް ފޮސްފޮރަސް ބޮން ބޭނުންކޮށްފައިވާ ކަމަށް އެއްބަސްވާން ޔަހޫދީން އަދިވެސް ދަނީ ދެކޮޅު ހަދަމުންނެވެ.
ވައިޓް ފޮސްފޮރަސް އެކުލެވޭ ބޮންތަކެއް ހުރި ކަމަށް ޔަހޫދީ ފައުޖުން އެއްބަސްވެފައި ވަނީ، ލުބުނާނުގެ ދެކުނުގައި އޮންނަ ރަށަކަށް އެ ފަދަ ބޮންތަކެއް ބޭނުން ކޮށްގެން ޔަހޫދީ ފައުޖުން ރަޙުމު ކުޑަ ޙަމަލާތަކެއް ދީފައިވާ ކަން އެމެރިކާގެ ނޫހަކުން ރިޕޯޓު ކުރުމުންނެވެ. އެމެރިކާގެ ނޫހެއް ކަމުގައިވާ ވޮޝިންޓަން ޕޯސްޓުން ބުނީ، ލުބުނާނުގެ ދެކުނުގައި އޮންނަ ދަހީރާއަށް ޔަހޫދީ ފައުޖުން އޮކްޓޫބަރު 16 ވަނަ ދުވަހު ދިން ރަޙުމު ކުޑަ ޙަމަލާތަކެއްގައި ވައިޓް ފޮސްފޮރަސް ބޮން ބޭނުން ކޮށްފައިވާ ކަން ހާމަވެފައިވާ ކަމުގައެވެ.
ދަހީރާއަކީ ލުބުނާނާއި ޔަހޫދީ ދަޢުލަތާ ގުޅޭ ސަރަޙައްދީ ރޮނގު ކައިރީގައި އޮންނަ ރަށެކެވެ. އެ ރަށަށް ޙަމަލާ ދޭން ޔަހޫދީން ބޭނުން ކޮށްފައި ވަނީ އެމެރިކާއިން ފޯރު ކޮށްދީފައިވާ ވައިޓް ފޮސްފޮރަސް ބޮންތަކެއް ކަމުގައި ވެސް އެ ނޫހުން ރިޕޯޓު ކޮށްފައިވެއެވެ. މި ކަމާ ގުޅިގެން ވައިޓް ހައުސުން ވަނީ ކަންބޮޑުވުން ފާޅު ކޮށްފައެވެ.
އިންސާނީ ޙައްޤުތަކަށް ވަކާލާތު ކުރާ ޖަމުޢިއްޔާއެއް ކަމުގައިވާ އެމްނެސްޓީ އިންޓަރނޭޝަނަލުން ވަނީ، ވައިޓް ފޮސްފޮރަސް ބޮން ބޭނުން ކޮށްގެން ދަހީރާގެ ރައްޔިތުންނަށް ދީފައިވާ ޙަމަލާތަކުގެ ފުރިހަމަ ތަހުޤީޤެއް ހިންގުމަށް ގޮވައިލާފައެވެ. ދަހީރާގެ ރައްޔިތުންނާ ދެކޮޅަށް ޔަހޫދީ ފައުޖުން ހިންގާފައި ވަނީ ހަނގުރާމައިގެ ކުށެއް ކަމުގައި ވެސް އެ ޖަމުޢިއްޔާއިން ސިފަ ކުރިއެވެ. ދަހީރާއަށް ދިން ޙަމަލާތަކުގައި ނުވަ މީހުން ޒަޚަމުވެފައިވާ ކަމަށާއި، އޭގެ ތެރެއިން ތިން މީހަކަށް ހޮސްޕިޓަލުގައި އެޑްމިޓުކޮށްގެން ފަރުވާ ދީފައިވާ ކަމުގައި ރިޕޯޓުތައް ބުނެއެވެ.
ދަހީރާގެ ރައްޔިތުންނާ ދެކޮޅަށް ޔަހޫދީ ފައުޖުން ހަނގުރާމައިގައި ބޭނުން ކުރުން މަނާ ހަތިޔާރު ބޭނުން ކޮށްފައިވާ ކަން ފަޅާއަރާފައި މި ވަނީ، ޣައްޒާގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި އެމެރިކާއިން ފޮނުވާފައިވާ 22,000 އަށްވުރެ ގިނަ ޔަހޫދީ ފައުޖުން ބޭނުން ކޮށްފައިވާ ކަން ހާމަވެފައިވާ ދަނޑިވަޅެއްގައެވެ. މި ކަން ވެސް ފަޅާއަރުވައިލާފައި ވަނީ ވޮޝިންޓަން ޕޯސްޓުންނެވެ.
އެ ނޫހުން ބުނީ، އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި އެމެރިކާއިން ފޮނުވާފައިވާ 22,000 އަށްވުރެ ގިނަ 'ގައިޑެޑް' އަދި 'އަންގައިޑެޑް' ބޮން ބޭނުން ކޮށްފައިވާ ކަން، އެމެރިކާ ސަރުކާރުން އެ ޤައުމުގެ ޤާނޫނު ހަދާ މަޖިލިސް ކަމުގައިވާ ކޮންގްރެސްއާ ހިއްސާ ކޮށްފައިވާ ލިޔެކިޔުންތަކުން ހާމަވާ ކަމުގައެވެ.
އެ ނޫހުން ބުނީ، ޣައްޒާގެ މުސްލިމުންގެ ގެދޮރާއި ހޮސްޕިޓަލްތައް ސުންނާފަތި ކުރުމުގައި އެމެރިކާއިން ފޮނުވާފައިވާ ހަތިޔާރުތަކުން ބޮޑު ދައުރެއް އަދާ ކޮށްފައިވާ ކަމުގައެވެ. އަދި، ޔަހޫދީންގެ އުުދުވާނުގެ ފުރަތަމަ ހަ ހަފުތާގެ ތެރޭގައި އެމެރިކާއިން އިސްރާޢީލަށް 15,000 ބޮން ފޮނުވާފައިވާ ކަމަށާއި، އޭގެ ތެރޭގައި 2,000 އެއްހާ 'ބަންކަރ ބަސްޓަރ' ބޮން ހިމެނޭ ކަމުގައެވެ. މީގެ އިތުރުން، އިސްރާޢީލުގެ އަސްކަރީ ޓޭންކުތަކާއި އާޓިލަރީ ބަޑިތަކަށް ބޭނުންވާ 50,000 އެއްހާ 'ޝެލް' ނުވަތަ ބޮން އެމެރިކާއިން ފޯރުކޮށްދީފައިވާ ކަމުގައެވެ.
އެމެރިކާއިން ފޯރުކޮށްދެމުންދާ ބޮންތައް ބޭނުން ކުރުމުގައި ޔަހޫދީން ބައިނަލްއަޤުވާމީ ޤާނޫނުތަކަށް އަމަލު ކުރަމުންދާ ކަން އެމެރިކާގެ ސަރުކާރުން ބަލަމުން ނުދާ ކަން ހާމަވެފައިވާ ކަމުގައި ވެސް ވޮޝިންޓަން ޕޯސްޓުން ރިޕޯޓު ކުރެއެވެ. ނަމަވެސް، އެމެރިކާއިން މިހާރު ވެސް ދަނީ ޔަހޫދީންނަށް އިތުރު ހަތިޔާރު ފޯރުކޮށްދޭން މަސައްކަތް ކުރަމުންނެވެ. މި ގޮތުން، 106.5 މިލިޔަން ޑޮލަރުގެ އަގުހުރި 14,000 ޝެލް އިސްރާޢީލަށް ފޮނުވަން އެމެރިކާގެ ޚާރިޖީ ވުޒާރާއިން ޑިސެންބަރު 9 ވަނަ ދުވަހު ވަނީ ނިންމާފައެވެ. އެ ތަކެތި ޔަހޫދީންނަށް ފޯރުކޮށްދޭން ނިންމާފައި ވަނީ ކޮންގްރެސްގެ ހުއްދައާ ނުލައި ކަން ވެސް ފާހަގަ ކޮށްލަން ޖެހެއެވެ.