ޔަހޫދީ ފައުޖުތަކުން ޣައްޒާގެ އުތުރުގެ ސަރަޙައްދުތަކަށް ދިން ޙަމަލާއެއްގައި އަލްޖަޒީރާގެ ނޫސްވެރިޔާ ޢަނަސް އަލް ޝަރީފްގެ ބައްޕަ ޝަހީދުކޮށްލައިފިއެވެ.
ޔަހޫދީ ފައުޖުތަކާއި ޣައްޒާގައި ވެރިކަންކުރާ ޙަމާސް ޖަމާޢަތާ ދެމެދު އޮކްޓޫބަރު ހަތް ވަނަ ދުވަހުން ފެށިގެން ކުރަމުންދާ ހަނގުރާމަ ރިޕޯޓުކުރަމުން އަންނަ ޢަނަސްގެ 65 އަހަރުވީ ބައްޕަ ޖަމާލް، ޝަހީދުކޮށްލާފައި ވަނީ ޣައްޒާގެ ޖަބަލިޔާ ރެފިއުޖީ ކޭމްޕަށް ޔަހޫދީ ފައުޖުތަކުން ދިން ޙަމަލާއެއްގައެވެ. އެ ޙަމަލާގައި ޢަނަސްމެންގެ ގެ ވަނީ އެއްކޮށް ސުންނާފަތިކޮށްލައިފައެވެ.
ޔަހޫދީ ފައުޖުތަކުން ޣައްޒާއަށް ޙަމަލާތައް ދޭން ފެށުމުން ޢަނަސްގެ ޢާއިލާ ވަނީ އދގެ ރެފިއުޖީ ކޭމްޕަކަށް ބަދަލުވެފައެވެ. ނަމަވެސް އެމީހުންނާއެކު ޖަމާލަށް ނުދެވުނީ އޭނާގެ ބަލި ޙާލަތު ހުރި ގޮތުންނެވެ.
ބައްޕަ ޝަހީދުކޮށްލި ނަމަވެސް ޙަބަރުތައް ގެނެސްދިނުމުގައި ސާބިތުކަމާއެކު ހުންނާނެ ކަމަށް ޢަނަސް ބުންޏެވެ.
"އަޅުގަނޑުމެން ބައްޕަގެ ހަށިގަނޑު ވަޅުލީ މިތަނުގައި މީހުން ހީޔާހިވަހިކަން ހޯދައިގެން ތިބި ސްކޫލްގައި. އެއީ މިވަގުތު މި ސަރަޙައްދުން ބޭރުވެވެން ނެތިގެން. ބައްޕަ ޝަހީދުކޮށްލި ނަމަވެސް މަސައްކަތުގައި ދެމިހުންނާނަން." ޢަނަސް ބުންނެވެ.
ފާއިތުވި ދެ މަސް ދުވަހުގެ ތެރޭގައި ޖައްބާރު ޔަހޫދީ ފައުޖުތަކުން ޣައްޒާގެ އާންމުންނަށް އަމާޒުކޮށް ދިން ޙަމަލާތަކުގައި ޣައްޒާގައި ތިބި އަލްޖަޒީރާގެ ބައެއް ނޫސްވެރިންގެ އާއިލާގެ މެމްބަރުން ވަނީ ޝަހީދުކޮށްލައިފައެވެ.
އޮކްޓޯބަރު 25 ވަނަ ދުވަހު ޣައްޒާގެ ނުޞައިރަތު ރެފިއުޖީ ކޭމްޕަށް ޔަހޫދީ އަސްކަރިއްޔާއިން ދިން ޙަމަލާގައި ޣައްޒާގައި ހުންނަ އަލްޖަޒީރާގެ ޢަރަބި ނޫސްވެރިޔާ ވާއިލް ދަހުދޫހުގެ އަންހެނުންނާއި، ފިރިހެން ދަރިފުޅާއި އަންހެން ދަރިފުޅު އަދި ކާފަ ދަރިފުޅު ވަނީ ޝަހީދުކޮށްލައިފައެވެ.
އޮކްޓޫބަރު 31 ވަނަ ދުވަހު ޣައްޒާގައި ހުންނަ ޖަބަލިއާ ރެފިއުޖީ ކޭމްޕަށް ޔަހޫދީ އަސްކަރިއްޔާއިން ދިން ވައިގެ ޙަމަލާއެއްގައި ޣައްޒާގައި ހުންނަ އަލްޖަޒީރާ ބިއުރޯގެ ބްރޯޑްކާސްޓް އިންޖިނިއަރެއް ކަމަށްވާ މުޙައްމަދު އަބޫ އަލް ޤުމްސަންގެ ބައްޕައާއި ދެ އަންހެން ކޮއްކޮ ހިމެނޭހެން އެ ޢާއިލާގެ 19 މެމްބަރަކު ވަނީ ޝަހީދުކޮށްލައިފައެވެ.
އަލްޖަޒީރާ ޢަރަބި ޗެނަލްގެ މުވައްޒަފު، މޫމިން އަލް ޝަރަފީގެ އާއިލާގެ 22 މީހަކު ޝަހީދުކޮށްލައިފައި ވަނީ ޑިސެމްބަރު މަހުގެ ހަ ވަނަ ދުވަހު ޖަބަލިއާ ރެފިއުޖީ ކޭމްޕަށް ޔަހޫދީ އަސްކަރިއްޔާއިން ދިން ވައިގެ ހަމަލާއެއްގައެވެ.
އަލްޖަޒީރާގެ މުވައްޒަފު ޔުމްނާ އެލްސައިދުގެ ޢާއިލާއަށް އެމީހުންގެ ގެ ހުސްކުރުމަށާއި، ނޫންނަމަ، ބޮން އަޅާނެ ކަމުގެ އިންޒާރުދީ ޔަހޫދީ އަސްކަރިއްޔާގެ މީހެއް ކަމަށް ބުނާ މީހަކު އޮކްޓޫބަރު މަހު ވަނީ ފޯނު ކޯލެއްވެސް ކޮށްފައެވެ.
ޔަހޫދީ ފައުޖުތަކުން ޣައްޒާއަށް ދެމުންގެންދާ ރަޙުމުކުޑަ ލާއިންސާނީ ޙަމަލާތައް އިތުރަށް ވަރުގަދަ ކުރަމުން އަންނައިރު، އޮކްޓޫބަރު މަހުގެ ހަތް ވަނަ ދުވަހުން ހަނގުރާމަ ފެށުނީއްސުރެ މިހާތަނަށް 18،000 އަށްވުރެ ގިނަ މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ.