ޣައްޒާގައި ވެރިކަން ކުރާ ޙަމާސް ޖަމާޢަތާ ދެކޮޅަށް ހަރުކަށި ފިޔަވަޅުތަކެއް އެޅުމަށް ވިލާތުގެ އިއްތިހާދުގެ ތިން ޤައުމަކުން އެ އިއްތިހާދަށް ބާރުއަޅަން ފަށައިފިއެވެ. ޙަމާސް ޖަމާޢަތާ ޖައްސައިލާ، އެ ޖަމާޢަތުގެ މުޖާހިދުންނާ ދެކޮޅަށް ހަރުކަށި ފިޔަވަޅުތަކެއް އެޅުމަށް އީ.ޔޫއަށް ގޮވައިލާފައި ވަނީ ފަރަންސޭސިވިލާތާއި، ޖަރުމަނުވިލާތާއި އިޓަލީވިލާތުންނެވެ. އެއީ، ވިލާތުގެ އެންމެ ބޮޑު ތިން ޤައުމު ކަން ފާހަގަ ކޮށްލަން ޖެހެއެވެ.
ޙަމާސްގެ މުޖާހިދުންނާ ދެކޮޅަށް ފިޔަވަޅު އެޅުމަށް ގޮވައިލާ އެ ތިން ޤައުމުގެ ޚާރިޖީ ވަޒީރުން ވަނީ ވިލާތުގެ ޚާރިޖީ ސިޔާސަތާ ބެހޭ މުޝީރު ޖޮސެފް ބޮރެއިއަށް ސިޓީއެއް ފޮނުވާފައެވެ. ބޮރެއިއަށް ސިޓީ ފޮނުވާފައި މި ވަނީ، ޣައްޒާގައި ޔަހޫދީން ހިންގަމުންދާ ގަތުލުއާންމާ ގުޅޭ ގޮތުން އަމަލު ކުރާނެ ގޮތްތަކެއް ކަނޑައެޅުމަށް ވިލާތުގެ ޚާރިޖީ ވަޒީރުންގެ ބައްދަލުވުމެއް ބާއްވަމުން ދިޔަ ދަނޑިވަޅެއްގައެވެ.
"ޙަމާސްއަށް ޢުމްރަނީ ދާއިރާއިންނާއި މާލީ ގޮތުން އެހީތެރިކަން ހޯދަން ކުރަމުންދާ މަސައްކަތްތަކަށް ހުރަސް އަޅަންޖެހޭ. އަދި، ބައިނަލްއަޤުވާމީ މަސްރަޙުގައި އެ ޖަމާޢަތުގެ ބާރު ކަނޑުވައިލަން ޖެހޭ. މި ކަމާ، ފަލަސްޠީނުގެ ރައްޔިތުން މިނިވަން ދަޢުލަތެއް ޤާއިމު ކުރަން ކުރަމުންދާ މަސައްކަތާ އެއްވެސް ގުޅުމެއް ނޯންނާނެ،" ފަރަންސޭސި ވިލާތުގެ ޚާރިޖީވަޒީރު ކެތެރިން ކޮލޮންއާއި، ޖަރުމަނުވިލާތުގެ ޚާރިޖީ ވަޒީރު އަނަލިނާ ބެއަރބޮކާއި އިޓަލީވިލާތުގެ ޚާރިޖީ ވަޒީރު އެންތޯނިޔޯ ތަޔާނީގެ ސިޓީފުޅުގައި ލިޔެފައިވެއެވެ.
ޙަމާސްއަކީ މިހާރު ވެސް ވިލާތުގެ ޓެރެރިސްޓު ޖަމާޢަތްތަކުގެ ލިސްޓުގައި ހިމަނާފައިވާ ޖަމާޢަތެކެވެ. މީގެ އިތުރުން، އެ ޖަމާޢަތުގެ ހަތިޔާރުއެޅި ގޮފީގެ ކޮމާންޑަރ ޖެނެރަލް މުޙައްމަދު ޟަޔިފާއި، އޭނާގެ ނައިބު މަރްވާން ޢީސާގެ އިތުރުން ޣައްޒާގައި ހުންނަ އެ ޖަމާޢަތުގެ އިސްވެރިޔާ ޔަޙްހާ ސިންވާރާ ދެކޮޅަށް ދަތިކުރުމުގެ ފިޔަވަޅުތަކެއް އެޅުމަށް ވިލާތުން ދާދި ފަހުން ވަނީ ނިންމާފައެވެ.
ޙަމާސްއާ ދެކޮޅަށް ދަތިކުރުމުގެ ފިޔަވަޅުތައް ހަރުކަށި ކުރަން ވިލާތުގެ އެންމެ ބޮޑު ތިން ޤައުމުން ގޮވައިލާފައިވާއިރު، ފަލަސްޠީނުގެ މުސްލިމުންނާ ދެކޮޅަށް އަނިޔާވެރިކަން އިސްކުރާ ޔަހޫދީ ވަޒަންވެރިންނާ ދެކޮޅަށް ފިޔަވަޅުތަކެއް އެޅުމަށް ވެސް ވިލާތުގެ ބައެއް އިސްވެރިން ބޭނުންވެއެވެ. އޭގެ ތެރޭގައި ބޮރެއި ވެސް ހިމެނި ވަޑައިގަންނަވައެވެ. އަދި، ފަލަސްޠީނުގެ މުސްލިމުންގެ އިންސާނީ ހައްޤުތަކަށް އަރައިގަންނަ ޔަހޫދީ ވަޒަންވެރިންނާ ދެކޮޅަށް ފިޔަވަޅުތަކެއް އެޅުމަށް ވިލާތުގެ ބައެއް މެންބަރު ޤައުމުތަކުން މިހާރު ވިސްނަމުންދާ ކަން ވެސް ފާހަގަ ކޮށްލަން ޖެހެއެވެ.
ޔަހޫދީން ވަޒަންވެރިންނާ ދެކޮޅަށް އެޅިދާނެ ބައެއް ފިޔަވަޅުތަކުގެ ތެރޭގައި އެ މީހުންނަށް އީ.ޔޫގެ ޤައުމުތަކަށް ދަތުރު ކުރުމަށް ހުރަސް އެޅުން ހިމެނެއެވެ. ފަރަންސޭސިވިލާތުގެ ކޮލޮންއާ ވަނީ މި ކަމަށް ތާޢީދު ކުރައްވާ ކަން ހާމަ ކުރައްވާފައެވެ. ބެލްޖިޔަމްގެ ސަރުކާރުން ވެސް ވަނީ ހައްދުފަހަނަ އަޅާފައިވާ ޔަހޫދީ ވަޒަންވެރިންނަށް ޝެންގެން ވިސާ ދޫކުރުން ހުއްޓައިލުމަށް ގޮވައިލާފައެވެ. ނަމަވެސް، ވިލާތުގެ މެންބަރު ޤައުމުތަކުގެ ތެރޭގައި ހިމެނޭ ޔަހޫދީންނަށް ވަފާތެރި ޤައުމުތަކުން އެ ކަމާ ދެކޮޅު ހަދާނެއެވެ. އެ ޤައުމުތަކުގެ ތެރޭގައި އޮސްޓްރިޔާ، ޗެކް ރިޕަބްލިކް އަދި ހަންގެރީ ފާހަގަ ކޮށްލަން ޖެހެއެވެ.