ވޮލީބޯލް އެސޯސިއޭޝަން ކަޕުގެ ޕްރިލިމިނަރީ ބުރުގެ ކުއާޓާ ފައިނަލް މެޗު ރަންވެލި ސްޕޯޓްސް ކްލަބުން ނުކުޅެ ދޫކޮށްލުމުން އާބަންކޯ އަށް މުބާރާތުގެ ސެމީ ފައިނަލުން ފުރުސަތު ލިބިއްޖެއެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ ޕްރިލިމިނަރީ ބުރުގެ ކުއާޓާގެ މެޗު ރަންވެލި ސްޕޯޓްސް ނުކުޅެ ދޫކޮށްލިއިރު، އެ ޓީމު ޖާގަ ހޯދީ ގުރޫޕުގެ ދެވަނަ ޓީމުގެ ގޮތުގައެވެ. އާބަންކޯ ކުއާޓާއިން ޖާގަ ހޯދީ ގްރޫޕުގައި ކުޅުނު ތިން މެޗުވެސް ކާމިޔާބުކޮށްގެންނެވެ.
މި އާއެކު ރާއްޖޭގެ ގައުމީ ކުޅިވަރު ގޮތުގައި ގިނަ ބަޔަކު ސިފަކުރާ ފުޓްބޯޅައިގައި ހިފާފައިވާ މެޗު ދޫކުރުމުގެ ނުރަނގަޅު އާދަ، ރާއްޖޭގައި ދެ ޖިންސުގެ މެދުގައި އެންމެ މަގުބޫލު ވޮލީބޯޅައަށްވެސް ވަނީ ފޯރާފައެވެ.
ޕްރިލިމިނަރީ ބުރުގެ ކުއާޓާގެ ފުރަތަމަ މެޗުގައި ބައްދަލުކުރީ ގުރޫޕް އެކެއްގެ އެއްވަނަ ހޯދި ކުލަބު ހާފް ލައިން ލިންކޭޖާއި، ގުރޫޕް ދޭއްގެ ދެވަނަ ހޯދި އައްޑޫ ސްޕޯޓްސް ކުލަބެވެ. ފަސް ސެޓު ކުޅެގެން މި މެޗު ކާމިޔާބުކުރީ އައްޑޫ ސްޕޯޓްސްއެވެ. އެ ޓީމުން ސެޓުތައް ގެންދިޔައީ 22-25، 25-17، 25-27، 25-17 އަދި 15-10 އިންނެވެ.
ކުއާޓާގައި ގުރޫޕް ހަތަރެއްގެ ދެވަނަ ހޯދި ސިޓީ ސްޕޯޓްސް ކުލަބާއި ގުރޫޕް ތިނެއްގެ އެއްވަނަ ހޯދި ގުޑީސް ސްޕޯޓްސް ކުލަބު ބައްދަލުކުރި މެޗު ސީދާ ތިން ސެޓުން ކާމިޔާބުކުރީ ސިޓީ ސްޕޯޓްސް ކުލަބުންނެވެ. އެއީ 25-15، 25-11 އަދި 25-13 އިންނެވެ.
މީގެ އިތުރުން ކުއާޓާގެ ފަހު މެޗު ގުރޫޕް ހަތަރެއްގެ އެއްވަނަ ހޯދި އެސްޕިރޭޝަން ފޯ އޯލް އިނީޝީއޭޓިވް (އާއި) އިން މެޗު ކާމިޔާބުކުރީ ގުރޫޕް ތިނެއްގެ ދެވަނަ ހޯދި ބީޖީ ސްޕޯޓްސް ކްލަބާއި ވާދަކޮށް ސީދާ ތިން ސެޓުންނެވެ. އެ ޓީމުން ސެޓުތައް ގެންދިޔައީ 25-13، 25-22 އަދި 25-20 އިންނެވެ.
ޖުމްލަ 15 ޓީމާއެކު މި އަހަރުގެ އެސޯސިއޭޝަން ކަޕް ފިރިހެން ޑިވިޝަން ކުރިއަށްދާއިރު، އެސޯސިއޭޝަން ކަޕަށް ކޮލިފައިވާނީ ޕްރިލިމިނަރީ ބުރުގެ ސެމީ ފައިނަލް މެޗުތަކުން މޮޅުވާ ދެ ޓީމެވެ.