އޭއެފްސީ ކަޕުގައި މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅެން ރާއްޖެ އައީ ޓީމުގެ އެންމެ 13 ކުޅުންތެރިން ކަމަށް އިންޑިއާގެ މޯހަން ބަގާން ސުޕަ ޖަޔަންޓުގެ އެސިސްޓަންޓް ކޯޗު ކްލިފޯޑް މިރަންޑާ ބުނެފިއެވެ.
އޭއެފްސީ ކަޕުގައި މިއަދު ހަވީރު މާޒިޔާއާ ދެކޮޅަށް ނުކުންނަ މެޗަށް މޯހަން ބަގާންގެ ހެޑް ކޯޗާއި ސީނިއާ ގިނަ ކުޅުންތެރިން ބައިވެރިނުވެއެވެ. އެގޮތުން ރާއްޖެ އައި ޓީމުގައި ހިމަނާފައިވަނީ ކަލްކަތާ ލީގުގައި ކުޅެމުން އަންނަ އެ ކުލަބުގެ ރިޒާވް ޓީމުގެ ކުޅުންތެރިންނެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޯހަން ބަގާންގެ އެސިސްޓަންޓް ކޯޗު މިރަންޑާ ބުނީ މި މެޗަށް ރިޒާވް ޓީމުގެ 13 ކުޅުންތެރިން ގެނައިރު، މިއީ ޒުވާން ކުޅުންތެރިންނަށް މި ފެންވަރުގައި ކުޅެން ލިބޭނެ ރަނގަޅު ފުރުސަތެއް ކަމަށެވެ. އަދި ޓީމުގެ މުހިންމު ކުޅުންތެރިން ޓީމާއެކު ދަތުރުނުކުރީ ގާތްގާތުގައި ގިނަ މެޗުތަކެއް ކުޅެން ޖެހުމުން އަނިޔާގެ މައްސަލަތަކެއް ދިމާވުމުން ކަމަށެވެ. އަދި ބައެއް ކުޅުންތެރިން ތިބީ ހުމާ ކަމަށްވެސް ވަނީ ބުނެފައެވެ.
އިންޑިއާގެ ގައުމީ ޓީމަށްވެސް ކުޅުނު މިރާންޑާ ބުނީ މެޗުގައި ކުޅުންތެރިއަކަށް އަނިޔާވެއްޖެނަމަ އުނދަގޫ ހާލަތަކަށްދާނެ ކަމަށާއި، އެހެންނަމަވެސް މި މެޗު ސީރިއަސްކޮށް ނަގާނެ ކަމަށެވެ. އަދި ޓީމުގައި ތިބި ޒުވާން ކުޅުންތެރިންނަށް އިތުބާރުކުރާ ކަމަށާއި، މި ވަގުތު ކުލަބަށް މުހިންމީ އުނދަގޫ ދަނޑިވަޅުގައި ޒުވާން ކުޅުންތެރިން ބޭނުންކުރުން ކަމަށްވެސް ވަނީ ބުނެފައެވެ.
މި މެޗާ ކުރިމަތިލާއިރު، މާޒިޔާ އާއި މޯހަން ބަގާންވެސް ވަނީ މުބާރާތުން ކަޓާފައެވެ. ނޮކްއައުޓް ބުރުގެ ފުރުސަތު އޮތީ އެއްވަނައިގައި އޮތް ބަންގްލަދޭޝްގެ ބަޝުންދަރާ ކިންގްސް އާއި އިންޑިއާގެ އޮޑީޝާ އެފްސީއަށެވެ.
ގައުމީ ފުޓްބޯޅަ ދަނޑުގައި މާޒިޔާ އާއި މޯހަން ބަގާން ބައްދަލުކުރާ މެޗު ފަށާނީ މެންދުރުފަހު ތިނެއް ޖަހާއިރެވެ.