އދގެ ސަލާމަކީ މަޖީލީހަކީ ޔަހޫދީން ޙިމާޔަތް ކުރާ މަޖިލީހެއް ކަމަށް ތުރުކީވިލާތުގެ ރައީސް ރަޖަބް ޠައްޔިބް އުރުދުޣާން ތުޙުމަތުކުރައްވައިފިއެވެ.
އުރުދުޣާން އެ ގޮތަށް ވިދާޅުވެފައި ވަނީ ޔަހޫދީ ފައުޖުތަކުން ފަލަސްޠީނުގެ ޣައްޒާއަށް ދެމުންގެންދާ ޢުދުވާނީ ޙަމަލާތައް މިހާރުން މިހާރަށް ހުއްޓާލުމަށް ގޮވައިލައި ޑިސެމްބަރު 8 ވަނަ ދުވަހު ސަލާމަތީ މަޖިލީހުން ހުށަހެޅި ޤަރާރަށް އެމެރިކާއިން ހުރަސް އެޅުމުންނެވެ.
"އޮކްޓޯބަރު ހަތް ވަނަ ދުވަހުން ފެށިގެން ސަލާމަތީ މަޖިލިސް ވެފައިވަނީ ޔަހޫދީން ޙިމާޔަތްކުރާ މަޖިލީހަކަށް." އުރުދުޣާން ވިދާޅުވިއެވެ. އަދި މިއީ އިންސާފެއްތޯ ސުވާލުކުރައްވައި، ދުނިޔެއަކީ ފަސް ޤައުމަށްވުރެ ބޮޑު ތަނެއް ކަމަށް އުރުދުޣާން ވިދާޅުވިއެވެ. ފަހެއް ކަމަށް ވިދާޅުވެ އުރުދުޣާން އިޝާރާތްކުރެއްވީ ސަލާމަތީ މަޖިލީހުގައި ވީޓޯ ކުރުމުގެ ބާރު އޮތް ފަސް ޤައުމަށެވެ. އެމެރިކާއިން ޔަހޫދީންނަށް އެހީ ވަނީ ފައިސާއާއި އަސްކަރީ ސާމާނު ފޯރުކޮށްދީގެން ކަމަށްވެސް އުރުދުޣާން ވިދާޅުވިއެވެ.
ސަލާމަތީ މަޖީލީހުގެ ޤަރާރަށް އެމެރިކާއިން ހުރަސް އެޅުމުން ވަރަށް މާޔޫސްވި ކަމަށް ތުރުކީވިލާތުގެ ޚާރިޖީ ވަޒީރު ޙަކާން ފިދާންވެސް ވަނީ ވިދާޅުވެފައެވެ.
"އެ މައްސަލައިގައި އެމެރިކާއިން އަނެއްކާވެސް ފާޅުކުރީ އެމެރިކާގެ އެކަނިވެރިކަން. ހާއްސަކޮށް މިއަދު އދގައި ބޭއްވި ވޯޓުގައި،" ވޯޓަށްފަހު ތުރުކީވިލާތުގެ ދަޢުލަތުގެ ޓީވީ، ޓީއާރުޓީއަށް ދެއްވި އިންޓަރވިއުއެއްގައި ޙަކާން ވިދާޅުވިއެވެ.
އެމެރިކާގެ އިތުރުން ޔަހޫދީ ދަޢުލަތުންވެސް ވަނީ ސަލަމާތީ މަޖިލީހުގެ އެ ޤަރާރާ ދެކޮޅު ހަދައިފައެވެ. ޔަހޫދީ ދަޢުލަތާއި އެމެރިކާއިންވެސް ދެކޭ ގޮތުގައި ހަނގުރާމަ ހުއްޓާލައިފިނަމަ، ފައިދާ ވާނީ ޙަމާސަށެވެ.
ހަނގުރާމަ ހުއްޓާލުމަށް ގޮވައިލައި ސަލާމަތީ މަޖީލީހުން ޤަރާރެއް ހުށަހައިޅައިފައި މިވަނީ އެމެރިކާގެ ވާގިވެރިކަމާއެކު ޔަހޫދީ ފައުޖުތަކުން ޣައްޒާއަށް ޢުދުވާނީ ޙަމަލާތައް ދެމުންދާތާ ދެ މަސް ފަހުން ފާހަގަކޮށްލަން ޖެހެއެވެ. އޮކްޓޫބަރު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގެ އާންމުންނަށް އަމާޒުކޮށް ދެމުންގެންދާ ޙަމަލާތަކުގައި މިހާތަނަށް 17،700 ފަލަސްޠީނު މީހުން ވަނީ ޝަހީދުކޮށްލައިފައެވެ.