ޔަހޫދީންގެ އަނިޔާވެރިކަން ހުއްޓާލުމަށް ގޮވާލައި ހުށަހެޅި ޤަރާރަށް އެމެރިކާއިން ހުރަސްްއަޅައިފި

އޮކްޓޫބަރު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ފަލަސްޠީނުގެ ޣައްޒާގައި ހިންގަމުންދާ ޢުދުވާނީ ޙަމަލާތައް މިހާރުން މިހާރަށް ހުއްޓާލުމަށް އދގެ ސަލާމަތީ މަޖިލީހަށް ހުށަހެޅި ޤަރާރު އެމެރިކާއިން ވީޓޯކޮށްފިއެވެ.

ޢަރަބި އެކުވެރި އިމާރާތް (ޔޫއޭއީ)ން އިސްވެ ސަލާމަތީ މަޖިލީހަށް ހުށަހެޅި ޤަރާރަށް 13 ޤައުމަކުން ވަނީ ތާޢީދުކޮށްފައެވެ.

"މިއީ އަހަރުމެން އެކަހެރިވަނީއެއް ނޫން. މިއީ ވީހާވެސް އަވަހަކަށް ހަނގުރާމަ ނިމުމަކަށް ގެނައުމަށާއި، ޣައްޒާއަށް އިތުރު އިންސާނީ އެހީ ފޯރުކޮށްދިނުމަށް އެހީތެރިވުމަށް އަޅުގަނޑުމެންނަށް ފެނުނު އެންމެ ރަނގަޅު ގޮތް." އެމެރިކާއިން އދ އަށް ކަނޑައަޅާފައި ހުންނަވާ ރޮބާޓް ވުޑް ވޯޓުގެ ކުރިން ވިދާޅުވިއެވެ. އެމެރިކާއިން ތާޢީދުކުރަނީ ހަނގުރާމަ ހުއްޓާލުމުގެ ބަދަލުގައި އިންސާނީ އެހީ ފޯރުކޮށްދިނުމަށާއި ޣައްޒާގައި ވެރިކަންކުރާ ޙަމާސް ޖަމާޢަތުގެ ބެލުމުގެ ދަށުގައިވާ ޔަހޫދީން މިނިވަންކުރުމަށެވެ.

އެމެރިކާގެ އިތުރުން ޔަހޫދީ ދަޢުލަތުންވެސް ވަނީ ހަނގުރާމަ ހުއްޓާލުމަށް ދެކޮޅު ހަދާފައެވެ. އެމެރިކާއާއި ޔަހޫދީން ޤަބޫލުކުރާ ގޮތުގައި ހަނގުރާމަ ހުއްޓާލުމުން ފައިދާ ވާނީ ޙަމާސަށެވެ.
އެ ޤަރާރަށް ރުހުން ނުދޭނެ ކަމުގެ އިޝާރާތެއް އެމެރިކާއިން މީގެކުރިންވެސް ވަނީ ދީފައެވެ. ވީޓޯ ކުރުމުގެ ބާރު ލިބިފައިވާ ސަލާމަތީ ކައުންސިލްގެ ދާއިމީ ފަސް މެންބަރު ޤައުމުތަކުގެ ތެރެއިން އެއް މެންބަރު ޤައުމު ކަމަށްވާ އެމެރިކާއިން ވަނީ ޙަމަލާތައް ހުއްޓާލުމަށް ދެކޮޅު ކަމަށް ތަކުރާރުކޮށް ބުނެފައެވެ.

އެމެރިކާގެ އެ ނިންމުން ފަލަސްޠީނުން އެމެރިކާއަށް ކަނޑައަޅާފައި ހުންނަވާ މަންދޫބު ރިޔާދު މަންސޫރު ވަނީ ކުށްވެރިކުރައްވާފައެވެ.

އެ ވޯޓަކީ ޔަހޫދީންނާއި ޙަމާސްއާއި ދެމެދު ހިނގަމުންދާ ހަނގުރާމައިގައި ގޮތެއް ނިންމުމަށް އިއްތިފާޤުވުމަށް 15 މެންބަރުން މަސައްކަތްކުރި ހަ ވަނަ ފަހަރެވެ. އޭގެ ތެރެއިން ކާމިޔާބުވީ އެންމެ ވޯޓެކެވެ. އެއީ ޣައްޒާއަށް އިންސާނީ އެހީތެރިކަން ފޯރުކޮށްދީ، ދެފަރާތުގައި ތިބި އަސީރުންނާއި ޤައިދީން މިނިވަން ކުރުމަށް ޙަމަލާތައް މެދުކަނޑާލުމަށް މިދިޔަ މަހު ނެގި ވޯޓެވެ.

ޑިސެމްބަރު 8 ވަނަ ދުވަހު ނެގި ވޯޓު ނަގާފައި ވަނީ އދގެ ޢާންމު މުއާޙަދާގެ 99 ވަނަ މާއްދާއަށް ޢަމަލުކުރަން ޖެހިދާނެ ކަމަށް އދގެ ސެކްރެޓަރީ ޖެނެރަލް އެންތޯނިއޯ ގުޓަރެސް ވިދާޅުވެފައިވާ ދަނޑިވަޅެއްގައެވެ. އެ މާއްދާގެ ދަށުން ބައިނައަޤުވާމީ ޞުލްޙައާއި ސަލާމަތީ ކަންކަން ދެމެހެއްޓުމަށް މިހާރު އޮތް ޙާލަތު އިތުރަށް ގޯސްވެދާނެ މައްސަލައަކާ ގުޅިގެން ސަލަމާތީ މަޖިލީހުގެ ބައްދަލުވުމެއް ބޭއްވުމަށް ގޮވައިލުމުގެ ހުއްދަ ސެކްރެޓްރީ ޖެނެރަލަށް ލިބިދެއެވެ.

ހަނގުރާމަ ހުއްޓުވުމަށް ކުރި އެތައް މަސައްކަތެއް ނާކާމިޔާބު ވުމުން އދން މިދިޔަ މަހު ވަނީ ޣައްޒާއަށް އިންސާނީ އެހީ ފޯރުކޮށްދިނުމަށް ހަނގުރާމަ މެދުކަނޑާލުމަށް ގޮވައިލައިފައެވެ.

އެމެރިކާއިން ވާގިވެރިވެގެން އޮކްޓޫބަރު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ޢުދުވާނީ ޙަމަލާތަކުގައި މިހާތަނަށް 17،500 މީހުން ވަނީ ޝަހީދުކޮށްލައިފައެވެ.