ލުބްނާނުގައި ހަރަކާތްތެރިވާ ހަތިޔާރުއެޅި ޖަމާޢަތް ޙިޒްބުاللهއިން ޔަހޫދީންގެ ރަށަކަށް އަމާޒުކޮށް ދިން ވަރުގަދަ ޙަމަލައެއްގައި އެކަކު މަރުވެއްޖެއެވެ. ޙިޒްބުاللهގެ ޙަމަލާގެ ސަބަބުން ޔަހޫދީންގެ ބޮޑުވަޒީރު ބެންޖަމިން ނަތަންޔާހޫ ވަނީ ޙިޒްބުاللهއަށް ވަރުގަދަ އިންޒާރެއް ދީފައެވެ. އޭނާ ބުނީ، ޙިޒްބުاللهގެ ޙަމަލަތައް ހުއްޓައިނުލައިފި ނަމަ ޣައްޒާގެ ޚާންޔޫނިސަށް މިހާރު ހަދައިލަމުންދާ ގޮތް ލުބުނާނަށް ވެސް ހަދައިލާނެ ކަމުގައެވެ.
ޒަޔަނިސްޓު އިސްރާޢީލުގެ އުތުރުގައި އޮންނަ ރަށަކަށް ޙިޒްބުاللهއިން ޙަމަލަދީފައި ވަނީ ގައިޑެޑް މިސައިލެއް ބޭނުން ކޮށްގެންނެވެ. މި ޙަމަލާގައި ޔަހޫދީންގެ ޢާންމުންގެ އެކަކު މަރުވެފައިވާ ކަމުގައި އިސްރާޢީލުން ބުނެއެވެ. ޙިޒްބުاللهއިން ޙަމަލަދޭން މަސައްކަތް ކޮށްފައި ވަނީ ޔަހޫދީންގެ އަސްކަރީ ޓޭންކަކަށް ކަމުގައި ވެސް ޔަހޫދީން ބުނެއެވެ.
ޙިޒްބުاللهއިން ބުނީ، ޑިސެންބަރު 7 ވަނަ ދުވަހު އެ ޖަމާޢަތުގެ ހަނގުރާމަވެރިން އިސްރާޢީލުގެ އުތުރުގައިވާ ރަށްތަކަށް އަމާޒުކޮށް 11 ޙަމަލައެއް ދީފައިވާނެ ކަމުގައެވެ. މީގެ ތެރެއިން ގިނަ ޙަމަލަތައް އަމާޒު ކޮށްފައި ވަނީ މަތާތު ކިޔާ އަވަށެއްގައި ހުންނަ ޔަހޫދީ ފައުޖުގެ އަސްކަރީ މަރުކަޒަކަށް ކަމުގައި ވެސް އެ ޖަމާޢަތުން ބުނެއެވެ.
ޙިޒްބުاللهގެ ޙަމަލަތަކުގެ ރައްދުގައި ޔަހޫދީ ފައުޖުން ވެސް ވަނީ އަސްކަރީ މަތިންދާބޯޓުތައް ބޭނުން ކޮށްގެން ލުބުނާނުގެ ސަރަޙައްދުތަކަށް ޙަމަލަދީފައެވެ. މި ޙަމަލަތަކުގައި އެ ޖަމާޢަތުގެ އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ. ނަމަވެސް، އެ ޖަމާޢަތުން އިސްރާޢީލާ ދެކޮޅަށް ހިންގަމުންދާ އަސްކަރީ ހަރަކާތްތައް ހުއްޓައިނުލައިފި ނަމަ، ލުބުނާނާ ދެކޮޅަށް ހަނގުރާމަ އިޢުލާނު ކުރަން ޖެހިދާނެ ކަމަށް ބުނެ، ނަތަންޔާހޫ ވަނީ އިންޒާރު ދީފައެވެ.
ޙިޒްބުاللهއިން ޒަޔަނިސްޓު އިސްރާޢީލުގެ އުތުރުގައި އޮންނަ ރަށްތަކަށް ޙަމަލަދޭން ފަށާފައި ވަނީ، އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ އުދުވާންތައް ފެށުމާ ގުޅިގެން އެ ކަމުގެ ރައްދުގައެވެ. ޔަހޫދީންގެ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 17,177 އަށް އަރާފައެވެ. އަދި، ޣައްޒާގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 6,000 އެއްހާ މީހުން ހަށިގަނޑު ތާށިވެފައިވާ ކަމުގައި ޣައްޒާގެ އޮފިޝަލުން ވިދާޅުވެއެވެ.
ޙިޒްބުاللهއަކީ 1982 ވަނަ އަހަރު އީރާނުގެ ރިވޮލޫޝަނަރީ ގާޑްސް އަޑީގައި އޮވެގެން އުފައްދާފައިވާ ހަތިޔާރު އެޅި ޖަމާޢަތެކެވެ. އީރާނުން މިހާރު ވެސް ދަނީ އެ ޖަމާޢަތަށް ވާގިވެރިވެދެމުންނެވެ. އެ ޖަމާޢަތް އުފެއްދުމުގެ މައިގަނޑު މަޤުޞަދަކީ ޒަޔަނިސްޓު އިސްރާޢީލާއި، ޔަހޫދީންނަށް ވާގިވެރިވާ އެމެރިކާއާ ދެކޮޅަށް ހަނގުރާމަ ކުރުމެވެ.