ރާއްޖޭގެ ފެތުންތެރިން މަސައްކަތް ކުރަމުން ދަނީ 2028 އަހަރު އެމެރިކާގައި އޮންނަ އޮލިމްޕިކްސްއަށް ކޮލިފައިވުމަށް ކަމަށް ސްވިމިން އެސޯސިއޭޝަނުގެ ނައިބު ރައީސް އިސްމާޢީލް އަލީ ވިދާޅުވެއްޖެއެވެ.
އަންނަ އަހަރު ޕެރިހުގައި އޮންނަ އޮލިމްޕިކްސްއަށް ކޮލިފައިވުމާ ގާތުގައި ދިވެހި ފެތުންތެރިން ތިބިކަން ފާހަގަކުރައްވަމުން އިސްމާއިލް ވިދާޅުވީ ރާއްޖެއިން އޮލިމްޕިކްސްއަށް ކޮލިފައިވުމުގެ ފުރުސަތު ބޮޑު ނަމަވެސް ކޮލިފައި ނުވެއްޖެނަމަ ވައިލްކާޑުގެ ދަށުން ރާއްޖޭގެ ފެތުންތެރިން ވާދަކުރާނެ ކަމަށެވެ. އިސްމާއިލް ވިދާޅުވީ ރާއްޖޭގެ ފެންތުންތެރިންގެ ފަރާތުން ފެންނަ ކުރިއެރުމަށް ބަލާއިރު އުންމީދު ބޮޑުކޮށް ފެންނަނީ 2028 އަހަރުގެ އޮލިމްޕިކްސްއަށް ކަމަށެވެ.
އަންނަ އަހަރު ޕާކިސްތާނުގައި ބޭއްވުމަށް ހަމަޖެހިފަވާ ސައުތު އޭޝިއަން ގޭމްސް ޝެޑިއުލްކުރެވިފައި ވީނަމަވެސް އަދި ވަކި ތާރީހެއް ގޭމްސްއަށް ކަނޑައެޅިފަ ނެތަސް އެސޯސިއޭޝަނުން އިންޑިއަން އޯޝަން އައިލެންޑް ގޭމްސް އާއި އޭޝިއަން ގޭމްސްގެ ނަތީޖާތަކަށް ބަލައި ސައުތު އޭޝިއަން ގޭމްސްއަށް ދިއުމުގެ ކުރިން ވަރަށް ގިނަ ކަންތައްތަކެއް ކުރަމުންދާކަމަށް އިސްމާއިލް ވިދާޅުވިއެވެ.
އިސްމާއިލް ވިދާޅުވީ އިންޑިއަން އޯޝަން އައިލެންޑް ގޭމްސްއަށް ވުރެން ސައުތު އޭޝިޔަން ގޭމްސް މުހިންމު ކަމަށާއި މެޑަލް ހޯދަން ބަލާއިރު ސައުތު އޭޝިޔަން ގޭމްސްގައި އެ ފުރުސަތު މާބޮޑަށް ވެސް ފަހިކަމަށެވެ. ސައުތު އޭޝިޔަން ގޭމްސް ކުރިޔަށް ތާވަލު ކުރިވެފި އޮތް ނަމަވެސް މިވަގުތު ދިވެހި ފެތުންތެރިންގެ އެންމެ ބޮޑު އަމާޒަކީ ވޯލްޑް ސްވިމިން ޗެމްޕިއަންޝިޕް ކަމަށެވެ. ވޯލްޑް ސްވިމިން ޗެމްޕިއަންޝިޕްގެ ނަތީޖާއަކީ ރާއްޖެއިން ކުރިޔަށް އޮތް އޮލިންޕިކްސް ވާދކުރާނެ ފެންތުންތެރިން ކަނޑައެޅުމުގެ ބާރަކަށް ވާނެކަމަށް އިސްމާއިލް ވިދާޅުވިއެވެ.
"މިހާރު ޓޮޕް ލެވެލްގައި ތިބި ފެތުންތެރިން ޓާގެޓު ހުރީ ހަމަ އެޔަށް، މިހާރު އިހަށްދުވަހު ޓްރެއަލް ޖަހައިގެން މި ނެގުނީ އެ ހަތަރު ފެތުންތެރިން، އެ ހަތަރު ކުދިން ވަރަށް ބޮޑަށް ތައްޔާރުވަމުން ދަނީ ވޯލްޑް ސްވިމިން ޗެމްޕިއަންޝިޕަށް.އިސްމާޢީލް އަލީ - ސްވިމިން އެސޯސިއޭޝަނުގެ ނައިބު ރައީސް
ސަރަހައްދީ މުބާރާތްތަކުގެ ތެރެއިން އަންނަ އަހަރު ފެބްރުވަރީ މަހުގައި އޮންނަ އޭޝިޔަން ސްވިމިން ފެޑެރޭޝަންގެ އޭޝިޔަން އޭޖްގުރޫޕުގެ މުބާރާތުގައި ރާއްޖޭގެ ފެތުންތެރިން ބައިވެރިވާނެ ކަމަށް އިސްމާއިލް ވިދާޅުވިއެވެ. މީގެ އިތުރުން މިމަހުގެ 26ގައި ލަންކާގެ ކެންޑީގަ އޮން އިންވިޓޭޝަނަލް މުބާރާތެއްގައި ރާއްޖޭގެ 25 ފެތުންތެރިން ބައިވެރިވާނެ ކަމަށް އިސްމާއިލް ވިދާޅުވިއެވެ.
އިސްމާއިލް ވިދާޅުވީ މިހުރިހާ މުބާރާތެއްގެ ނަތީޖާ ވެގެންދާނީ ސައުތު އޭޝިއަން ގޭމްސްއަށް ދިވެހި ފެތުންތެރިންނަށް ރަނގަޅަށް ތައްޔާރުވާން ލިބިގެންދާ ފުރުސަތެއް ކަމަށެވެ.