ކ. އަތޮޅު ކައުންސިލުން އިންތިޒާމުކޮށްގެން ބޭއްވި ކާފް ވޮލީބޯލް ޗެމްޕިއަންޝިޕް 2023 ގެ ފިރިހެން ޑިވިޝަނުގެ ޗެމްޕިއަންކަން ތުލުސްދޫން ހޯދައިފިއެވެ.
އަތޮޅުގެ ރަށްތަކަށް ހުޅުވާލައިގެން ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަންކަން މުބާރާތް ބޭއްވި ތުލުސްދޫއިން ހޯދީ އެއްވަނަ މަގާމާއެކު ސެމީ ފައިނަލެއް ނުކުޅެ ފައިނަލަށް ދަތުރުކުރި މާފުއްޓާއި ވާދަކޮށް 3-1 ސެޓުން މެޗު ކާމިޔާބުކޮށްގެންނެވެ.
ތުލުސްދޫގައި ކުރިއަށްދިޔަ މި މުބާރާތުގައި ރޭ ކުޅުނު މެޗުގެ ފުރަތަމަ ސެޓުގައި ދެ ޓީމުގެ ވާދަވެރިކަން ފެނިގެންދިޔައެވެ. ޚާއްސަކޮށް ސެޓުގެ ކުރީކޮޅު ދެ ޓީމުންވެސް ކައިރި ކައިރީގައި ޕޮއިންޓުތަކެއް ހޯދަމުންދިޔަ ނަމަވެސް، މާފުށިން ވަނީ ސެޓުގެ ފަހުކޮޅު ހޯދި ޕޮއިންޓުތަކާއެކު 25-19 އިން ފުރަތަމަ ސެޓު ކާމިޔާބުކޮށްފައެވެ.
ދެވަނަ ސެޓާއި ތިންވަނަ ސެޓުގައި ތުލުސްދޫއިން ވަނީ ތަފާތު ދައްކާފައެވެ. އެގޮތުން ދެވަނަ ސެޓު 25-16 ގެ ބޮޑު ތަފާތަކާއެކު ކާމިޔާބުކުރިއިރު، ތިންވަނަ ސެޓު އެ ޓީމުން ކާމިޔާބުކުރީ 25-19 އިންނެވެ. އަދި ފަހު ސެޓު ތުލުސްދޫއިން ކާމިޔާބުކުރީ އިތުބާރާއެކު 25-14 އިންނެވެ.
މި މުބާރާތުގެ އަންހެން ޑިވިޝަނުގެ ޗެމްޕިއަންކަން ހޯދާފައިވަނީ މާފުއްޓެވެ. މިދިޔަ ހަފުތާގެ ހުކުރު ދުވަހު ކުޅުނު ފައިނަލް މެޗު އެ ޓީމުން ކާމިޔާބުކުރީ ތުލުސްދޫ ބަލިކޮށްގެންނެވެ. އެ ރޭ ފިރިހެން ޑިވިޝަނުގެ ފައިނަލް މެޗު ކުޅުމަށް ތާވަލުކުރި ނަމަވެސް، މޫސުން ތަންނުދިނުމުގެ ސަބަބުން މެޗު ފަސްކުރީއެވެ.
އަންހެން ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދީ މާފުށީ ޓީމުގެ މަރިޔަމް ނަޖުފާއެވެ. އަދި ފިރިހެން ފައިނަލް މެޗުގެ މޮޅު ކުޅުންތެރިއަކަށް ހޮވުނީ ތުލުސްދޫގެ އާދަމް މުއީން އިބްރާހީމެވެ. އަދި މުބާރާތުގެ 21 އަހަރުން ދަށުގެ އެންމެ މޮޅު އަންހެން ކުޅުންތެރިއަކަށް ގުޅީ ޓީމުގެ އައިޝަތު ނަބްހާ ޖަލީލް ހޮވުނުއިރު، 21 އަހަރުން ދަށުގެ އެންމެ މޮޅު ފިރިހެން ކުޅުންތެރިއަކަށް ހޮވުނީ ހުރާ ޓީމުގެ ހުސެއިން މިރުޝާނެވެ.
މީގެ އިތުރުން ދެ ޑިވިޝަނުގެ ޑްރީމް ޓީމާއި އެންމެ މޮޅު ކުޅުންތެރިޔާ ވަނީ ހޮވާފައެވެ. އެގޮތުން އަންހެން ޑިވިޝަނުގެ އެންމެ މޮޅު ކުޅުންތެރިންނަކީ މާފުށީގެ މަރިޔަމް ނަޖްފާ އާއި، ފަރީޝާ އަލީ އާއި، އާއިޝަތު އަރީން ހަސަން އާއި، ތުލުސްދޫގެ ފާތިމަތު މިޒްނާ އާއި، އާމިނަތު ރައުފާ އަދި ގުޅީގެ ފާތިމަތު ރައުފާގެ އިތުރުން ގުރައިދޫގެ އައިޝަތު އުނެއިޝާއެވެ. އަންހެން ޑިވިޝަނުގެ އެންމެ މޮޅު ކުޅުންތެރިއަކަށް ހޮވުނީ ތުލުސްދޫގެ ހައްވާ ރާޝިދާއެވެ.
ފިރިހެން ޑިވިޝަނުގެ އެންމެ މޮޅު ކުޅުންތެރިންނަކީ ތުލުސްދޫގެ އަލީ ޝައުކަތާއި، މުބާރާތުގެ މޮޅު ކުޅުންތެރިޔާގެ މަގާމު ހޯދި ތުލުސްދޫގެ އާދަމް މުއީނާއި، މުޙައްމަދު އީމާން އާމިރާއި، މުޙައްމަދު ރިފްއަތު އަދި މާފުށީގެ އަލީ އާސިފާއި، އަޙްމަދު ޝިދާދު މުހައްމަދުގެ އިތުރުން ހުރާގެ އަލީ ރިޝްފާނެވެ.
މުބާރާތުގެ ފިރިހެން ފައިނަލް މެޗު ޝަރަފުވެރިކޮށްދެއްވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލެވެ. މީގެ އިތުރުން ކުޅިވަރާ ބެހޭ ވުޒާރާގެ ބައެއް އިސްވެރިންނާއި އަތޮޅު ކައުންސިލުގެ އިސްވެރިން ބައިވެރިވެވަޑައިގެންނެވިއެވެ.