ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާން ހުއްޓުވުމާ ގުޅޭ ގޮތުން ކުރަމުންދިޔަ މަޝްވަރާތަކަށް ޔަހޫދީން އަނބުރާ ގެންނަން ބާރުއެޅުމަށް ޤަޠަރުގެ އަމީރު ޝައިޚް ތަމީމް ބިން ޙަމަދް އަލް-ޘާނީ އ.ދގެ ސަލާމަތީ މަޖިލީހަށް ގޮވައިލައްވައިފިއެވެ. އޭނާ މި ކަމަށް ގޮވައިލައްވާފައި ވަނީ ޤަޠަރުގައި ކުރިއަށްދިޔަ ގަލްފް ކޯޕޮރޭޝަން ކައުންސިލް (ޖީ.ސީ.ސީ)ގެ 44 ވަނަ ސަމިޓުގައި ވާހަކަފުޅު ދައްކަވަމުންނެވެ.
"ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން މި ފަދަ ލާއިންސާނީ އުދުވާންތަކެއް ހިންގަމުންދާއިރު ބައިނަލްއަޤުވާމީ މުޖުތަމަޢުން ބަލަން އޮންނަން ލަދުގަންނަން ޖެހޭނެ. ޔަހޫދީ ފައުޖުން އެ ދަނީ ޣައްޒާގެ ކުޑަކުދިންނާއި އަންހެނުން އެއްވެސް ރަޙުމެއް ނެތި ޤަތުލު ކުރަމުން،" ޤަޠަރުގެ އަމީރު ވިދާޅުވިއެވެ. ޙަމާސްއާއި ޒަޔަނިސްޓު އިސްރާޢީލުގެ ޔަހޫދީންނާ ދެމެދު ކުރަމުންދިޔަ މަޝްވަރާތަކުގައި މެދުވެރިއެއްގެ ދައުރު އިސްކޮށް އަދާ ކުރަމުން ގޮސްފައި ވަނީ ޤަޠަރުންނެވެ.
ޤަޠަރާއި މިޞްރުގެ އިތުރުން އެމެރިކާއިން ގުޅިގެން ކުރި މަސައްކަތުން ޔަހޫދީންގެ އުދުވާންތައް މެދުކަނޑައިލުމަށް ކުރިން އެއްބަސްވުމެއް އެކުލަވައިލިއެވެ. ނޮވެންބަރު 24 ވަނަ ދުވަހު އެ އެއްބަސްވުމަށް އަމަލު ކުރަން ފެށި ނަމަވެސް، ޔަހޫދީން ވަނީ ޑިސެންބަރު 1 ވަނަ ދުވަހު އެ އެއްބަސްވުން ބޮލައިލާ ޖަހާފައެވެ. އަދި، ޣައްޒާގެ މުސްލިމުންގެ ލޭއޮހޮރުވައިލަން ހިންގަމުން ދިޔަ ކެމްޕޭން އަލުން ފަށާފައެވެ.
ޝައިޚް ތަމީމް ވިދާޅުވީ، މަޝްވަރާގެ މޭޒު ދޮށަށް ޔަހޫދީން އަނބުރާ ގެނައުމަށް ގިނަ މަސައްކަތްތަކެއް ކުރަމުންދާ ކަމުގައެވެ. އަދި، ހަމަލަ ބަދަލު ކުރުން މެދުކަނޑައިލަން ހަދާފައިވާ އެއްބަސްވުމަށް ރުޖޫޢަވާން މަސައްކަތް ކުރައްވަމުން ގެންދަވާ ކަމުގައެވެ. ޣައްޒާގެ މުސްލިމުންގެ ފުރާނަ ސަލާމަތް ކުރެވޭނީ ހަމަލަ ބަދަލު ކުރުން ވަގުތީ ގޮތުން މެދުކަނޑައިލައިގެން ނޫން ކަމަށާާއި، ޔަހޫދީންގެ އުދުވާންތަކަށް ނިމުމެއް ގެންނަން ޖެހޭ ކަމުގައި ވެސް އޭނާ ވިދާޅުވިއެވެ.
"ފަލަސްޠީނުގެ މުސްލިމުންނަށް މިނިވަން ދަޢުލަތެއްގައި ދިރިއުޅުމުގެ ހައްޤު ޔަހޫދީން ބަލައިގަތް ނަމަ މިއަދު ފެންނަމުން މިދާ މަންޒަރުތަކެއް ނުފެނުނީސް،" ޝައިޚް ތަމީމް ވިދާޅުވިއެވެ. ފަލަސްޠީނުގެ މުސްލިމުންގެ އިންސާނީ ހައްޤުތަކަށް ޔަހޫދީން އަރައިގަންނަމުންދާ ކަމަށް ވިދާޅުވެ، ޔަހޫދީންގެ އުދުވާނަކީ ހަނގުރާމައިގެ ކުށެއްގެ ގޮތުގައި ވެސް އޭނާ ސިފަ ކުރެއްވިއެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 15,900 އަށް އުފުލިފައެވެ. އޭގެ ތެރޭގައި 6,500 އަށްވުރެ ގިނަ ޢަދަދެއްގެ މައުސޫމު ކުޑަކުދިން ހިމެނެއެވެ. އަދި، އެތަކެއް ހާސް އަންހެނުން ހިމެނެއެވެ. ޔަހޫދީންގެ އުދުވާނުގައި ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 42,000 ފަހަނަ އަޅާފައެވެ.