ފަލަސްޠީނުގެ ޞިއްޙީ ޙާލަތާ ބެހޭ ގޮތުން މަޝްވަރާ ކުރުމަށް ޑަބްލިޔުއެޗްއޯގެ ކުއްލި ބައްދަލުވުމެއް

ފަލަސްޠީނުގެ ޣައްޒާއާއި ޔަހޫދީ ދަޢުލަތުން އިސްތިޢުމާރުކޮށްފައިވާ ހުޅަނގު އައްސޭރީގެ ޞިއްޙީ ޙާލަތާ ބެހޭ ގޮތުން މަޝްވަރާ ކުރުމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ)ގެ ކުއްލި ބައްދަލުވުމެއް އަންނަ ޑިސެމްބަރު މަހު 10 ވަނަ ދުވަހު ބޭއްވުމަށް ހަމަޖައްސައިފިއެވެ. އެ ބައްދަލުވުން ބާއްވައިދިނުމަށް އެދި 15 ޤައުމަކުން އެދިފައިވާ ކަމަށް ޑަބްލިޔުއެޗްއޯގެ ޑިރެކްޓަރ ޖެނެރަލް ޓެޑްރޮސް އަދަނޮމް ގެބްރިޔޭސުސް ވިދާޅުވިއެވެ. ބައްދަލުވުން ބާއްވާނީ ޤަޠަރުގެ ޗެއާޕާސަންގެ މަޝްވަރާއާއެކު ކަމަށްވެސް ޓެޑްރޮސް ވިދާޅުވިއެވެ.

ޖެނީވާގައި ހުންނަވާ ފަލަސްޠީނުގެ ސަފީރު އިބްރާހިމް ޚުރައިޝީ ވިދާޅުވީ އެ ބައްދަލުވުމުގައި މަޝްވަރާތައް ކުރުމަށް ބޮޑަށް އަމާޒުކުރާނީ ޣައްޒާއަށް ކަމަށާއި ޔަހޫދީ ދަޢުލަތުން އިސްތިޢުމާރުކޮށްފައިވާ ހުޅަނގު އައްސޭރީގެ ޞިއްޙީ ދާއިރާއަށް ޔަހޫދީން ދެމުންދާ ޙަމަލާތަކާ ގުޅޭގޮތުން ވެސް މަޝްވަރާތައް ކުރުމަށް ހަމަޖެހިފައިވާ ކަމަށެވެ.

"އަޅުގަނޑުމެން ބޭނުންވަނީ ޑަބްލިޔުއެޗްއޯ ބާރުވެރިކޮށް، ޔަހޫދިންގެ ޙަމަލާތައް ޞިއްޙީ ނިޒާމަށް އަމާޒު ނުކުރުމަށް ގޮވާލަން. އަޅުގަނޑުމެން ބޭނުންވަނީ ޞިއްޙީ ފަރުވާއަށް ބޭނުންވާ ސާމާނާއި ޚިދުމަތް ޣައްޒާއަށް ފޯރުކޮށްދޭން." ޚުރައިޝީ ވިދާޅުވިއެވެ. އެ ގޮތުން ދުނިޔޭގެ އެކި ކަންކޮޅުތަކުން އިތުރު ޑޮކްޓަރުން ޣައްޒާއަށް ފޮނުވުމަކީ ޤައުމުތަކުން ހުށަހަޅައިފައިވާ އެއް ޚިޔާލު ކަމަށް ޙުރައިޝީ ވިދާޅުވިއެވެ.

ޖައްބާރު ޔަހޫދީ ފައުޖުތަކުން ޣައްޒާގައި ކުރަމުންދާ ހަނގުރާމައިގައި އެ ސަރަޙައްދަށް ތެޔޮ އެތެރެކުރުން މުޅިން މަނާކޮށްފައި އޮތުމަށްފަހު، ތެޔޮ ކޮންމެވެސް ވަރަކަށް އެތެރެކުރަން މިހާރު ހުއްދަ ދީފައިއޮތް ނަމަވެސް އެކަށީގެންވާ މިންވަރަށް ތެޔޮ ނުލިބުމުގެ ސަބަބުން ޣައްޒާގެ ގިނަ ހޮސްޕިޓަލްތައް އަދިވެސް ހުރީ ބަންދުކޮށްފައެވެ. ޚިދުމަތް ދޭ މަދު ހޮސްޕިޓަލުތަކުގައި ވެސް ކޮންމެހެން ބޭނުންވާ ހުރިހާ ޚިދުމަތެއް ދެވޭކަށް ނެތެވެ. އަދި ޝަހީދުވެގެންނާއި ޙަމަލާތަކުގައި ޒަޚަމުވެގެން ހޮސްޕިޓަލުތަކަށް ގެންދާ މީހުންގެ ޢަދަދު ކޮންމެ ދުވަހަކުވެސް އަންނަނީ އިތުރުވަމުންނެވެ.

ޑަބްލިޔުއެޗްއޯގެ ތަފާސް ހިސާބުތަކުން ދައްކާ ގޮތުގައި އޮކްޓޯބަރު ހަތް ވަނަ ދުވަހު ޔަހޫދީންގެ ސަރަޙައްދީ ރޮނގު ހުރަސްކޮށް ޙަމާސުން ދިން ޙަމަލާއެއްގެ ރައްދުގައި ކަމަށް ބުނެ، ބަދަލު ހިފުމުގެ ގޮތުން ވައިގެ މަގުން ޔަހޫދީން ޣައްޒާއަށް އަރައިގަތް ފަހުން ފަލަސްޠީނުގެ އެކި ސަރަޙައްދުތަކުގައި ހުރި ސިއްޙީ ހިދުމަތް ދޭ 427 ތަނަކަށް ޔަހޫދީ ފައުޖުތަކުން ވަނީ ޙަމަލާ ދީފައެވެ.

ޣައްޒާ މިހާރު އޮތް ޙާލަތުގައި އެކި ކަހަލަ ބަލިތައް ފެތުރިގެން މަރުވާ މީހުންގެ ޢަދަދު ޔަހޫދީންގެ ޙަމަލާތަކުގައި ޝަހީދުވާ މީހުންގެ ޢަދަދަށްވުރެ މަތިވެދާނެ ކަމަށްވެސް ޑަބްލިޔުއެޗްއޯއިން ވަނީ އަންދާޒާ ކޮށްފައެވެ.

ޔަހޫދީ ފައުޖުތަކުން ޣައްޒާގައި ހިންގާ ލާއިންސާނީ ޖަރީމާތަކުގެ ސަބަބުން 2.3 މިލިއަން މީހުންގެ އާބާދީއެއް އޮންނަ ޣައްޒާގެ 80 އިންސައްތަ މީހުންގެ ގެދޮރު ވަނީ ގެއްލިފައެވެ. އެއާއިއެކު ވަޤުތީ ހިޔާތަކުގައި ގިނަ ބަޔަކު ތޮއްޖެހިގެން އުޅެން ޖެހުމުގެ ސަބަބުން ތަފާތު އެކި ކަހަލަ ބަލިތައް ޣައްޒާގައި އަންނަނީ ފެތުރެމުންނެވެ.

ޑަބްލިޔުއެޗްއޯގެ ގަވަނިން ބޯޑުގައި 34 މެމްބަރުން ހިމެނެއެވެ. ބޯޑުގެ އަހަރީ އެޖެންޑާ ކަނޑައެޅުމަށް ބައްދަލުވުން ބާއްވަނީ ކޮންމެ އަހަރެއްގެ ޖެނުއަރީ މަހުއެވެ. ބޯޑު މެމްބަރު ޤައުމުތަކުގެ ތެރޭގައި އެމެރިކާ، ފަރަންސޭސިވިލާތް، ޗައިނާ އަދި ޖަޕާން ވެސް ހިމެނެއެވެ.