ޗައިނާގެ ބައެއް ސަރަޙައްދުތަކުގައި މި ވަގުތު ހަލުވިކަމާ އެކު ފެތުރެމުން ދަނީ ނޭވާލާ ނިޒާމަށް ޖެހޭ އައު ބައްޔެއް ނޫން ކަމުގައި އެ ޤައުމުން ހާމަކޮށްފިއެވެ. ޗައިނާގެ ޞިއްޙަތާ ބެހޭ އިދާރާގެ އިސް އޮފިޝަލަކު ވިދާޅުވީ އެ ޤައުމުގައި މިހާރު ހަލުވިކަމާ އެކު ނޭވާލާ ނިޒާމުގެ ބަލިތައް ފެތުރެމުން ދަނީ، ކުރިން ވެސް ދެނެގަނެވިފައިވާ 'ޕެތޮޖެންސް' ނުވަތަ ބަލި ޖައްސާ ޖަރާސީމުތަކުގެ ސަބަބުން ކަމުގައެވެ. އަދި، ނޭވާލާ ނިޒާމަށް ޖެހޭ އައު ބައްޔެއް ފެނިފައި ނުވާ ކަމުގައި ވެސް އެ އޮފިޝަލް ވިދާޅުވިއެވެ.
ޗައިނާގެ ބައެއް ސަރަޙައްދުތަކުގައި ނޭވާލާ ނިޒާމުގެ ބަލިތައް ޢާންމުވެފައިވާ ކަމުގެ މަޢުލޫމާތު ދުނިޔޭގެ ސަމާލު ކަމަށް އައިސްފައި ވަނީ، ދުނިޔޭގެ ޞިއްޙަތު ޖަމުޢިއްޔާ [ވޯލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)]އިން އެ ކަމާ ގުޅޭ މަޢުލޫމާތު ހާމަ ކުރުމަށް ޗައިނާގެ ސަރުކާރަށް ގޮވައިލުމާ ގުޅިގެންނެވެ. އެ ޤައުމުގެ ބައެއް ސަރަޙައްދުތަކުގައި ނޭވާލާ ނިޒާމުގެ ބަލިތަކުގެ އިތުރުން ނިއުމޯނިޔާ ވެސް ހަލުވިކަމާ އެކު ފެތުރެމުންދާ ކަން ވަނީ ހާމަވެފައެވެ. ނިއުމޯނިޔާ ފެތުރެމުން ދަނީ ކުޑަކުދިންގެ މެދުގައެވެ.
ނޭވާލާ ނިޒާމުގެ ބަލިތައް ހަލުވިކަމާ އެކު ފެތުރެމުންދާ ކަން ފުރަތަމަ ހާމަ ކޮށްފައި ވަނީ އެ ޤައުމުގެ ޞިއްޙަތާ ބެހޭ އިދާރާ [ނޭޝަނަލް ހެލްތް ކޮމިޝަން (އެން.އެޗް.ސީ)]ންނެވެ. އެ އިދާރާއިން މި ކަމާ ގުޅޭ މަޢުލޫމާތު އެންމެ ފުރަތަމަ ހިއްޞާ ކޮށްފައި ވަނީ ނޮވެންބަރު 13 ވަނަ ދުވަހުއެވެ. އެ އިދާރާއިން ބުނީ، ނޭވާލާ ނިޒާމުގެ ބަލިތަކާއި ނިއުމޯނިޔާ ފެތުރުން އިތުރުވެފައި ވަނީ، ކޮވިޑް-19އާ ގުޅިގެން އަޅާފައިވާ ރައްކާތެރި ކަމުގެ ފިޔަވަޅުތަކަށް ލުއިދިނުމުން ކަމުގައެވެ.
ނޭވާލާ ނިޒާމުގެ ބަލިތައް ފެތުރުން ޢާންމުވުމާ ގުޅިގެން ޗައިނާގެ އެކި ކަންކޮޅުތަކުގައި ރައްކާތެރި ކަމުގެ ފިޔަވަޅުތައް ވަރުގަދަ ކޮށްފައިވާ ކަމުގައި އެން.އެޗް.ސީން ބުނެއެވެ. މި ގޮތުން، ކުޑަކުދިންނަށް ފަރުވާ ދިނުމަށް ޚާއްޞަ ކޮށްފައިވާ އިތުރު ކުލިނިކުތަކެއް ހުޅުވުމަށް މަސައްކަތް ކުރަމުންދާއިރު، ކުޑަކުދިންނާއި އުމުރުން ދުވަސްވީ މީހުންނަށް 'ފްލޫ' ނުވަތަ ޢާންމު ރޯގާއަށް ދޭ ވެކްސިން ޖަހައިދިނުމަށް ޚާއްޞަ މަސައްކަތްތަކެއް ކުރަމުންދާ ކަމުގައި ވެސް އެ ޤައުމުން ބުނެއެވެ.
އެން.އެޗް.ސީގެ އިސް އޮފިޝަލެއް ކަމުގައިވާ އެމްއައި ފޮންގް ވިދާޅުވީ، ޢާންމުންގެ ތެރެއަށް ނިކުމެ އުޅޭ ވަގުތުތަކުގައި މާސްކު އެޅުމަށް އިލްތިމާސް ކޮށްފައިވާ ކަމުގައެވެ. އަދި، ސައިބޯނި ލައިގެން ގިނަގިނައިން އަތްދޮވުން ފަދަ އާދަތަކަށް އަހަންމިއްޔަތު ކަން ދިނުމަށް ގޮވައިލާފައިވާނެ ކަމުގައެވެ.
ޗައިނާގައި މި ވަގުތު ނޭވާލާ ނިޒާމަށް ޖެހޭ ބަލިތަކެއް ހަލުވިކަމާ އެކު ފެތުރެމުން ދިޔަ ނަމަވެސް، މިއީ ކަންބޮޑުވާން ޖެހޭ މައްސަލައެއް ނޫން ކަމުގައި ޞިއްޙީ ދާއިރާގެ މާހިރުން ވިދާޅުވެއެވެ. ސަބަބަކީ، ދުނިޔޭގެ އެކި ކަންކޮޅުތަކުގައި އެހެން ޤައުމުތަކުގައި ވެސް މި ފަދަ ބަލިތައް ހަލުވިކަމާ އެކު ފެތުރެމުން ދިޔުމެވެ. ކޮވިޑް-19އާ ގުޅިގެން އަޅާފައިވާ ރައްކާތެރި ކަމުގެ ފިޔަވަޅުތައް އުވައިލުމާ ގުޅިގެން ގިނަ ޤައުމުތަކެއްގައި މިފަދަ ބަލިތައް ފެތުރުން އިތުރުވެފައިވާ ކަން މާހިރުން ފާހަގަ ކުރެއެވެ.
ކޮވިޑް-19ގެ ސަބަބުން އަޅާފައި އޮތް ރައްކާތެރި ކަމުގެ ފިޔަވަޅުތައް ޗައިނާއިން އުވައިލާފައި ވަނީ 2022 ވަނަ އަހަރުގެ ޑިސެންބަރު މަހުގެ ތެރޭގައެވެ. މިއީ، ފިޔަވަޅުތައް އުވައިލި ފަހުން ޗައިނާއަށް ފިނި މޫސުމާ ކުރިމަތިވާ ފުރަތަމަ ފަހަރެވެ.