ފިލިޕީންސްގެ ދެކުނުގައިވާ މިންދަނާއޯއަށް ބާރުގަދަ ބިންހެލުމަށް އައުމާ ގުޅިގެން، އެ ޤައުމުގެ އައްސޭރިފަށުގައިވާ ސަރަޙައްދުތަކަށް ސުނާމީއެއް އަރާފާނެ ކަމުގެ އިންޒާރު ދީފިއެވެ. މިންދަނާއޯއަށް އައިސްފައިވާ ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑުން 7.5ގެ ބާރުމިނުގައެވެ.
ސުނާމީގެ އިންޒާރު ދިނުމާއެކު ފިލިޕީންސްގެ ދެކުނުގެ ސަރަޙައްދުތަކުގެ އިތުރުން ޖަޕާނުގެ ދެކުނުގެ އައްސޭރިފަށުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ދަތުރު ކުރަން ވަނީ އަންގާފައެވެ. ޖަޕާނުގެ އައްސޭރިފަށުގައިވާ ސަރަޙައްދުތަކަށް 3 މީޓަރުގެ އުސް ސުނާމީގެ ރާޅުތަކެއް އަރާނެ ކަމުގެ އިންޒާރު ވަނީ ދީފައެވެ.
ފިލިޕީންސްގެ ބިންހެލުންތަކާ ބެހޭ އިދާރާ [ފިލިޕީންސް ސީސްމޮލޮޖީ އޭޖެންސީ (ފިވޮލްކްސު)]ން ބުނީ، ސުނާމީގެ ރާޅުތައް މެންދަމުންއަލިވުމާ އެކު އެ ޤައުމުގެ ދެކުނުގެ އައްސޭރިފަށުގެ ސަރަޙައްދުތަކަށް އަރާނެ ކަމަށް ބެލެވޭ ކަމުގައެވެ. އަދި، ރާޅު އެރުން އެތަކެއް ގަޑިއިރަކަށް ދިގުލައިގެން ދާނެ ކަމަށް ބެލެވޭ ކަމުގައި ވެސް އެ އިދާރާއިން ބުންޏެވެ. ސުނާމީތަކާ ގުޅޭ އިންޒާރުދޭ އެމެރިކާގެ އިދާރާއިން ވެސް ވަނީ 3 މީޓަރު އުސް ރާޅުތައް ފިލިޕީންސްގެ ސަރަޙައްދުތަކަށް އަރާނެ ކަމުގެ އިންޒާރު ދީފައެވެ.
"މި ވަގުތު ކަނޑުމަތީގައި ތިބި އުޅަނދުފަހަރު އެއްގަމާ ކައިރި ނުކޮށް، މައި ކަނޑުގައި މަޑު ކުރަން އިލްތިމާސް ކުރަން. ސުނާމީ އަރާނެ ކަމަށް ބެލެވޭ ސަރަޙައްދުތަކުގައި ދިރިއުޅޭ މީހުން ވީ އެންމެ އަވަހަކަށް ރައްކާތެރި ހިސާބުތަކާއި، އުސް ބިންތަކަށް ދަތުރު ކުރަން އަންގަން،" ފިވޮލްކްސުން ނެރުނު އިންޒާރުގެ އެންގުމުގައި ބުނެފައިވެއެވެ. ސުނާމީގެ ރާޅުތައް އެންމެ ފުރަތަމަ އަރާނެ ކަމަށް ބެލެވެނީ ފިލިޕީންސްގެ ސުރިގައު ދެލް ސޫރާއި ދާވައު އޮރިއެންތާލް ޕްރޮވިންސުގެ އައްސޭރިފަށުގެ ސަރަޙައްދުތަކަށެވެ.
ޖަޕާނުން ވެސް ވަނީ، އެ ޤައުމުގެ ގަޑިން މެންދަމުންއަލިވެ 1:30 ހާއިރު ސުނާމީގެ ރާޅުތައް އަރަން ފަށާނެ ކަމުގެ އިންޒާރު ދީފައެވެ. އެ ޤައުމުގެ އައްސޭރިފަށުގެ ސަރަޙައްދުތަކަށް ވެސް 1 މީޓަރު އުސް ރާޅުތައް އަރާނެ ކަމަށް ބެލެވޭ ކަމުގައި ޖަޕާނުގެ ބްރޯޑްކާސްޓަރ އެން.އެޗް.ކޭން ރިޕޯޓު ކުރެއެވެ.
ޔޫރަޕިޔަން-މެޑިޓެރޭނިޔަން ސީސްމޮލޮޖިކަލް ސެންޓަރ (އީ.އެމް.އެސް.ސީ)ން ބުނީ 7.5ގެ ބާރުގަދަ ބިންހެލުން އައިސްފައި ވަނީ ބިމުގެ ފަށަލައިން ފެށިގެން 32 ކިލޯމީޓަރު ފުނަށް ކަމުގައެވެ. ޔޫ.އެސް ޖިޔޮލޮޖިކަލް ސަރވޭ (ޔޫ.އެސް.ޖީ.އެސް)އިން ބުނީ، ފިލިޕީންސްއަށް އައި ބިންހެލުމުގެ ބާރުމިން ރެކޯޑު ކުރެވިފައި ވަނީ ރިކްޓަރ މިންގަނޑުން 7.6ގައި ކަމުގައެވެ. ބިންހެލުން އައިސްފައި ވަނީ ފިލިޕީންސް ގަޑިން ރޭގަނޑު 10:37 ގައެވެ.