ހުޅަނގު އައްސޭރިއާއި ޣައްޒާގައި ދިރިއުޅޭ ފަލަސްޠީނުގެ މުސްލިމުންނަށް، އެ މީހުންގެ އަމިއްލަ ވަޒަނާއި ބިންތައް ދޫކޮށް އެހެން ޤައުމުތަކަށް ދިރިއުޅުން ބަދަލު ކުރަން މަޖުބޫރު ކުރުމުގެ ފުރުޞަތު ނުދޭނެ ކަމުގައި އެމެރިކާގެ ނައިބު ރައީސް ކަމަލާ ހެރިސް ވިދާޅުވެއްޖެއެވެ. އޭނާ މިހެން ވިދާޅުވެފައި ވަނީ މިޞްރުގެ ރައީސް ޢަބްދުލް ފައްތާޙް އަލް-ސީސީއާ ބައްދަލުކުރައްވައި ވާހަކަފުޅު ދައްކަވަމުންނެވެ.
އަލް-ސީސީއާއި ހެރިސް ބައްދަލު ކުރައްވާފައި ވަނީ އެކުވެރި ޢަރަބި ޢިމާރާތް (ޔޫ.އޭ.އީ)ގެ ދުބާއީގައި މިހާރު ކުރިއަށްދާ އ.ދގެ މޫސުމީ ބަދަލުތަކާ ބެހޭ 28 ވަނަ ބައްދަލުވުން [ޔޫ.އެން ކޮންފަރެންސް އޮފް ދަ ޕާޓީސް (ކޮޕް28)]ގެ ހަވާސާގައެވެ. މި ބައްދަލުވުމާ ގުޅޭ ގޮތުން ވައިޓް ހައުސްއިން ބުނީ، އަމިއްލަ ވަޒަނާއި ބިންތަކުން ފައިބައި، އެހެން ޤައުމުތަކަށް ދިރިއުޅުން ބަދަލު ކުރުމަށް ފަލަސްޠީނުގެ މުސްލިމުންނަށް މަޖުބޫރު ކުރުމުގެ ފުރުޞަތު އެމެރިކާއިން އެއްވެސް ހާލެއްގައި ނުދޭނެ ކަމުގައި ހެރިސް ވިދާޅުވެފައިވާ ކަމުގައެވެ.
މީގެ އިތުރުން ޣައްޒާ އަލުން އާރާސްތުކުރުމާއި، އެ ތަނުގެ އަމަން ބެލެހެއްޓުމާއި، ޣައްޒާގެ ވެރިކަމާ ގުޅޭ ގޮތުން ހެރިސްއާއި އަލް-ސީސީ މަޝްވަރާ ކުރައްވާފައިވާ ކަމުގައި ވެސް ވައިޓް ހައުސްއިން ބުންޏެވެ. އަދި، އެ ކަންކަން ކާމިޔާބު ކުރެވޭނީ ފަލަސްޠީނުގެ ރައްޔިތުންނަށް މިނިވަން ދަޢުލަތެއްގައި ދިރިއުޅުމުގެ ފުރުޞަތު ހޯދައިދީގެން ކަމަށް ހެރިސް ވިދާޅުވެފައިވާ ކަމުގައި ވެސް ވައިޓް ހައުސްއިން ބުނެއެވެ.
ފަލަސްޠީނުގެ މުސްލިމުންގެ ކުރިމަގާ ގުޅޭ ގޮތުން ހެރިސްއާއި އަލް-ސީސީ މަޝްވަރާ ކުރައްވާފައި މި ވަނީ، ޙަމާސްއާ އެކު ހަދާފައިވާ އެއްބަސްވުން ޔަހޫދީން އުވައިލާ، އަލުން ޣައްޒާގައި އުދުވާން ހިންގަން ފަށާފައިވާ ދަނޑިވަޅެއްގައެވެ. ޑިސެންބަރު 1 ވަނަ ދުވަހު އެއްބަސްވުން އުވައިލުމަށްފަހު ޣައްޒާއަށް ޔަހޫދީން ދީފައިވާ ހަމަލަތަކުގައި 190 އަށްވުރެ ގިނަ މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީންގެ ގިނަ ހަމަލަތައް އަމާޒު ކޮށްފައި ވަނީ ޣައްޒާގެ ދެކުނުގައިވާ ޚާނީޔޫނުސަށެވެ. އެއީ، ޔަހޫދީންގެ އުދުވާންތަކުން ސަލާމަތްވާން އެތަކެއް ސަތޭކަ ހާސް މުސްލިމުން ބަދަލުވެފައިވާ ރަށެކެވެ. އެ މުއްދަތުގެ ތެރޭގައި ޣައްޒާއަށް 400 އަށްވުރެ ގިނަ މިސައިލާއި ބޮން އަޅާފައިވާނެ ކަމުގައި ޔަހޫދީން ބުނެއެވެ. އަދި، ޚާނީޔޫނުސް ހުސް ކުރަން ވެސް ޔަހޫދީ ފައުޖުން ވަނީ އެ ރަށުގައި ތިބި މުސްލިމުންނަށް އަންގާފައެވެ. ޔަހޫދީންގެ ހަމައެކަނި ބޭނުމަކީ ފަލަސްޠީނުގެ މުސްލިމުން އެ މީހުންގެ ބިންތަކުން ބޭލުމެވެ. އަދި، ވީހާވެސް ގިނަ ބަޔެއްގެ ލޭއޮހޮރުވައިލާ، ޣައްޒާގެ މަގުތައް މުސްލިމުންގެ ލެއިން ޣަރަޤު ކޮށްލުމެވެ.
"ޣައްޒާއަކީ މިހާރު ދުނިޔެ މަތީގައި އޮތް ނަރަކައެއް [ފަދަ ތަނެއް]،" ޣައްޒާގެ މިހާރު ހާލަތު ސިފަ ކުރައްވައި ވާހަކަފުޅު ދައްކަވަމުން އިންސާނިއްޔަތާ ބެހޭ އ.ދގެ އޮފީހުގެ ތަރުޖަމާނު ޔެންސް ލެއަރކް ވިދާޅުވިއެވެ.
"މިއަދު، މަދު ގަޑިއިރުތަކެއްގެ ތެރޭގައި، [ޔަހޫދީން ވަނީ] ގިނަ ޢަދަދެއްގެ ބަޔަކު ޝަހީދުކޮށްލާ އިތުރު ބަޔަކު ޒަޚަމު ކޮށްލާފައި. އަމިއްލަ ވަޒަން ދޫކޮށް އެހެން ސަރަޙައްދުތަކަށް ބަދަލުވާން ޢާއިލާތަކަށް ވަނީ މަޖުބޫރު ކޮށްފައި. އެ މީހުންގެ އުންމީދުތައް ވަނީ ފުނޑުފުނޑު ކޮށްލާފައި. ޣައްޒާގައި ރައްކާތެރި އެއްވެސް ތަނެއް ނެތް،" އިންސާނީ އެހީއާ ބެހޭ އ.ދގެ އިދާރާގެ އިސްވެރިޔާ މާޓިން ގްރިފިތްސް ވިދާޅުވިއެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފެށި އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 15,207 އަށް އަރާފައެވެ. އޭގެ ތެރޭގައި 6,000 އަށްވުރެ ގިނަ ޢަދަދެއްގެ ކުޑަކުދިން ހިމެނެއެވެ. އަދި، ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 6,000 އެއްހާ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ވިދާޅުވެއެވެ. އުދުވާންތަކުގައި ޒަޚަމު ކޮށްލާފައިވާ މީހުންގެ ޢަދަދު ވެސް ވަނީ 40,000 އަށްވުރެ މައްޗަށް އުފުލިފައެވެ.