ފަލަސްޠީނުގެ ޢައްޒާގައި ވެރިކަން ކުރާ ޙަމާސް ޖަމާޢަތުގެ ބެލުމުގެ ދަށަށް ގެންގޮސްފައިވާ ޔަހޫދީން މިނިވަން ކުރުމުގައި އެހީތެރިވެދެއްވުމަށް ޢަރަބި އެކުވެރި އިމާރާތް، އޫއޭއީގެ ރައީސް ޝެއިޚް މުޙައްމަދު ބިން ޒައިދު އަލް ނަޙްޔާންގެ އަރިހުން ޔަހޫދީންގެ ރައީސް އައިސާކް ހަރްޒޮގް އެދިވަޑައިގެންފިއެވެ. އޭނާ އެ ކަމަށް އެދިވަޑައިގަތީ ޝެއިޙް މުޙައްމަދާއެކު ދުބާއީގައި ބޭއްވި ބައްދަލުވުމެއްގައެވެ.
ހަރްޒޮގް މިހާރު ހުންނެވީ ޔޫއޭއީގައި ކުރިއަށްދާ ކޮޕް28 ބައްދަލުވުމުގައި ބައިވެރިވަޑައިގަތުމަށް ޔޫއޭއީގައެވެ. އެއީ މިދިޔަ އޮކްޓޯބަރު ހަތް ވަނަ ދުވަހު ޙަމާސް ޖަމާޢަތާއި ޔަހޫދީންނާ ދެމެދު ހަނގުރާމަ ފެށިފަހުން ޔަހޫދީންގެ ރައީސް ޤައުމުން ބޭރަށްވަޑައިގަތް ފުރަތަމަ ފަހަރެވެ.
ޔޫއޭއީއަކީ މެދުއިރުމަތީގެ އެއް ބާރަށްވި ނަމަވެސް ޔަހޫދީންނާއި ޙަމާސުން ކުރަމުން ދިޔަ ހަނގުރާމަ ހަފްތާއެއްހާ ދުވަހަށް މެދުކަނޑާލުމުގެ މެދުވެރިއެއްގެ ދަޢުރު އަދާކޮށްފައި ވަނީ ޤަތަރާއި މިސްރުންނެވެ. ޙަމަލާތައް މެދުކަނޑާލުމަށް ވެފައިވާ އެއްބަސްވުމުގެ ދަށުން މިހާތަނަށް 99 ޔަހޫދީން ވަނީ މިނިވަންވެފައެވެ. އަދި ޔަހޫދީން ވަނީ ފަލަސްޠީނުގެ 210 މީހުން މިނިވަންކޮށްފައެވެ.
ޙަމަލާތައް މެދުކަނޑާލަން ވެފައިވާ އެއްބަސްވުން ނިމުމަކަށް އައުމުން ޔަހޫދީން އަނެއްކާވެސް ވަނީ ފަލަސްޠީނުގެ ޣައްޒާއަށް ޙަމަލާތައް ދޭން ފަށައިފައެވެ.
ކޮޕް28 ސަމިޓްގައި ބައިވެރިވެވަޑައިގަތުމަށް ހެރްޒޮގަށް ދަޢުވަތު ދެއްވީ މި އަހަރުގެ ކުރީކޮޅުގައެވެ. ސަމިޓްގައި ބައިވެރިވެވަޑައިގަތުމަށް ޔަހޫދީންގެ ބޮޑުވަޒީރު ބުންޔާމިން ނަތަންޔާހޫއަށްވެސް ވަނީ ދަޢުވަތު ދެއްވައިފައެވެ. ޔަހޫދީން ކުރިން ނިންމާފައި އޮތީ ގާތްގަނޑަކަށް 1،000 މީހުންގެ ބޮޑު ވަފުދެއް ސަމިޓަށް ފޮނުވުމަށެވެ. ނަމަވެސް އެ ވަފުދުގައި ބައިވެރިވާގޮތަށް ހަމަޖެހިފައިވާ ބައެއް މީހުން އަސްކަރީ ބޭނުމަށް މަޑުކުރަން ޖެހުނީއެވެ.
ޔޫއޭއީއަކީ ޔަހޫދީންނާއެކު ޚާރިޖީ ގުޅުން އޮންނަ މަދު ޢަރަބި ޤައުމުތަކުގެ ތެރެއިން އެއް ޤައުމެވެ. މެދުއިރުމަތީގެ ހަމަޖެހުމަށް އޮތް ނުރައްކަލެއްގެ ގޮތުގައި ޔޫއޭއީން ދެކޭ ޙަމާސް ޖަމާޢަތުން އޮކްޓޫބަރު މަހު 7 ވަނަ ދުވަހު ޔަހޫދީންނަށް ދިން ޙަމަލާ ޔޫއޭއީން ވަނީ ކުށްވެރިކޮށްފައެވެ. އަދި ޙަމާސުން ރަހީނުކޮށްފައިވާ ޔަހޫދީން މިނިވަން ކުރުމަށްވެސް ވަނީ ގޮވައިލައިފައެވެ.