ޣައްޒާގެ މުސްލިމުންނާ ދެކޮޅަށް ޔަހޫދީ ޖައްބާރު ފައުޖުން ހިންގަމުން ދިޔަ ލާއިންސާނީ އުދުވާން ވަގުތީ ގޮތުން މެދުކަނޑައިލުމަށް ވެފައިވާ އެއްބަސްވުމުގެ މުއްދަތު އިތުރު 24 ގަޑިއިރަށް ދަންމައިލަން ނިންމައިފިއެވެ. މި އެއްބަސްވުމަށް ފުރަތަމަ އަމަލު ކުރަން ފަށާފައި ވަނީ ނޮވެންބަރު 24 ވީ ހުކުރު ދުވަހު ޣައްޒާ ގަޑިން ހެނދުނު 7 ޖެހިއިރުއެވެ.
ހަތަރު ދުވަހުގެ މުއްދަތަކަށް ހެދި އެއްބަސްވުން އިތުރު ދެ ދުވަހަށް ދަންމައިލުމަށް ފަހު، ޙަމާސްއާއި ޒަޔަނިސްޓު އިސްރާޢީލުން މި ވަނީ އިތުރު 24 ގަޑިއިރަށް އެއްބަސްވުން ދަމަހައްޓަން އެއްބަސްވެފައެވެ. މި އެއްބަސްވުމުގެ ދަށުން ޙަމާސްއިން ދަނީ އެ ޖަމާޢަތުގެ މުޖާހިދުން ރަހީނު ކޮށްފައިވާ އަސީރުން މިނިވަން ކުރަމުންނެވެ. އަދި، ޔަހޫދީ ފައުޖުން ދަނީ އެ މީހުން ހައްޔަރުކޮށް، ޖަލަށްލައި، ލާއިންސާނީ އަނިޔާތައް ދެމުންދިޔަ މުސްލިމުން މިނިވަން ކުރަމުންނެވެ.
ދެ ފަރާތުގެ މެދުގައި އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާ ކުރަމުންދާ ޤަޠަރުން ބުނީ، އެއްބަސްވުމުގެ މުއްދަތު އިތުރު 24 ގަޑިއިރަށް ދަންމައިލަން ނިންމާފައިވާއިރު، އެއްބަސްވުމުގައިވާ ނިންމުންތަކަށް ބަދަލެއް ގެނެސްފައި ނުވާ ކަމުގައެވެ. އެއްބަސްވުން އެކުލަވައިލުމުގައި މިޞްރާއި އެމެރިކާއިން ވެސް އެހީތެރިކަން ފޯރުކޮށްދީފައިވެއެވެ.
އެއްބަސްވުމުގެ ހަ ވަނަ ދުވަހު ޙަމާސް ޖަމާޢަތުން ވަނީ އެ ޖަމާޢަތުން ރަހީނު ކޮށްފައިވާ އަސީރުންގެ ތެރެއިން 10 މީހުން މިނިވަން ކޮށްފައެވެ. އަދި، އޭގެ ބަދަލުގައި ޔަހޫދީން ވަނީ ފަލަސްޠީނުގެ 30 މީހުން ދޫކޮށްލާފައެވެ. އެއްބަސްވުމުގެ ފަސް ވަނަ ދުވަހު ޙަމާސްއިން 12 އަސީރުން މިނިވަން ކޮށްފައިވާ ކަމުގައި ރެޑް ކްރޮސް (އައި.ސީއާރް.ސީ)ން ބުނެއެވެ. އޭގެ ތެރޭގައި ހިމެނެނީ ޒަޔަނިސްޓު އިސްރާޢީލުގެ 10 މީހުންނާއި ތައިލެންޑުގެ ދެ ރައްޔިތުންނެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު 15,000 އާ ގާތްކުރެއެވެ. އަދި، އިތުރު 6,000 އެއްހާ މީހުންގެ ހަށިތައް ސުންނާފަތި ކޮށްލާފައިވާ ޢިމާރާތްތަކުގެ ދަށުގައި އަދިވެސް ތާށިވެފައިވާ ކަމަށް ބެލެވެއެވެ. ޝަހީދު ކޮށްލާފައިވާ މީހުންގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ.