ޣައްޒާގައި މެދުކަނޑައިލާފައިވާ އޮތް ލާއިންސާނީ އުދުވާން އަލުން ފަށައިފި ނަމަ، ޔަހޫދީންނަށް އެ ކަމުގެ ހިތި ފެންނާނެ ކަމަށް ބުނެ އީރާނުން ޔަހޫދީންނަށް ވަރުގަދަ އިންޒާރެއް ދީފިއެވެ. އީރާނުން ޔަހޫދީންނަށް އިންޒާރު ދީފައި މި ވަނީ، އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފަށާފައިވާ ލާއިންސާނީ އުދުވާންތައް ވަގުތީ ގޮތުން މެދުކަނޑައިލާފައިވާ ދަނޑިވަޅެއްގައެވެ.
ހަތަރު ދުވަހުގެ މުއްދަތަކަށް ހެދި އެއްބަސްވުމުގެ މުއްދަތު ނޮވެންބަރު 24 ވީ ހޯމަ ދުވަހު ހަމަވެފައިވާއިރު، އެއްބަސްވުމުގެ މުއްދަތު އިތުރު ދެ ދުވަހުގެ މުއްދަތަކަށް އިތުރު ކުރަން ޙަމާސް ޖަމާޢަތާއި ޒަޔަނިސްޓު އިސްރާޢީލުން ވަނީ ނިންމާފައެވެ. މި ކަން އިޢުލާނު ކޮށްފައި ވަނީ، އެއްބަސްވުން އެކުލަވައިލުމަށް ކުރި މަޝްވަރާތަކުގައި މެދުވެރިއެއްގެ ދައުރު އަދާ ކުރަމުންދާ ޤަޠަރުންނެވެ.
"ޣައްޒާގެ މުސްލިމުންނާ ދެކޮޅަށް ޔަހޫދީން އަނެއްކާ ވެސް ހަތިޔާރު އުފުލައިފި ނަމަ، އެ މީހުން އެ ކަމަށް ޖަވާބުދާރީ ކުރުވާނަން،" އީރާނުގެ ޚާރިޖީ ވުޒާރާގެ ތަރުޖަމާނު ނާޞިރު އަލް-ކިނާނީ ވިދާޅުވިއެވެ. އަދި، ޒަޔަނިސްޓު އިސްރާޢީލާ ދެކޮޅަށް ހަތިޔާރު ނަގާފައިވާ "ރެސިސްޓެންސް ގުރޫޕު"ތަކުން މަޑުން ނުތިބޭނެ ކަމުގެ އިންޒާރު ވެސް ކިނާނީ ދެއްވިއެވެ.
"ޣައްޒާގެ މުސްލިމުން ގަތުލު ކުރަމުންދާ މަންޒަރު ބަލަން އެ ގުރޫޕުތަކުން މަޑަކުން ނުތިބޭނެ. ފަލަސްޠީނުގެ މުސްލިމުންގެ ދިފާޢުގައި ތެދުވަން އެ ގުރޫޕުތަކުން ފަހަތަކަށް ނުޖެހޭނެ. އެ ގުރޫޕުތަކުން ދެކޭ ގޮތުގައި ޔަހޫދީންގެ ލާއިންސާނީ އުދުވާން ހިންގަމުން ދަނީ އެމެރިކާގެ ވާތްގާ އެކު،" ކިނާނީ ވިދާޅުވިއެވެ. އަދި، އުދުވާންތައް އަލުން ފަށައިފި ނަމަ، މި ހަމަނުޖެހުންތައް މެދުއިރުމަތީގެ އެހެން ސަރަޙައްދުތަކަށް ފެތުރި، ފުޅާވާނެ ކަމުގެ އިންޒާރު ވެސް އޭނާ ދެއްވިއެވެ.
ކިނާނީ އިޝާރާތް ކުރައްވާފައިވާ ރެސިސްޓެންސް ގުރޫޕުތަކަކީ އީރާނުން ވާގިވެރިވާ މުޖާހިދުންގެ އަދި ހަތިޔާރުއެޅި ގުރޫޕުތަކެވެ. އޭގެ ތެރޭގައި ޣައްޒާގައި ވެރިކަން ކުރާ ޙަމާސް ޖަމާޢަތާއި، ލުބުނާނުގެ ޙިޒްބުاللهގެ އިތުރުން ޔަމަނުގެ ޙޫޘީ ޖަމާޢަތާއި ސޫރިޔާއާއި އިރާޤުގައި ހަރަކާތްތެރިވާ ބައެއް ހަތިޔާރު އެޅި ގުރޫޕުތައް ހިމެނެއެވެ. ޣައްޒާގެ ރައްޔިތުންގެ ދިފާޢުގައި ތެދުވެ، އެ ޖަމާޢަތްތަކުން އޮކްޓޫބަރު 7 ވަނަ ދުވަހުން ފެށިގެން އިސްރާޢީލަށް ވަރުގަދަ ހަމަލަތަކެއް ދީފައިވާ ކަން ފާހަގަކޮށްލަން ޖެހެއެވެ.
ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ.