ސޮމާލިޔާގެ ބައެއް ސަރަޙައްދުތަކަށް ކުރަމުންދާ ބޯ ވިއްސާރައިގައި ފެންބޮޑުވުމާ ގުޅިގެން މަރުވި މީހުންގެ ޢަދަދު 96 އަށް އަރައިފިއެވެ. ސޮމާލިޔާއަށް މޫސުން ގޯސްވެ ބޯކޮށް ވާރޭވެހެމުން ދަނީ 'ހޯން އޮފް އެފްރިކާ' ސަރަޙައްދަށް މި ވަގުތު އަރާފައިވާ ތޫފާންތަކާ ގުޅިގެންނެވެ. އޮކްޓޫބަރު މަހުން ފެށިގެން އެ ސަރަޙައްދަށް މެދުކެނޑުމެއް ނެތި ބޯކޮށް ވާރޭ ވެހެމުންދާ ކަމުގައި މޫސުން ދިރާސާކުރާ އިދާރާތަކުން ބުނެއެވެ.
ސޮމާލިޔާގެ ކާރިސާތަކާ ބެހޭ އިދާރާގެ އިސް އޮފިޝަލެއް ކަމުގައިވާ މަޙްމޫދު މުޢައްލިމް ވިދާޅުވީ، ފެންބޮޑުވުމާ ގުޅިގެން މަރުވި މީހުންގެ ޢަދަދު މިހާރު 96 އަށް އަރާފައިވާ ކަމުގައެވެ. އަދި، ކުރިއަށް އޮތް ތަނުގައި މި ޢަދަދު އިތުރުވާނެ ކަމަށް ބެލެވޭ ކަމުގައެވެ. ހޯން އޮފް އެފްރިކާ ސަރަޙައްދަށް މޫސުން ގޯސްވެފައި ވަނީ މޫސުމީ ބަދަލުތަކާ ގުޅިގެން ކަމަށް މޫސުން ދިރާސާ ކުރާ ފަރާތްތަކުން ބުނެއެވެ.
އ.ދއިން ބުނީ ހޯން އޮފް އެފްރިކާ ސަރަޙައްދަށް ކުރަމުންދާ ވިއްސާރައާ ގުޅިގެން 700,000 އަށްވުރެ ގިނަ މީހުންގެ ގެދޮރު ހަލާކުވެ، އެ މީހުން ހާލުގައި ޖެހިފައިވާ ކަމުގައެވެ. ހޯން އޮފް އެފްރިކާ ސަރަޙައްދުގައި އޮންނަ ގިނަ ޤައުމުތަކަކަށް ފެންބޮޑުވުމާ ކުރިމަތިވެފައިވާ ކަމަށާއި، މިއާ އެކު އެ ޤައުމުތަކަށް ކުރިމަތިވެފައިވާ އިންސާނީ މުސީބާތްތަކުގެ ހާލަތު އިތުރަށް ގޯސްވެފައިވާ ކަމުގައި ވެސް އ.ދއިން ބުނެއެވެ.
ސޮމާލިޔާގައި މަރުވި މީހުންގެ ޢަދަދު 96 އަށް އަރާފައިވާއިރު، އެ ޤައުމާ އިންވެގެން އޮތް ކެންޔާއިން ވެސް 76 މީހުން މަރުވެފައިވާ ކަމުގައި ކެންޔާގެ ރެޑް ކްރޮސްއިން ބުނެއެވެ. ކެންޔާގައި ވެސް ގިނަ ޢަދަދެއްގެ ބަޔެއްގެ ގެދޮރު ނެތިފައިވާ ކަމަށާއި، އެ މީހުން ހާލުގައި ޖެހިފައިވާ ކަމުގައި ރެޑް ކްރޮސްއިން ބުނެއެވެ. އަދި، މަގުތަކާއި ޢުމްރާނީ ވަސީލަތްތަކަށް ވަނީ ބޮޑެތި ގެއްލުންތަކެއް ލިބިފައެވެ.