އިންޑިޔާގެ އުއްތަރާކަންދްގައި ހަލިމަގެއް ހެދުމަށް ޓަނަލެއް ކޮނުމުގެ މަސައްކަތް ކުރަނިކޮށް ޓަނަލުގެ ފުރާޅު ވެއްޓި އެ ތަނުގެ ތެރޭގައި ތާށިވި 41 މީހުން ސަލާމަތް ކުރަން އިތުރު ވަގުތު ނަގާނެ ކަމުގައި، އެ މީހުން ސަލާމަތް ކުރަން މަސައްކަތް ކުރަމުންދާ ޓީމުން ހާމަކޮށްފިއެވެ. ޓަނަލުގެ ތެރޭގައި އެ މީހުން ތާށިވެފައިވާތާ މިހާރު 14 ދުވަސް ފާއިތުވެއްޖެއެވެ. އެ މީހުން ސަލާމަތް ކުރުމަށް ހުއްޓުމެއް ނެތި ޓީމުތަކުން ދަނީ މަސައްކަތް ކުރަމުންނެވެ.
މި މަސައްކަތުގައި ހަރަކާތްތެރިވާ އޮފިޝަލުން ވިދާޅުވީ، ޓަނަލުގެ ތެރޭގައި ތާށިވެފައިވާ މީހުން ސަލާމަތް ކުރަން އިތުރު 10 ނުވަތަ 15 މީޓަރުގެ ސަރަޙައްދެއް ކޮންނަން ޖެހޭ ކަމުގައެވެ. އަދި، އެ މަސައްކަތުގައި ބޭނުން ކުރަމުންދިޔަ ބޮޑު ޑްރިލް ހަލާކުވެފައިވާ ކަމަށާއި، އެއާ އެކު މަސައްކަތްތައް މަޑުޖެހިފައިވާ ކަމުގައެވެ. ޑްރިލް ހަލާކުވެފައި ވަނީ ނޮވެންބަރު 24 ވަނަ ދުވަހުއެވެ. ޓަނަލުގެ ތެރޭގައި ތިބި މީހުން ތާށިވެފައި ވަނީ 60 މީޓަރު އެތެރޭގައެވެ.
ޓަނަލުގެ ތެރޭގައި މަސައްކަތް ކުރާ މީހުން ތާށިވެފައި ވަނީ ނޮވެންބަރު 12 ވަނަ ދުވަހުއެވެ. އެ މީހުންގެ ހާލު ރަނގަޅު ކަމަށާއި، އެ މީހުންނަށް ކާބޯތަކެއްޗާއި، ފެނާއި، ބޭހާއި، އޮކްސިޖަން ފޯރުކޮށްދެމުންދާ ކަމުގައި އޮފިޝަލުން ވިދާޅުވިއެވެ. ޓަނަލުގެ ތެރޭގައި ތާށިވެފައި ވަނީ، އިންޑިޔާގެ އެންމެ ފަގީރު ސްޓޭޓްތަކަށް ނިސްބަތްވާ ބަޔެއް ކަމުގައި ރިޕޯޓުތައް ބުނެއެވެ.
އުއްތަރާކަންދް ސްޓޭޓްގެ ޗީފް މިނިސްޓަރ ޕުޝްކާރް ސިންހް ދާމީ ވިދާޅުވީ، އެ މީހުން ސަލާމަތް ކުރުމުގެ ގޮތުން ކޮންނަމުން ދިޔަ މަގުގައި މައްސަލަ ޖެހިފައިވާ ޑްރިލް ތާށިވެފައިވާ ކަމުގައެވެ. އަދި، އޭތި އެ މަގުން ނެރެ، ކުދި ޑްރިލް ފަދަ އާލާތްތައް ބޭނުން ކޮށްގެން އަތުން އެ މަސައްކަތް ކުރުމަށް ތައްޔާރުވަމުންދާ ކަމުގައެވެ.
ޓަނަލުގައި ތާށިވި މީހުން ސަލާމަތް ކުރުމުގައި އެންމެ އިސް ދައުރެއް އަދާ ކުރަމުން ދަނީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީންނެވެ. އެ އިދާރާގެ އޮފިޝަލެއް ކަމުގައިވާ ސައްޔިދް އާތާ ޙުސްނައިން ވިދާޅުވީ، ބޮޑު ޑްރިލް ހަލާކުވުމާ އެކު މަސައްކަތުގެ ދުވެލި ލަސްވެފައިވާ ކަމުގައެވެ. އަދި، ޓަނަލުގައި ތާށިވެފައިވާ މީހުންގެ ނަފްސާނީ ޞިއްޙަތުގެ ހާލަތު ވަރަށް ގާތުން ބަލަމުންދާ ކަމުގައެވެ.
ކޮންނަމުން ދިޔަ ޓަނަލުގެ ފުރާޅުން ބަޔެއް ވެއްޓެން މެދުވެރިވި ސަބަބު އަދި މިހާތަނަށް ދެނެގަނެވިފައެއް ނުވެއެވެ. ނަމަވެސް، ހަލިމަގު ހެދުމަށް ޓަނަލް ކޮންނަމުން ގޮސްފައިވާ ސަރަޙައްދަކީ ބިންހެލުންތަކާއި، ބިންގަނޑު ކެނޑުމާއި، ފެންބޮޑުވުމުގެ އަސަރު ކުރާ ސަރަޙައްދެއް ކަން ފާހަގަ ކޮށްލަން ޖެހެއެވެ. އަދި، ޓަނަލުގެ މަސައްކަތް ކުރަމުން ދިޔައީ، ނުރައްކަލުގެ ހާލަތެއް މެދުވެރިވެއްޖެ ނަމަ، އެ ތަނުން ނިކުންނާނެ އިތުރު 'އެގްޒިޓެ'އް ނުވަތަ މަގެއް ނަހަދާ ކަން ވެސް މަސްރަޙު ދިރާސާ ކުރާ ފަރާތްތަކުން ހާމަކުރެއެވެ.