ލުބުނާނުގައި ހަރަކާތްތެރިވާ އ.ދގެ ސުލްޙަ ބަލަހައްޓާ ފައުޖު [ޔުނައިޓެޑް ނޭޝަންސް އިންޓެރިމް ފޯސް އިން ލެބަނަން (ޔުނިފިލް)]ގެ ސިފައިންނަށް ޔަހޫދީ ފައުޖުން ބަޑީގެ ހަމަލަތަކެއް ދީފިއެވެ. ޔަހޫދީ ފައުޖުން ބަޑީގެ ހަމަލަތަކެއް ދީފައި ވަނީ ޔުނިފިލްގެ ސިފައިންގެ ފައުޖެއް ދަތުރު ކުރަމުންދިޔަ އުޅަނދަކަށެވެ. މި ހާދިސާ ހިނގާފައި ވަނީ ލުބުނާނުގެ ދެކުނުގެ ސަރަޙައްދެއްގައެވެ.
"[ހޮނިހިރު ދުވަހު] މެންދުރު 12 ޖަހާކަށްހާއިރު [އިސްރާޢިލީ ޑިފެންސް ފޯސް] އައި.ޑީ.އެފްގެ ސިފައިން ވަނީ ޔުނިފިލްގެ ސިފައިން ދަތުރު ކުރަމުންދިޔަ އުޅަނދަކަށް ބަޑީގެ ހަމަލަތަކެއް ދީފައި. މި ހާދިސާގައި ޔުނިފިލްގެ ސިފައިންގެ އެއްވެސް މީހެއްގެ ފުރާނައަށް ނުރައްކަލެއް ނުވޭ. ނަމަވެސް، ޔުނިފިލްގެ އުޅަނދަށް ބޮޑެތި ގެއްލުންތަކެއް ލިބުނު،" ޔުނިފިލުން ނެރުނު ބަޔާނެއްގައި ހާމަކުރިއެވެ.
ލުބުނާނުގައި ސުލްޙަ ބަލަހައްޓަން މަސައްކަތް ކުރާ އ.ދގެ ސިފައިންނަށް ޔަހޫދީ ސިފައިން ހަމަލަދިނުމުން ޔުނިފިލުން ވަނީ މިއީ އިންތިހާއަށް ކަންބޮޑުވުން އޮތް މައްސަލައެއް ކަމުގައި ބުނެފައެވެ. އަދި، ޔަހޫދީންގެ މި އަމަލު އެންމެ ހަރުކަށި އިބާރާތުން ކުށްވެރި ކޮށްފައެވެ. ލުބުނާނުގެ ދެކުނުގެ ސަރަޙައްދުގައި އ.ދގެ ސުލްޙަ ބަލަހައްޓާ ފައުޖުން ހަރަކާތްތެރިވަމުން ދަނީ އެ ސަރަޙައްދުގައި އަމަން ބެލެހެއްޓުމުގެ އޮޕަރޭޝަނެއްގައެވެ.
މިއީ، ޔަހޫދީން އ.ދގެ ސިފައިންނަށް އަމާޒުކޮށް ހަމަލަދީފައިވާ ފުރަތަމަ ފަހަރެއް ނޫނެވެ. ހުސްވި އޮކްޓޫބަރު މަހު ވެސް ޔަހޫދީ ފައުޖުން ވަނީ ލުބުނާނުގައި ޔުނިފިލްގެ ދެ މަރުކަޒަކަށް ހަމަލަ ދީފައެވެ. ލުބުނާނުގެ ޙޫލާއާއި ނާޤޫރާގައި ހުންނަ ޔުނިފިލްގެ މަރުކަޒުތަކަށް ހަމަލަ ދީފައި ވަނީ އަސްކަރީ ޓޭންކުފަހަރު ބޭނުން ކޮށްގެން ކަމަށް ރިޕޯޓުތައް ބުނެއެވެ. މީގެ ތެރެއިން ޙޫލާގެ މަރުކަޒަށް ދިން ހަމަލާގައި ޔުނިފިލްގެ ސިފައިންގެ މީހަކު ޒަޚަމުވިއެވެ.
"ސުލްޙަ ދަމަހައްޓަން މަސައްކަތް ކުރަމުންދާ ޔުނިފިލްގެ އަންހެން އަދި ސިފައިން ސިފައިންގެ ހިމާޔަތާއި ރައްކާތެރިކަން ކަށަވަރު ކޮށްދޭން ޖެހޭނެ ކަން ހުރިހާ ފަރާތަކަށް ވެސް ހަނދާން ކޮށްދެން،" ޔުނިފިލުން ނެރުނު ބަޔާނުގައި ބުންޏެވެ.
ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުން ދިޔަ ލާއިންސާނީ އުދުވާންތައް ވަގުތީ ގޮތުން މެދުކަނޑައިލި ފަހުން، ލުބުނާއާއި ޒަޔަނިސްޓު އިސްރާޢީލް ގުޅޭ ސަރަޙައްދީ ރޮނގު ކައިރީގައި ހިނގަމުން ދިޔަ ހަމަލަ ބަދަލު ކުރުންތަކަށް ވެސް ވަނީ މެދުކެނޑުމެއް އައިސްފައެވެ. ޣައްޒާގެ މުސްލިމުންނާ ދެކޮޅަށް ހިންގަމުން ދިޔަ އުދުވާނާ ގުޅިގެން ލުބުނާނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ވެސް ވަނީ ޒަޔަނިސްޓު އިސްރާޢީލުގެ ރަށްތަކާއި، ޔަހޫދީ ސިފައިންނަށް އަމާޒުކޮށް ގިނަ ޢަދަދެއްގެ ހަމަލަތަކެއް ދީފައެވެ.
ޔަހޫދީންނަށް ހަމަލަދިނުމުގައި ލުބުނާނުގެ ހަތިޔާރު އެޅި ޖަމާޢަތެއް ކަމުގައިވާ ޙިޒްބުاللهގެ އިތުރުން އެ ޤައުމުގައި ހަރަކާތްތެރިވާ ފަލަސްޠީނުގެ މުޖާހިދުންގެ ޖަމާޢަތްތަކުން ބައިވެރިވިއެވެ. ލުބުނާނުން އިސްރާޢީލަށް ތަފާތު 1,000 އަށްވުރެ ގިނަ ހަމަލަ ދީފައިވާ ކަމުގައި އިސްރާޢީލުން ބުނެއެވެ. އެ ހަމަލަތައް ދީފައި ވަނީ މިސައިލާއި ރޮކެޓްގެ އިތުރުން ޑްރޯން ފަދަ ނުރައްކާތެރި ހަތިޔާރު ބޭނުން ކޮށްގެންނެވެ.
އޮކްޓޫބަރު 7 ވަނަ ދުވަހަށް ފަހު ޔަހޫދީން ލުބުނާނަށް ދީފައިވާ ހަމަލަތަކުގައި މިހާތަނަށް 109 މީހުން ވަނީ ޝަހީދު ކޮށްލާފައެވެ. އޭގެ ތެރޭގައި ޙިޒްބުالله ޖަމާޢަތުގެ 77 މުޖާހިދުން ހިމެނެއެވެ. އަދި، ޢާންމުންގެ 14 މީހުން ހިމެނޭއިރު، އޭގެ ތެރޭގައި ތިން ނޫސްވެރިން ވެސް ހިމެނެއެވެ. މުޖާހިދުންގެ ހަމަލަތަކުގައި ޔަހޫދީ ސިފައިންގެ ހަ މީހުންނާއި ޢާންމުންގެ ތިން މީހުން މަރައިލާފައިވެއެވެ.