ޣައްޒާގައި ވެރިކަން ކުރާ ޙަމާސް ޖަމާޢަތުން އޮކްޓޫބަރު 7ވަނަ ދުވަހު ހިންގި އޮޕަރޭޝަނުގައި ރަހީނުކޮށްފައިވާ މީހުންގެ ތެރެއިން 17 އަސީރުން މިނިވަން ކޮށްފިއެވެ. އޭގެ ތެރޭގައި ހިމެނެނީ ޒަޔަނިސްޓު އިސްރާޢީލުގެ 13 ޔަހޫދީންނާއި ބޭރު ޤައުމަކަށް ނިސްބަތްވާ ހަތަރު މީހުންނެވެ. އެ މީހުން މިނިވަން ކޮށްފައި މި ވަނީ، ޙަމާސްއާއި ޒަޔަނިސްޓު އިސްރާޢީލާ ދެމެދު އެކުލަވައިލާފައިވާ އެއްބަސްވުމުގެ ދެވަނަ ދުވަހުއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ އުދުވާންތައް ވަގުތީ ގޮތުން މެދުކަނޑައިލަން އެއްބަސްވެ، އެއަށް އަމަލު ކުރަން ފަށާފައި ވަނީ ނޮވެންބަރު 24 ވީ ހުކުރު ދުވަހުގެ ހެނދުނެވެ. މި އެއްބަސްވުމުގެ ދަށުން ޙަމާސްއިން އަސީރުން މިނިވަން ކުރާއިރު، ޔަހޫދީން ހައްޔަރުކޮށް ޖަލަށް ލާފައިވާ ފަލަސްޠީނުގެ ކުޑަކުދިންނާއި، އަންހެނުންނާއި ޒުވާނުން ވެސް މިނިވަން ކުރާނެއެވެ. އަދި، ޣައްޒާއަށް އިންސާނީ އެހީގެ ސާމާނު އެތެރެ ކުރުމުގެ ފުރުޞަތު ވަނީ ހުޅުވައިލާފައެވެ.
ދެ ފަރާތުގެ ދެމެދުގައި އެއްބަސްވުން އެކުލަވައިލުމުގައި މެދުވެރިއެއްގެ ދައުރު އަދާ ކުރަމުންދާ ޤަޠަރުން ބުނީ ޙަމާސް ޖަމާޢަތުން ރަހީނު ކޮށްފައިވާ މީހުންގެ ތެރެއިން 17 މީހުން ރެޑް ކްރޮސްއާ ހަވާލު ކޮށްފައިވާ ކަމުގައެވެ. ޤަޠަރުގެ ޚާރިޖީ ވުޒާރާއިން ބުނީ އެ އަސީރުން ރަފަޙު މަގުން މިޞްރަށް ގެންގޮސްފައިވާ ކަމުގައެވެ. އެއްބަސްވުމުގެ ދެވަނަ ދުވަހު މިނިވަން ކުރަން ހަމަޖެހިފައި އޮތް މީހުން ދޫކޮށްލުމުގައި ލަސްތަކެއް ކުރިމަތިވިއެވެ. ސަބަބަކީ، ޔަހޫދީން އެއްބަސްވުމަށް އިޙުތިރާމު ކުރަމުން ނުދާ ކަމަށް ޙަމާސްއިން ތުހުމަތު ކުރުމެވެ.
ޤަޠަރުގެ ޚާރިޖީ ވުޒާރާގެ ތަރުޖަމާނު މާޖިދު އަލް-އަންޞާރީ ވިދާޅުވީ ޤަޠަރާއި މިޞްރުން ގުޅިގެން ކުރި މަސައްކަތުން، އިތުރު އަސީރުން މިނިވަން ކުރުމަށް ޙަމާސް ޖަމާޢަތުން އެއްބަސްވި ކަމުގައެވެ. އަދި، އެ ކަމަށް އޮތް ހުރަސްތައް ނައްތައިލެވިފައިވާ ކަމުގައެވެ. ޤަޠަރާއި މިޞްރާ އެކު ބޭއްވި މަޝްވަރާތަކަށް ފަހު، އެއްބަސްވުން ދަމަހައްޓާނެ ކަމުގެ ޔަގީން ކަން ޔަހޫދީން ދީފައިވާ ކަމުގައި ވެސް އޭނާ ވިދާޅުވިއެވެ.
ޙަމާސްގެ އިސް އޮފިޝަލެއް ކަމުގައިވާ އުސާމާ ޙަމްދާން ވިދާޅުވީ، އަސީރުން މިނިވަން ކުރުން ލަސްކޮށްފައި ވަނީ ފަލަސްޠީނުގެ ރައްޔިތުންނަށް ޔަހޫދީ ފައުޖުން އަދިވެސް ހަމަލަދެމުންދާތީ ކަމުގައެވެ. އަދި، ޣައްޒާއަށް އެހީގެ ސާމާނު އެތެރެ ކުރުމުގައި އިސްރާޢީލުން އަމަލު ކުރަމުންދާ ގޮތްތަކާ މެދު ހިތްހަމަ ނުޖެހިގެން ކަމުގައެވެ.
އެއްބަސްވުމުގެ ދެވަނަ ދުވަހު ޒަޔަނިސްޓު އިސްރާޢީލުން ވެސް ވަނީ ފަލަސްޠީނުގެ 39 އަންހެނުންނާއި ފިރިހެނުން މިނިވަން ކޮށްފައެވެ. އޭގެ ތެރޭގައި ހިމެނެނީ އަންހެނުންނާއި ކުޑަކުދިންނެވެ. އެއީ، އެއްވެސް ހައްޤު ސަބަބަކާ ނުލައި ހައްޔަރުކޮށް އިސްރާޢީލުގެ ޖަލުތަކަށް ލާފައިވާ މީހުންނާއި ކުދިންނެވެ.
ޣައްޒާގައި ޔަހޫދީން ހިންގަމުން ދިޔަ ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 14,800 އަށް އަރައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 36,000 އަށް އަރައެވެ. އުދުވާންތައް ވަގުތީ ގޮތުން މެދުކަނޑައިލާފައިވީ ނަމަވެސް، އެއްބަސްވުމުގެ މުއްދަތު ހަމަވުމާ އެކު ގަތުލުއާންމު އަލުން ފެށުމަށް ޔަހޫދީ ފައުޖުން މިހާރު ދަނީ ތައްޔާރުވަމުންނެވެ.