ޣައްޒާގެ އުތުރުގެ ސަރަޙައްދުތަކުގައި ދިރިއުޅޭ ރައްޔިތުން އެ މީހުންގެ ގެދޮރަށް އެނބުރި ދާން މަސައްކަތް ކުރުމުން ޔަހޫދީ ފައުޖުން އެ މީހުންނަށް ހުރަސް އަޅަން ފަށައިފިއެވެ. އޮކްޓޫބަރު 7 ވަނަ ދުވަހު ޔަހޫދީ ފައުޖުން ފެށި ލާއިންސާނީ އުދުވާނުގައި އެންމެ ވަރުގަދަ ހަމަލަތަކެއް ދީފައި ވަނީ ޣައްޒާގެ އުތުރުގައިވާ ސަރަޙައްދުތަކަށެވެ. މި އުދުވާނާ ގުޅިގެން އެ ސަރަޙައްދުގައި ދިރިއުޅޭ އެތަކެއް ސަތޭކަ ހާސް ބަޔަކު ވަނީ އެ ސަހަރުގެ ދެކުނަށް ބަދަލުވެފައެވެ.
ޣައްޒާގެ މުސްލިމުން ގަތުލު ކުރުމަށް ޔަހޫދީން ފަށާފައިވާ އުދުވާންތައް ވަގުތީ ގޮތުން މެދުކަނޑައިލުމާ ގުޅިގެން އެ މީހުން ވަނީ އެނބުރި ގެދޮރަށް ދާން މަސައްކަތް ފަށާފައެވެ. އުދުވާންތައް ވަގުތީ ގޮތުން މެދުކަނޑައިލާފައި ވަނީ ނޮވެންބަރު 24 ވަނަ ދުވަހު ޣައްޒާ ގަޑިން ހެނދުނު 7 ޖެހިއިރުއެވެ. އުދުވާންތައް މެދުކަނޑާއިލާފައި މި ވަނީ ޣައްޒާގައި ވެރިކަން ކުރާ ޙަމާސް ޖަމާޢަތާއި ޒަޔަނިސްޓު އިސްރާޢީލާ ދެމެދު ހަދާފައިވާ އެއްބަސްވުމެއްގެ ދަށުންނެވެ.
އުދުވާންތައް ވަގުތީ ގޮތުން މެދުކަނޑައިލާފައިވީ ނަމަވެސް، ޣައްޒާގެ އުތުރުގެ ސަރަޙައްދުތަކަށް އެނބުރި ދިޔުމުގެ ފުރުޞަތު ނުދޭނެ ކަމުގައި އިސްރާޢީލުގެ އިސްތިޢުމާރީ ސިފައިން ވަނީ ބުނެފައެވެ. އަދި، ޣައްޒާގެ އުތުރަށް އެނބުރި ދާން މަސައްކަތް ކުރާ މީހުން ހުއްޓުވާނެ ކަމުގެ އިންޒާރު ވެސް ޔަހޫދީން ވަނީ ދީފައެވެ.
ނަމަވެސް، މި އިންޒާރުތަކަށް ފަރުވާލެއް ނުބަހައްޓާ، ގިނަ ޢަދަދެއްގެ ބަޔަކު އެ ސަރަޙައްދަށް ދަތުރު ކުރަމުންދާ ކަމުގައި ރިޕޯޓުތައް ބުނެއެވެ. ޣައްޒާގެ އުތުރަށް ވަންނަން މަސައްކަތް ކުރި ބައެއް މީހުންނަށް ޔަހޫދީން ހަމަލަދީފައިވާ ކަމަށާއި، އޭގެ ތެރެއިން ދެ މީހަކު ޝަހީދު ކޮށްލާފައިވާ ކަމުގައި ފަލަސްޠީނުގެ ނޫހެއް ކަމުގައިވާ ވަފާއިން ރިޕޯޓު ކުރެއެވެ. އިތުރު 11 މީހުން ޒަޚަމު ކޮށްލާފައިވާ ކަމުގައި ވެސް ރިޕޯޓުތައް ބުނެއެވެ.
"އަހަރެން އެނބުރި ދާނެ ގެއެއް މިހާރަކު ނެތް. ޔަހޫދީން ވަނީ އުދުވާނުގެ ތިންވަނަ ދުވަހު އަހަރެން ގެއަށް ބޮންއަޅައި ސުންނާފަތި ކޮށްލާފައި. ނަމަވެސް، ހަމަލަދިނުން މެދުކަނޑައިލުމުން، ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ތާށިވެފައިވާ މީހުންގެ ހަށިތައް ހޯދުމުގެ ފުރުޞަތު ލިބޭނެ. އެ މީހުންގެ ޖަނާޒާ ބޭއްވުމުގެ ފުރުޞަތު ލިބޭނެ،" ޣައްޒާގެ އުތުރުގެ ރަށެއްގައި ދިރިއުޅޭ ރައްޔިތަކު ނޫސްވެރިންނާ ވާހަކަ ދައްކަވަމުން ބުންޏެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 14,800 އަށް އުފުލިފައެވެ. އޭގެ ތެރޭގައި 6,150 ކުޑަކުދިންނާއި 4,000 އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 36,000 އަށް އަރާފައެވެ.