ޣައްޒާގެ މުސްލިމުންނަށް ފޯރުކޮށްދެމުންދާ އިންސާނީ އެހީގެ މަސައްކަތްތައް ކުރިއަށް އޮތް 48 ގަޑިއިރުގެ ތެރޭގައި ހުއްޓައިލަން މަޖުބޫރުވާނެ ކަމުގައި އ.ދއިން ބުނެފިއެވެ. ޣައްޒާގެ ރެފިއުޖީންނާ ބެހޭ އ.ދގެ އިދާރާ – ޔުނައިޓެޑް ނޭޝަންސް ރިލީފް އެންޑް ވަރކްސް އޭޖެންސީ (ޔޫ.އެން.އާރް.ޑަބްލިޔު.އޭ)ން ބުނީ، އެ އިދާރާގެ އޮފީސްތަކާއި ހިޔާތަކަށް ކަރަންޓުގެ ޚިދުމަތް ފޯރުކޮށްދޭން ބޭނުން ކުރާ ތެޔޮ ހުސްވުމާ އެކު، އެ އިދާރާގެ މަސައްކަތް ހުއްޓައިލަން މަޖުބޫރުވެފައިވާ ކަމުގައެވެ.
ޔޫ.އެން.އާރް.ޑަބްލިޔު.އޭގެ މަސައްކަތްތައް ހުއްޓައިލަން މަޖުބޫރުވެފައި މި ވަނީ، ޣައްޒާގެ ފުރަބަންދާ ގުޅިގެންނެވެ. އޮކްޓޫބަރު 7 ވަނަ ދުވަހު ޣައްޒާގެ ފުރަބަންދު ހަރުކަށިކޮށް އެ ސަހަރަށް ކާބޯތަކެއްޗާއި، ފެނާއި، ބޭސްފަރުވާގެ ސާމާނުގެ އިތުރުން ތެޔޮ އެތެރެ ކުރަން ވެސް ޔަހޫދީން ވަނީ ހުރަސް އަޅާފައެވެ. މިއާ އެކު، އެހީދޭ ޖަމާޢަތްތަކުން ހިންގާ ހިޔާތަކުގެ އިތުރުން ހޮސްޕިޓަލްތަކާއި ކްލިނިކުތައް ވެސް ވަނީ ބަންދު ކުރަން މަޖުބޫރުވެފައެވެ. ޣައްޒާގައި ހިންގާ 18 ހޮސްޕިޓަލެއް މިހާރު ވެސް ވަނީ ބަންދު ކޮށްފައެވެ.
ޣައްޒާގައި ހުންނަވާ ޔޫ.އެން.އާރް.ޑަބްލިޔު.އޭގެ އިސްވެރިޔާ ތޯމަސް ވައިޓް ވިދާޅުވީ، ޣައްޒާއަށް ތެލާއި އެހެނިހެން ޒަރޫރީ ސާމާނު އެތެރެ ކުރަން ހުރަސްއަޅާފައި އޮންނަތާ މަހަކަށްވުރެ ގިނަ ދުވަސް ފާއިތުވެފައިވާއިރު، ޣައްޒާގައި ދިރިއުޅޭ 2.3 މިލިޔަނަށް ވުރެ ގިނަ މުސްލިމުންގެ އިންސާނީ ހާލަތު ދަށު ދަރަޖައަކަށް ވެއްޓިފައިވާ ކަމުގައެވެ.
"އަޅުގަނޑުމެން ޣައްޒާގެ ރައްޔިތުންނަށް ފޯރުކޮށްދެމުންދާ އިންސާނީ ޚިދުމަތްތައް ކުރިއަށް އޮތް 48 ގަޑިއިރުގެ ތެރޭގައި ހުއްޓައިލަން މި ވަނީ މަޖުބޫރުވެފައި. ސަބަބަކީ، ޣައްޒާއަށް ތެޔޮ އެތެރެ ކުރުން ހުއްޓުވާފައި އޮތުން،" ވައިޓް ވިދާޅުވިއެވެ.
ޣައްޒާގެ ފުރަބަންދާއި މެދުނުކެނޑި ކުރިއަށް ގެންދާ އުދުވާނުގެ ސަބަބުން އެ ސަހަރުގައި ހިންގާ ހޮސްޕިޓަލްތަކުގައި ޞިއްޙީ ފަރުވާގެ ޚިދުމަތްތައް ދިނުމަށް ހުރަސް އެޅިފައިވާ ކަމުގައި އެ ހޮސްޕިޓަލްތަކުން ބުނެއެވެ. އަދި، ހޮސްޕިޓަލްތަކުގައި އެޑްމިޓު ކޮށްގެން ފަރުވާ ދެމުންދާ މީހުންނާއި، އިންކިޔުބޭޓަރ ފަދަ އާލާތްތައް ބޭނުން ކޮށްގެން ފަރުވާ ދެމުންދާ ތުއްތު ކުދިން ޝަހީދު ވަމުންދާ ކަމުގައި ވެސް އެ ފަރާތްތަކުން ބުނެއެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,300 އަށް އުފުލިފައެވެ. އޭގެ ތެރޭގައި 4,600 އަށްވުރެ ގިނަ ޢަދަދެއްގެ ކުޑަކުދިންނާއި 3,100 އަށްވުރެ ގިނަ އަންހެނުން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 29,000 އަށް އުފުލިފައެވެ. އެމެރިކާގެ އެހީތެރިކަމާ އެކު ޔަހޫދީން ދެމުންދާ ހަމަލަތަކުގައި ޒަޚަމު ކޮށްލާފައިވާ މީހުންނަށް ޞިއްޙީ ފަރުވާ ދިނުމަށް ޣައްޒާގެ ޞިއްޙީ އިދާރާތައް ވަނީ ނުކުޅެދިފައެވެ.