ލުބުނާނުގެ ދެކުނުގައިވާ ސަރަޙައްދުތަކަށް ޔަހޫދީ ފައުޖުން އަނެއްކާ ވެސް ވަރުގަދަ ހަމަލަތަކެއް ދީފިއެވެ. މިއީ، ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތްތަކުން ދިން 'އެންޓި-ޓޭންކް' މިސައިލް ހަމަލައެއްގެ ރައްދުގައި ދީފައިވާ ހަމަލަތަކެކެވެ. މުޖާހިދުންގެ މިސައިލް ހަމަލާގައި ޒަޔަނިސްޓު އިސްރާޢީލުގެ ޢާންމުންގެ ބަޔަކު ޒަޚަމުވިއެވެ.
ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތްތަކުގެ ތެރޭގައި ޙިޒްބުاللهއާއި ޙަމާސްގެ ޖަމާޢަތުގެ ހަތިޔާރު އެޅި ގޮފި – ޢިއްޒުންދީން އަލް-ޤައްސާމް ބްރިގޭޑްސް ހިމެނެއެވެ. ނަމަވެސް، ޔަހޫދީންނަށް އަމާޒުކޮށް ދީފައިވާ މިސައިލް ހަމަލާގެ ފަހަތުގައި އޮތީ ކޮން ބަޔެއް ކަން އަދި ސާފެއް ނޫނެވެ. އަދި، އެއްވެސް ފަރާތަކުން އެ ހަމަލާގެ ޒިންމާ އުފުލާފައެއް ނުވެއެވެ.
މިސައިލް ހަމަލަ އަމާޒު ކޮށްފައި ވަނީ ލުބުނާނުގެ ސަރަޙައްދީ ރޮނގާ 800 މީޓަރު ދުރުގައި އޮންނަ ދޮވެވް ކިޔާ އަވަށަކަށެވެ. މި ހަމަލާގައި އިސްރާޢީލުގެ ކަރަންޓުގެ ޚިދުމަތް ފޯރުކޮށްދޭ ކުންފުނީގެ މުވައްޒަފުންތަކެއް ޒަޚަމު ވެފައިވާ ކަމުގައި އެ ކުންފުނިން ބުނެއެވެ. ނަމަވެސް، ޒަޚަމުވެފައިވާ މީހުންގެ ޢަދަދު ސާފެއް ނޫނެވެ.
އޮކްޓޫބަރު 7 ވަނަ ދުވަހު ޔަހޫދީ އިސްރާޢީލުން ޣައްޒާގެ މުސްލިމުންނާ ދެކޮޅަށް ލާއިންސާނީ ގަތުލުއާންމެއް ފެށުމާ ގުޅިގެން ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތްތަކުން ވެސް ވަނީ ޔަހޫދީންނާ ދެކޮޅަށް ހަނގުރާމަ އިޢުލާނު ކޮށްފައެވެ. އަދި، ލުބުނާނާއި އިސްރާޢީލް ގުޅޭ ސަރަޙައްދީ ރޮނގު ކައިރީގައި ހަރަކާތްތެރިވާ ޔަހޫދީ ސިފައިންނާއި، އެ ސަރަޙައްދުގައި އޮންނަ ޔަހޫދީންގެ ރަށްތަކަށް ހަމަލަދޭން ފަށާފައެވެ.
މި ހަމަލަތަކާ ގުޅިގެން އިސްރާޢީލުގެ އުތުރުގެ ރަށްތަކުގައި ދިރިއުޅޭ އެތަކެއް ހާސް ބަޔަކު މިހާރު ވަނީ ރައްކާތެރި ހިސާބުތަކަށް ބަދަލު ކޮށްފައެވެ. ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތްތަކުން ދީފައިވާ ހަމަލަތަކުގައި މިހާތަނަށް ޔަހޫދީ ސިފައިންގެ ހަ މީހުން ވަނީ މަރައިލާފައެވެ. އަދި، ޢާންމުންގެ ދެ މީހުން މަރައިލާފައިވެއެވެ.
ލުބުނާނުގައި ހަރަކާތްތެރިވާ މުޖާހިދުންގެ ޖަމާޢަތްތަކުގެ އިތުރުން، ސޫރިޔާއާއި ޔަމަނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ވެސް ދަނީ ޙަމާސް ޖަމާޢަތަށް ވާގިވެރިވުމުގެ ގޮތުން ޔަހޫދީންނަށް ހަމަލަތައް އަމާޒު ކުރަމުންނެވެ. ޣައްޒާގައި ވެރިކަން ކުރަނީ ޙަމާސްއިންނެވެ. ސޫރިޔާގައި ހަރަކާތްތެރިވާ ޖަމާޢަތަކުން ދާދި ފަހުން އިސްރާޢީލުގެ ރަށެއް ކަމުގައިވާ އެއިލާތުގައި ހުންނަ ސްކޫލަކަށް ޑްރޯން ހަމަލައެއް ދީފައިވެއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 11,100 އަށް އުފުލިފައެވެ. އޭގެ ތެރޭގައި 4,500 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު 24,000 އަށް އަރައެވެ. ޔަހޫދީންގެ ގަތުލުއާންމު ހިންގަމުން ދަނީ އެމެރިކާގެ ރުހުމާއި، އެއްބާރުލުމާއި އެހީތެރިކަމާ އެކުގައެވެ.