ޔަހޫދީން ޣައްޒާއަށް ދެމުންދާ ހަމަލަތަކުގައި ޒަޚަމު ކޮށްލާފައިވާ މުސްލިމުންނަށް ޞިއްޙީ ފަރުވާ ފޯރުކޮށްދޭން ތުރުކީވިލާތުން ތައްޔާރަށް އޮތް ކަމުގައި އެ ޤައުމުގެ ރައީސް ރަޖަބް ޠައްޔިބް އުރުދުޣާން ވިދާޅުވެއްޖެއެވެ. އޮކްޓޫބަރު 7 ވަނަ ދުވަހުން ފެށިގެން ޔަހޫދީން މެދުކެނޑުމެއް ނެތި ޣައްޒާއަށް ދެމުންދާ ހަމަލަތަކުގައި ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 24,000 އަށް އުފުލިފައެވެ.
ނަމަވެސް، ޣައްޒާ ފުރަބަންދު ކޮށް، ކާބޯތަކެއްޗާއި ފެނާއި ބޭސްފަރުވާއަށް ބޭނުންވާ ސާމާނު ވައްދަން ޔަހޫދީން ހުރަސް އަޅަމުން ދިޔުމާ އެކު، ޣައްޒާގައި ޞިއްޙީ ފަރުވާއަށް ބޭނުންވެފައިވާ އެތަކެއް ހާސް މީހުންނަށް އެ ޚިދުމަތް ފޯރުކޮށްދޭން ވަނީ ހުރަސް އެޅިފައެވެ. އަދި، ތެޔޮ ހޮސްވުމާ އެކު ގިނަ ޢަދަދެއްގެ ހޮސްޕިޓަލްތަކާއި ކްލިނިކުތައް ވަނީ ބަންދު ކުރަން ޖެހިފައެވެ.
މި ގޮތުން، ޣައްޒާގައި ހުންނަ 35 ހޮސްޕިޓަލްގެ ތެރެއިން 16 ތަނެއް މިހާރު ވަނީ ބަންދު ކޮށްފައެވެ. އަދި، 72 ކްލިނިކުގެ ތެރެއިން 51 ތަން ވަނީ ބަންދު ކޮށްފައެވެ. އެ ތަންތަން ބަންދު ކުރަން ޖެހުނީ، ޔަހޫދީންގެ ހަމަލަތަކުގައި ލިބިފައިވާ ގެއްލުންތަކުގެ އިތުރުން، އެ ތަންތަނަށް ކަރަންޓުގެ ޚިދުމަތް ދިނުމަށް ބޭނުންވާ ތެޔޮ ހޮސްވުމުންނެވެ.
އުރުދުޣާން ވިދާޅުވީ، ޣައްޒާގައި ޒަޚަމު ކޮށްލާފައިވާ މީހުން ތުރުކީވިލާތަށް ގެންގޮސް، އެ މީހުންނަށް ޞިއްޙީ ފަރުވާ ފޯރުކޮށްދިނުމަށް އެ ޤައުމުން ތައްޔާރަށް އޮތް ކަމުގައެވެ. އަދި، ބޮޑެތި ބަލިތަކަށް ފަރުވާ ހޯދަމުންދާ މީހުންނަށް ވެސް އެ ފުރުޞަތު ފަހިކޮށްދޭނެ ކަމުގައި އޭނާ ވިދާޅުވިއެވެ. ނަމަވެސް، ޣައްޒާގައި ތިބި ޞިއްޙީ ފަރުވާއަށް ބޭނުންވާ މީހުން އެ ސަހަރުން ބޭރަށް ގެންދާނެ ގޮތަކާ މެދު ސުވާލު އުފެދެއެވެ. ސަބަބަކީ، އެ ސަހަރަށް ވަދެނިކުމެ ހެދެން އޮތް ހުރިހާ މަގެއް ޔަހޫދީން އޮތީ ބަންދުކޮށްފައެވެ.
ދާދިފަހުން އުޒްބަކިސްތާނަށް ކުރެއްވި ދަތުރުފުޅެއް ނިންމަވައިލެއްވުމަށް ފަހު އެނބުރި ތުރުކީވިލާތަށް ވަޑައިގަންނަވައި ނޫސްވެރިންނާ ވާހަކަފުޅު ދައްކަވަމުން އުރުދުޣާން ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ގަތުލުއާންމު ހުއްޓުވަން ވެސް ތުރުކީވިލާތުން މަސައްކަތްތަކެއް ކުރަމުންދާ ކަމުގައެވެ. އަދި، ޒަޚަމު ކޮށްލާފައިވާ މީހުން ތުރުކީވިލާތަށް ގެންދެވޭނެ ގޮތެއް ހޯދައިދިނުމަށް ޒަޔަނިސްޓު އިސްރާޢީލަށް ބާރު އަޅުއްވާނެ ކަމުގައި ވެސް އުރުދުޣާން ވިދާޅުވިއެވެ.
އުރުދުޣާން މިހެން ވިދާޅުވެފައިވާއިރު، އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް ދެމުންދާ ހަމަލަތަކުގައި ޝަހދީދު ކޮށްލާފައިވާ މީހުންގެ ޢަދަދު ވަނީ 10,812 އަށް އަރާފައެވެ. އޭގެ ތެރޭގައި 4,300 އަށްވުރެ ގިނަ ޢަދަދެއްގެ ކުޑަކުދިން ވެސް ހިމެނެއެވެ. ޔަހޫދީން ޣައްޒާގެ މުސްލިމުންނާ ދެކޮޅަށް ގަތުލުއާންމެއް ހިންގަމުން މި ދަނީ އެމެރިކާގެ ރުހުމާއި، ފުރިހަމަ އެހީތެރިކަމާއި އެއްބާރުލުމާ އެކުގައެވެ.